Ne is samà dutun te pemuhat, ne ǥaked en ni Aaron wey te menge kevuwazan din, ne utew heini segradu su zuma heini zuen te pemuhat pinaaǥi te hapuy he impemuhat diyà te Nengazen.
Ne kinahanglan he edtutungen heini langun, su heini he pemuhat, ne para te Nengazen, ne ed-ul-ulahan heini taman te taman. Kinahanglan he ed-ul-ulahan heini te kevuwazan ni Aaron he iyan ebpekeilis kandin he egkehimu he memumuhat.
Kinahanglan he ed-uwiten diyà te ǥawas te kampu wey edtutungen is nesamà duen te vaka wey kambing he migkuwaan te lengesa he mid-uwit diyà te Utew Segradu he Lugar he inlumpiyu kayi.
