Leviticus 6:16 - Manobo Western Bukidnon OT

^16-17 Is egkesamà he herina, ne edhilutuen ne egkeenen ni Aaron wey te menge memumuhat he menge kevuwazan din. Piru hilutua zan heini he wazè din tapey, ne keena zan diyà te lama te Tulda he Edtelevukaayan, he segradu he lugar. Imbeǥey heini kandan te Nengazen he kandan he vahin duen te menge pemuhat he pinaaǥi te hapuy. Is pemuhat he para gasa utew heini segradu iring te pemuhat he para idlumpiyu wey te pemuhat he vayad te salà.

Leviticus 6:16 교차 참조

2 Cronica 31:14

Si Kore he anak ni Imnah he Levihanen he vantey ziyà te zapit te edsilaan he gemawan te valey te Nengazen, iyan midseriǥan te kedumala vahin te menge halad he keugelingen he suat is kebeǥaya zuen diyà te Megbevayà. Ketengdanan din is kebpemeǥey ziyà te menge memumuhat wey menge Levihanen te menge azen he impehinungud diyà te Nengazen wey segradu he menge halad.

Exodus 12:8

Dutun he kezukileman, egkeenen niw is usa he tinuug duma te memepait he utanen wey supas he wazè din tapey.

Ezekiel 44:29

Is keenen dan ne ziyà ebpuun te menge pemuhat he para gasa, menge pemuhat he para idlumpiyu, wey menge pemuhat he vayad te salà. Ne is menge azen he mibpeveyveyaan en kedì ne egkehimu zaan he kandan.

Leviticus 2:3

Is egkesamà dutun te herina, ne ǥaked ni Aaron wey te menge kevuwazan din, ne utew heini segradu su zuma heini zuen te pemuhat pinaaǥi te hapuy he impemuhat diyà te Nengazen.

Leviticus 5:13

Pinaaǥi te kebeeli kayi te memumuhat egkevelukasan is etew te minsan hendei zutun he menge salà he neveelan din, ne ebpeseyluwen sikandin te Nengazen. Is egkesamà dutun te pemuhat he herina gaked en te memumuhat, iring te ebeelan duen te pemuhat he para gasa.

Leviticus 6:23

Is langun he menge pemuhat he para gasa zutun te memumuhat kinahanglan he pudu edtutunga; kenà heini egkeenen.

Leviticus 6:26

Is memumuhat he ebpemuhat kayi, kinahanglan he megkaan kayi ziyà te lama te Tulda he Edtelevukaayan, kes segradu he lugar.

Numero 18:8

Ne migkaǥi is Nengazen diyà te ki Aaron te, “Iyan a mismu mibpilì kenikew para iyan ka mekezumala te vuluhaten para te segradu he menge pemuhat he ibpemuhat te menge Israilihanen kayi te kediey. Ibeǥey ku heini kenikew wey ziyà te menge anak nu he keniyu he vahin guntaan wey taman te taman.