Leviticus 4:25 - Manobo Western Bukidnon OT

²⁵ Ne itiyuk te memumuhat is tezù din duen te lengesa te kambing, ne ipalis din haazà duen te menge sungeysungey te menge suyuk duen te pemuhatà te pemuhat he edtutungen. Is egkesamà he lengesa, iitis din diyà te dizalem duen te pemuhatà.

Leviticus 4:25 교차 참조

Exodus 29:12

Ne kuwa ka te lengesa zutun te vaka ne ipalis nu zuen te menge sungeysungey te menge suyuk duen te pemuhatà. Ne sikan is egkesamà he lengesa ivusbus nu zuen te untuzà dutun te pemuhatà.

Isaias 40:21

Wazè kew ve mesayud etawa wazà kew ve mekezineg? Wazè be nenudtul ziyà te keniyu puun te puunà ke mibmenumenu is kedlimbaǥa te kelibutan?

Leviticus 16:18

egawas sikandin duen te Utew Segradu he Lugar ne edhendiyà te pemuhatà he ziyà te ǥemawan te tulda. Ne egkuwa sikandin duen te lengesa zuen te vaka wey kambing he impemuhat ne ibpalis din duen te menge sungeysungey te menge suyuk duen te pemuhatà su wey melumpiyuwi heini.

Leviticus 17:11

Su is untung te linimbag ne ziyà te lengesa zin, ne insuǥù te Nengazen he gemita niw heini para mevelukasi kew puun te menge salè niw, su is lengesa he iyan mibeǥey te untung, iyan ebpekevelukas te etew puun te menge salà.

Leviticus 4:18

Ne pelisi zin te lengesa sikan is menge sungeysungey te menge suyuk duen te pemuhatà diyà te seled te Tulda he zutun is Nengazen. Ne is egkesamà he lengesa ne iitis din diyà te zizalem duen te pemuhatà he pemuhat he edtutungen. Heini he pemuhatà, ne ziyà te uvey te ǥemawan duen te Tulda.

Leviticus 4:24

Pemuhat heini he idlumpiyu kandin. Izampè din is belad din diyà te ulu zutun te kambing, ne lepaa zin haazà diyà te etuvangan te Nengazen, diyà te lugar he lepeey zaan te menge pemuhat he uyaǥen he iyan pemuhat he edtutungen.

Leviticus 4:30

Ne itiyuk te memumuhat is tezù din diyà te lengesa zuen te kambing, ne ipalis din haazà diyà te menge sungeysungey te menge suyuk duen te pemuhatà he pemuhat he edtutungen. Ne is egkesamà he lengesa ne iitis din diyà te zizalem duen te pemuhatà.

Leviticus 4:34

Ne idtiyuk te memumuhat is belad din diyà te lengesa zuen te kerehidu, ne ipalis din heini ziyà te menge sungeysungey te menge suyuk te pemuhatà te pemuhat he edtutungen. Is egkesamà he lengesa id-itis diyà te dizalem duen te pemuhatà.

Leviticus 4:7

Ne ebpelisan din te lengesa sikan is menge sungeysungey te menge suyuk duen te pemuhatà he tutungà te veyewà diyà te seled te Tulda he zutun is Nengazen. Ne sikan is egkesamà he lengesa zuen te vaka ne id-itis din diyà te dizalem duen te pemuhatà he pemuhat he edtutungen. Heini he pemuhatà ne ziyà te uvey te ǥemawan te Tulda.

Leviticus 5:9

Ne ibpirik din is duma he lengesa kayi ziyà te kilid te pemuhatà, ne is egkesamà he lengesa, ne ibpirik din diyà te zizalem te pemuhatà. Iyan heini pemuhat he ebpekelumpiyu te etew.

Leviticus 8:10

Ne migkuwa ni Moises is lana, ne mibpirikan din sikan is Tulda he Ed-ezapan wey is langun he netaǥù kayi. Su idhalad haazà he menge vutang diyà te Nengazen.

Leviticus 8:15

Midlapà ni Moises haazà is baka ne migkuwa sikandin te lengesa kayi. Intiyuk din is tezù din duen te lengesa, ne mibpelisan din sikan is menge sungeysungey te menge suyuk te pemuhatà he iyan kedlumpiyuwi kayi. Ne in-itis dutun is nesamà he lengesa diyà te zizalem duen te pemuhatà. Iyan heini paaǥi te kebpehinunguza zin duen te pemuhatà diyà te Nengazen, su para mehimu heini he ereg he ebpekelibri te mekesesalà.

Leviticus 9:9

Is lengesa kayi mid-uwit te menge anak din diyà te kandin, ne intiyuk din is tezù din dutun te lengesa, ne impirik din heini ziyà te menge sungeysungey te menge suyuk duen te pemuhatà. Is nesamà he lengesa in-itis din diyà te zizalem duen te pemuhatà.