Leviticus 23:3 - Manobo Western Bukidnon OT

³ Duen heenem he andew te kedterebahu niw, piru himeley kew ziyà te ikepitu he andew su iyan heeyan Andew te Kedhimeley. Kenè kew terebahu keniyan he andew, kekena, tiǥum kew para te ked-azap, su andew heeyan he ebeǥayan niw te zengeg is Nengazen.

Leviticus 23:3 교차 참조

Exodus 16:23

Ne migkaǥi si Moises diyà te kandan te, “Midsuǥù is Nengazen he kinahanglan he medhimeley kew keeselem su iyan Andew te Kedhimeley, sevaha he segradu he andew para te Nengazen. Umbe hilutua niw is egkesuatan niw te edhilutù; sevawi niw is egkesuatan niw te edsavew. Ne is egkesamà, ne iteǥana niw para keeselem.”

Exodus 16:29

Tentenuzi niw he mibeǥayan ku sikiyu te Andew te Kedhimeley, umbe kada ikeenem he andew ne edubliyen ku is menge egkekaan niw para te zezuwa he andew. Kinahanglan he is kada sevaha, ne med-ubpà diyà te seled te valey zin emun ikepitu he andew. Wazà medliǥawang te kebpenguwa te egkeenen.”

Exodus 16:30

Umbe, midhimeley haazà is menge etew zutun te ikepitu he andew.

Exodus 23:12

“Terebahu kew seled te heenem he andew, piru himeley kew emun ikepitu en he andew, su para mekehimeley zaan is menge vaka niw wey menge asnu niw, ragkes is menge uripen niw he neetew ziyà te keniyu, wey is kenà menge Israilihanen he zuma niw he meǥinged.

Exodus 34:21

“Terebahu kew seled te heenem he andew, iyan, dutun te ikepitu he andew ne himeley kew, minsan timpu te kebpengeradu wey tiraǥun.

Isaias 56:2

Utew zeysey is etew he ebaal wey edtuman te ebpeveelan ku zutun te Andew te Kedhimeley. Wey zeyzey zaan is etew he wazà mebaal te mezaat.”

Isaias 56:6

“Edtuvazan ku zaan is kenà menge Israilihanen he insarig dan kediey is untung dan su edsilbiyan e zan, ebmahalen e zan, wey ed-ezapen e zan, ne edtumanen dan is menge ibpetuman ku zutun te Andew te Kedhimeley, wey edtumanen dan is kebpekid-uyun ku.

Isaias 58:13

“Kinahanglan he edtumanen niw is menge ebpeveelan ku zutun te Andew te Kedhimeley. Kenè niw veeli is menge vaal he para zà te keugelingen niw he kelipey zutun te segradu he andew. Ikelipey niw is Andew te Kedhimeley, ne pekeveǥata niw heini pinaaǥi te kenà kebpetuyang te egkesuatan niw, wey ked-engked kegkaǥi te menge lalag he wazè din pulus. Emun ebeelan niw heini,

Leviticus 19:3

Kinahanglan he edtehuzen niw is iney niw wey amey niw, wey kinahanglan he tumana niw is ebpeveelan ku keniyu zutun te Andew te Kedhimeley. Iyan a kes Nengazen he Megbevayè niw.