Leviticus 21:9 - Manobo Western Bukidnon OT

⁹ Emun duen niw anak he vahi he ebpeelimungew keniyu tenged te kebelegyè din te zengeg din, ne tenged dutun ed-isipen sikandin he meremerik, kinahanglan he ebinsulan sikandin.

Leviticus 21:9 교차 참조

Genesis 38:24

Hein midlavey en is tetelu he vulan, netudtulan si Juda he is ambey zin he si Tamar ebpemelegyà te zengeg din ne mibmeǥingey en. Umbe migkaǥi si Juda te, “Uwita niw sikandin diyà te ǥawas te inged ne binsuli niw.”

Exodus 31:14

Kinahanglan he edtumanen niw is menge ebpeveelan ku zutun te Andew te Kedhimeley, su segradu heini he andew. Is minsan hentei he kenà edsunud te ibpetuman ku mehitenged keniyan he andew, kinahanglan he edhimetayan. Is minsan hentei he edterebahu keniyan he andew, ne kenè niw en isipa he zuma niw.

Isaias 33:14

Mibpengerker tenged te kekahandek is menge mekesasalà diyà te Zion. Egkaǥi sikandan te, “Is Megbevayà, iring te edriyubriyub he hapuy he kenà egkeuvukan. Hentei man kenitew is ebpekeubpà diyà te etuvangan te Megbevayà?”

Ezekiel 9:6

Penhimetayi niw is menge meǥurang, menge vetan-en he menge maama wey menge vahi, menge iney, menge vatà, piru kenè niw kevuta is duen dan menge marka. Diyè kew puun te valey ku.” Umbe midhuna zan penhimetayi is menge pengulu he ziyà te egkesineruwan duen te valey te Nengazen.

Leviticus 19:29

Kenè niw peel-elezi is menge anak niw he vahi pinaaǥi te kebpeǥesa niw kandan te kebelegyà te zengeg dan, su ebpekeiniyat heini, ne utew ebmahabet diyà te lugar niw is ed-ulaula kayi.

Leviticus 20:14

Emun ed-esewaan te maama is iney wey anak, kinahanglan he ebinsulan sikandan is tetelu, su mezaat is mibeelan dan. Kenà ereg he ebpedayun heini he kelelalung diyà te keniyu.

Malakias 2:3

“Tenged keniyu ebmensuwen ku is menge kevuwazan niw. Idapug ku keniyu is binusbus te menge ibpemuhat niw, ne idtimbag ku sikiyu zuma kayi.

Deuteronomio 22:21

ne ed-uwiten haazà is bahi diyà te etuvangan te valey te amey zin ne edtulengen sikandin te vatu te menge maama zutun te inged taman te kebpatey zin. Su mekeeled-eled he vaal is mibeelan din diyà te Israel pinaaǥi te kebpehilavet dutun te ziyè pa sikandin ed-ubpà te valey te amey zin. Kinahanglan he id-awè niw heini he mezaat he vaal ziyà te keniyu.

Josue 7:15

Is etew he idtezù ku he mid-eles duen te menge vutang he impurung ipemuhat kayi te kedì edtutungen duma te pemilya zin wey te langun he menge azen din. Su midrapas din is kebpekid-uyun ku, ne mibaal sikandin te mekeeled-eled he vaal kayi te Israel.”

Josue 7:25

Migkaǥi si Josue ziyà te ki Acan te, “Maan is mid-uwit ka te samuk kayi te kenami? Umbe edsilutan ka ǥuntaan te Nengazen.” Ne zutun mibpenuleng te vatu te menge Israilihanen si Acan taman te kebpatey zin. Ne mibpenuleng dan daan te vatu is pemilya zin ne mibinsulan dan is menge azen din.

1 Samuel 2:17

Utew heini zekelà he salà he nehimu te menge anak ni Eli he naahà te Nengazen diyà te kandan, su wazè dan tehuza is pemuhat para te Nengazen.

1 Samuel 2:34

Ne para metuusi nu he egkeulaula heini is migkaǥi ku, ebpatey is dezuwa he anak nu he si Hofni wey si Finehas te senge andew zà.