he keǥiyi zin is menge Israilihanen: “Kinahanglan he edtumanen niw is menge ebpeveelan ku zutun te Andew te Kedhimeley, su iyan heini taman te taman he tuus diyà te pid-elangan tew he ebpetanudtanud keniyu he siak is Nengazen midhimu ku sikiyu he menge etew ku.
Impetuman ku zaan kandan is Andew te Kedhimeley he tuus te paaǥi te kedepitè dey. Ebpetanudtanud heini kandan he iyan a, is Nengazen mibpilì kandan wey zan mehimu he menge etew ku.
Ne emun kenè en egkaawà haazà is baley ku te wazà pidtemanan, egketuenan te menge etew ziyà te menge nasyun he iyan a, is Nengazen, mibpilì te menge Israilihanen su wey mehimu he kediey.’ ”
Tumana niw is menge sulunuzen he ibpesunud ku. Kenè niw pepeniwelayi is sevaha he uyaǥen te selakew en he kelasi te uyaǥen. Kenè kew pemula te zezuwa he kelasi te venì diyà te sevaha zà he pemuleey. Kenè kew sul-ub te sevaha he visti he zezuwa he kelasi te manggad.
Kinahanglan he segradu is ked-isipa keniyu te zuma niw he menge Israilihanen su iyan kew ebpemuhat te menge pemuhat kayi te kediey, te Nengazen, he waǥas, ne edhimuwen ku is menge etew ku he wazà igkesewayi.
