Josue 8:33 - Manobo Western Bukidnon OT

³³ Is langun he menge Israilihanen, duma te menge pengulu zan, menge upisyal, wey is menge zatù ragkes is kenà menge Israilihanen he zuma zan he meǥinged midhitindeg he ebpesinsineruwà. Ne ziyà medhitindeg te teliwazè dan is menge memumuhat (he menge kevuwazan ni Aaron) he mibinting duen te Kavan te Kebpekid-uyun kandan te Nengazen. Is ketengà kayi te menge etew, ne ed-iniyuǥan dan is Buntud he Gerizim ne is sevaha he ketengà, ne ed-iniyuǥan dan is Buntud he Ebal. Si Moises he suluǥuen te Nengazen is midsuǥù kandan te kebaal kayi emun egkeume en is timpu te kedewata zan te kebpenubtuvazi kandan.

Josue 8:33 교차 참조

Exodus 12:49

Is belaud he para keniyu te menge Israilihanen ne iyan ded belaud he para te kenà menge Israilihanen he mid-ubpà duma keniyu.”

Leviticus 24:22

Heini he velaud ne para keniyu te langun, he tutuu he Israilihanen etawa kenà. Iyan a kes Nengazen he Megbevayè niw.”

Numero 15:15

Sikiyu is menge Israilihanen wey kenà menge Israilihanen he mid-ubpà duma keniyu ne neked-iring dà kayi te etuvangan ku, ne neked-iring dà he kesuǥuan is edtumanen niw. Heini he sulunuzen kinahanglan he tumana niw taman te huziyan he lapis te menge kevuwazan.

Numero 15:16

Uya, neked-iring dà he menge suǥù wey menge sulunuzen is kinahanglan he edtumanen niw te menge Israilihanen wey is kenà menge Israilihanen he mid-ubpà duma keniyu.”

Numero 15:29

Neked-iring dà is sulunuzen he para zuen te nekesalà he wazè din tivevaa, Israilihanen man etawa kenà Israilihanen he emurè niw te inged.

Deuteronomio 11:29

Emun ed-uwiten kew en te Nengazen he Megbevayè niw zutun te tanà he ed-engkenen niw, ne ipahayag niw is tuvad te Nengazen dutun te Buntud he Gerizim tenged te kedtuman niw, ne ipahayag niw zaan is rawak din dutun te Buntud he Ebal tenged te kenè niw kedtuman.

Deuteronomio 31:12

Tiǥuma niw is menge etew: menge maama, menge vahi, menge vatà, wey is kenà menge Israilihanen he zuma niw he meǥinged su para mekepemineg sikandan su wey zan mekeistudyu te kedtahud te Nengazen he Megbevayè niw ne wey zan mapurungi te edtuman is langun he ibpetuman kayi he menge suǥù.

Deuteronomio 31:25

ne mibmenduan din is menge Levihanen he iyan kes ed-uwit duen te Kavan te Kebpekid-uyun te Nengazen. Migkaǥi sikandin te,

Deuteronomio 31:9

Insurat ni Moises heini he menge suǥù ne imbeǥey zin diyà te menge memumuhat he menge kevuwazan ni Levi, he iyan ed-uwit duen te Kavan te Kebpekid-uyun te Nengazen, wey ziyà te langun he ebpemendumala te Israel.

Josue 23:2

umbe impetawag din is langun he menge etew te Israel: is menge ebpemendumala, is menge pengulu, is menge zatù, wey is menge upisyal, ne ke sikandin diyà te kandan te, “Utew ad meǥurang.

Josue 24:1

Ne zutun midtiǥum ni Josue is langun he tribu te Israel ziyà te Shekem. Ne mid-umew zin is ebpemendumala, menge pengulu, menge zatù, wey menge upisyal te Israel, ne mid-uvey zan diyà te etuvangan te Megbevayà.

Josue 3:14

Timpu haazà te tiraǥun ne midalem haazà is wahig. Ne mid-awà is menge etew zuen te kampu zan su edlayun dan en duen te wahig. Ne iyan midhuna sikan is menge memumuhat he ebinting duen te Kavan te Kebpekid-uyun. Ne kebpekeǥiek duen te menge memumuhat duen te wahig,

Josue 3:3

ne mibmenduan dan is menge etew te, “Emun egkeehè niw en he ebintingen en te menge memumuhat he menge kevuwazan ni Levi sikan is Kavan te Kebpekid-uyun te Nengazen he Megbevayè niw, ne tundug kew en kandan,

Josue 3:6

Ne migkeǥiyan daan ni Josue is menge memumuhat te, “Uwita niw en is Kavan te Kebpekid-uyun ne huna kew zutun te menge etew.” Ne midtuman dan haazà is migkaǥi ni Josue.

Josue 4:10

Wazà med-engked he edhitindeg diyà te teliwazà duen te wahig is menge memumuhat taman te netuman te menge etew is langun he insuǥù te Nengazen ki Josue, he iyan ded sikan is insuǥù ni Moises ki Josue. Migaanggaan medlayun is menge etew.

Josue 4:18

Ne hein nekeǥawas en sikan is menge memumuhat he ebinting duen te Kavan te Kebpekid-uyun te Nengazen, ne mid-uman en medalem haazà is wahig iring hein aney zan mekeuma kayi.

Josue 6:6

Umbe, mid-umew ni Josue is menge memumuhat ne migkeǥiyan din te, “Uwita niw is Kavan te Kebpekid-uyun. Ne medhuna is pitu keniyu he ed-uwit te tigselimbaha he vudyung.”