Jeremias 50:29 - Manobo Western Bukidnon OT

²⁹ “Ipesurung niw te menge mememanà is Babilonia! Peliǥuwi niw para wazà ebpekepelaǥuy. Belesi niw sikandin sumalà te mibeelan din. Beeli niw ziyà te kandin is mibeelan din diyà te zuma, su midsukulan din is Nengazen, kes Waǥas he Megbevayà te Israel.

Jeremias 50:29 교차 참조

Exodus 10:3

Ne midhendiyà si Moises wey si Aaron te hadì ne migkeǥiyan dan sikandin te, “Iyan heini migkaǥi te Nengazen he iyan Megbevayà te menge Hebriyuhanen, ‘Sengemenu kun is keluǥayad te kebpelavew nu ziyà te etuvangan ku? Tuǥuti nu te kegenat is menge etew ku su wey zan mekaazap kedì.

Isaias 37:23

Hentei is mid-insultuwan nu wey edwelwelien? Hentei is midhenggeran nu wey mibpehembuǥan? Kenè be iyan a is Waǥas he Megbevayà te Israel?

Isaias 47:10

Minsan lalung ka ne kunaan nu ke wazà ebpekezezaat kenikew su wazà nekaahà kenikew zutun te kedlalunglalung nu. Is ketau wey keuluwanen nu iyan neketazin kenikew, wey midsuǥù kenikew te kegkaǥi te, ‘Iyan a Megbevayà, ne wazè en duma gawas kediey.’

Jeremias 25:14

Egkeuripen sikandan te mahabet he menge nasyun wey te mekeǥeǥehem he menge hadì. Edsilutan ku sikandan te sungkad te menge vaal zan.”

Jeremias 48:26

“Lenguta is Moab, su nekidsukulà kediey. Egkelilid sikandin diyà te keugelingen din he utà ne egkehimu he egkeengitan.

Jeremias 49:16

Midlimbungan kew te galbu niw wey te kedtuu niw he egkahandek keniyu is duma he menge nasyun. Mibpahambug kew he ziyè kew ed-ubpà te vetuwen he metikang he lugar. Piru minsan idrepeng niw pa is ketikang te ubpeey niw te ketikang te impisà te kulaǥu, edezeetan ku ǥihapun sikiyu.”

Jeremias 50:24

“Ne Babilonia, midlitaǥan ku sikew ne wazè ka meketukew he nelitaǥan ke en. Nezekepan ka su nekigkuntada ka kediey.

Jeremias 50:26

“Sikiyu is menge kuntada te menge tig-Babilonia he ebpuun diyà te meziyù he lugar, surung kew ziyà te Babilonia! Puwasi niw is menge budiga kayi. Itambù niw is menge azen he egkaaǥew niw he iring te edtambù kew te trigu. Purungi niw dezeeti is menge tig-Babilonia ne kenè niw en semai.

Jeremias 50:32

Sikew is gelbuwen he nasyun utew ka egkezeeti, ne wazà ebpekeuǥup te ked-enew kenikew. Ebinsulan ku is dezekelà he menge inged nu wey is malù dezekelà diyà te peliǥuy kayi.’ ”

Jeremias 50:9

Su ibpesurung ku is Babilonia te menge sundaru he gurupu he ebpuun diyà te gemhanan he menge nasyun diyà te zizaya. Edsurung dan diyà te Babilonia ne egkaaǥew zan heini. Metau utew sikandan he menge mememanà ne kenà ebperis is kebpanè dan.

Jeremias 51:24

“Sikiyu is menge etew ku, ibpeehè ku keniyu is kebelesi ku te Babilonia wey te menge meǥinged kayi he lugar, tenged te langun he mibeelan dan diyà te Jerusalem. Iyan a, is Nengazen, is migkaǥi kayi.

Jeremias 51:3

Kenè dan en ebeǥayan te timpu is menge mememanà diyà te Babilonia te kegamit te menge panè dan wey menge kelasag dan. Ne wazà edsemaan dan he vetan-en he maama. Ebpurungan dan edezeeti is menge sundaru ziyà te Babilonia.

Jeremias 51:49

“Kinahanglan he edezeetan is Babilonia tenged te kebpenhimetayi zin te menge Israilihanen wey zuma pa he menge etew kayi te kelibutan.”

Jeremias 51:56

Ebpekeuma is edezaat te Babilonia ne ebihaǥen is menge sundaru zin, ne egkengevadtì is menge panè dan. Su siak, is Nengazen, iyan Megbevayà he edsilut te menge lalung. Idsilut ku ziyà te Babilonia is silut he ereg kayi.

Penhulùhulù 1:9

Is keremerik din naahà te langun. Wazè din isipa zengan is egkehitavù kandin. Utew sikandin nezeeti, ne wazà midtavang kandin. Umbe migkaǥi sikandin te, “He Nengazen, seǥipaa nu is kegkerasey ku, su nezaag a te kuntada.”

Penhulùhulù 3:64

Siluti nu sikandan, Nengazen, sumalà te mibeelan dan.

Daniel 11:36

“Ebeelan duen te hadì diyà te zizaya is minsan hengkey he egkesuatan din te ebaal. Ed-isipen din he iyan sikandin lavew te langun he ebpen-ezapen, ne edsumpeliten din is Megbevayà he iyan lavew te langun he ebpen-ezapen. Ebmelempusen sikandin taman dà te timpu te kebpezayaǥa te Megbevayà te pauk din, ne egkeulaula heini su kinahanglan he egkengehitavù is imbanglis te Megbevayà is kegkeul-ulaha zuen.

Daniel 4:37

Umbe, ǥuntaan edeliǥen ku wey ebeǥayan ku te zengeg is hadì diyà te langit, su hustu wey metazeng is langun he menge vaal zin ne ibpekevavè din is minsan hentei he ebpelavew.”

Daniel 5:23

mid-isip nu he lavew ka te Nengazen diyà te langit. Impekuwa nu is menge inumà he puun diyà te valey te Megbevayà ne mid-inuman nu heini zuma te menge meǥeliyug nu he memetikang is ked-etew, menge esawa nu he lavew, wey is menge esawa nu he kenè lavew. Ne liyu keniyan, mid-azap nu is menge ledawan he ed-ezapen he pelata, bulawan, brunsi, putew, kayu, wey vatu–menge ed-ezapen he kenà ebpekaahà, kenà ebpekezineg, wey kenà ebpekesavut. Piru wazè nu mulà deliǥa is Megbevayà he iyan migawed te untung nu wey iyan ebayàbayà ke hengkey is egketemanan nu.

Obadias 1:15

“Wazè niw pezem beeli haazà diyà te Jerusalem su egkeuvayan en is timpu te kedhukumi ku te menge nasyun. Ne ke hengkey is mibeelan niw ziyà te zuma ne iyan daan ebeelan diyà te keniyu. Is kebpekid-uyun niw te zuma ne iyan daan ibales keniyu.