Jeremias 50:26 - Manobo Western Bukidnon OT

²⁶ “Sikiyu is menge kuntada te menge tig-Babilonia he ebpuun diyà te meziyù he lugar, surung kew ziyà te Babilonia! Puwasi niw is menge budiga kayi. Itambù niw is menge azen he egkaaǥew niw he iring te edtambù kew te trigu. Purungi niw dezeeti is menge tig-Babilonia ne kenè niw en semai.

Jeremias 50:26 교차 참조

Isaias 10:6

Edsuǥuen ku is menge tig-Asiria te kedsurung te egkeepesan ku he nasyun. Heini is nasyun, kenà sikandan edsunud kedì te Megbevayè dan. Heini sikandan, edezeetan ku iring te vasak diyà te kersada he edtekutakan, wey mepenguwa te menge tig-Asiria is langun he menge azen dan.”

Isaias 14:23

Edhimuwen ku heini he sibsivayan he mahabet is menge linew zuen. Edezeetan ku heini, ne is kedezeeti ku kayi, iring te ebpeyupasen ku is menge meǥinged kayi. Iyan a, is Nengazen he Mekeǥeǥehem, migkaǥi kayi.”

Isaias 25:10

Benar iyan, edtevangan te Nengazen is menge etew ziyà te Buvungan he Zion, ne edsilutan din mulà is menge tig-Moab. Edtekutakan din sikandan iring te kedtekutaki te reǥami ne ebpesegdanen en he meredak.

Isaias 45:3

Ibeǥey ku kenikew is nekeeles he menge ketiǥeyunan, su wey nu metueni he iyan a, is Nengazen he Megbevayà te Israel midtawag kenikew.

Isaias 5:26

Ed-uyawan din is menge nasyun diyà te meziyù; egkulehian din te ked-umew is menge meǥinged diyà te utew meziyù he vahin te kelibutan, ne segugunà sikandan ebpekeuma is edsurung keniyu.

Jeremias 50:10

Ed-eǥawen dan is menge azen diyà te Babilonia, ne egkuwaan dan is egkesuatan dan te egkuwa. Iyan a, is Nengazen, is migkaǥi kayi.

Jeremias 50:13

Tenged te pauk ku wazè en ebpekeubpà diyà te Babilonia ne egkehimu heini he mekevulungbulung he lugar. Is langun he edsaǥad kayi ne ebpekepenerektek dan tenged te langun he egkehitavù kayi he nasyun.

Jeremias 50:15

Kulahì kew en te egkezineg minsan hendei! Ahàa niw man! Midsurindir en is Babilonia! Nengerundus en is menge turi zin ne nengewaǥey en is menge verengbeng din. Ne penimales heini te Nengazen kandin. Umbe velesi niw sikandin ne veeli niw ziyà te kandin is mibeelan din diyà te zuma.

Jeremias 50:23

Is Babilonia neiring te masu he edrupet te menge nasyun piru ǥuntaan nerupet en heini. Nahandek is langun he menge nasyun te nehitavù kayi!

Jeremias 50:41

“Tengteng kew! Duen menge sundaru he ebpekeuma he ebpemuun diyà te tanà he zizaya. Sevaha he mekeǥeǥehem he nasyun ne mahabet he menge hadì he ebpuun diyà te meziyù he lugar is nengandam te kebpekidtebek te Babilonia.

Jeremias 51:44

Edsilutan ku si Bel is ed-ezapen diyà te Babilonia. Ibpeutè ku kandin is mibpen-eveleng din. Kenè en ebpekeuma is mahabet he menge etew he ebpuun diyà te menge nasyun he ed-azap kandin. Ne egkengetempag is berengbeng te Babilonia.

Jeremias 51:64

Ne kaǥi ka te, ‘Iring keniyan is egkeulaula te Babilonia–idlegdang heini ne kenè en ebpekelepew tenged te kedezeeti kayi te Nengazen. Egkeǥerà is menge etew kayi.’ ” Kayi mepasad is menge lalag ni Jeremias.

Micas 7:10

Egkaahà heini te menge kuntada tew ne egkepeel-elezan sikandan. Su hein aney ne edsudien kiw zan he ke sikandin te, ‘Hendei en is Nengazen he Megbevayè niw?’ Kenà egkeuǥet egkeehè tew is kegkezeeti zan. Egkeiring sikandan te vasak diyà te kersada he edtekutakan.”