Jeremias 50:14 - Manobo Western Bukidnon OT

¹⁴ “Sikiyu is menge mememanà, pelastar kew en diyà te peliǥuy te Babilonia. Ne iamin niw ipanà is menge vesut niw ziyà te kandin su nekesalà sikandin diyà te Nengazen.

Jeremias 50:14 교차 참조

2 Samuel 10:9

Hein naahà ni Joab haazà is menge kuntada zan diyà te egkesineruwan dan wey ziyà te egkeiniyuǥan dan, mibpilì din is utew menge metau he sundaru te Israel ne iyan en sikandin mibpengulu te kebpekidtebek te menge Aramihanen.

Salmo 51:4

Diyè e zà te kenikew mekesalà. Mibeelan ku is menge vaal he mid-isip nu he mezaat. Umbe hustu is menge lalag nu he ebpekesuǥat kedì. Utew hustu is kedhukumi nu kediey.

Isaias 13:4

Pemineǥa niw is keǥurub diyà te menge vuvungan te utew mahabet he menge etew. Pemineǥa niw is keǥurub diyà te menge ginhedian wey menge nasyun he edtiǥum. Edtiǥumen te Nengazen he Mekeǥeǥehem is menge sundaru zin he para te tebek.

Isaias 5:28

Merewidit is basut te menge panè dan ne naandam en is menge panè dan. Is sulu te menge kudè dan iring te utew mezesen he vatu, henduen be te eribpures is kegketileng te ligid te menge kerwahi zan.

Jeremias 46:9

“Sigi en, menge tig-Ehipto, ipepelelaǥuy niw en is menge kudè niw wey menge kerwahi! Surung kew en ragkes is langun he kezapig niw he ebpemuun diyà te Etiopia, Libya, wey Lydia, he menge mahagtì he egamit te kelasag wey panà.

Jeremias 49:14

Nezineg ku is tudtul he ebpuun diyà te Nengazen, he midsuǥù kun sikandin te menge menunudtulà pehendiyà te menge nasyun su wey zan metudtuli he mebpengandam dan para te tebek, wey edhinggaten din sikandan he medsurung dan diyà te nasyun he Edom.

Jeremias 49:35

Migkaǥi is Nengazen he Mekeǥeǥehem te, “Ebpenhimetayan ku is menge mememanà diyà te Elam he memetau he menge sundaru zan.

Jeremias 50:11

“Sikiyu is menge etew ziyà te Babilonia mid-eǥawan niw te menge azen is menge etew he ǥaked ku. Midlipey kew wey miguǥusà he iring te mid-elimahan he dumeraǥa he vaka ziyà te penebtavà wey kudà he edherìhì.

Jeremias 50:29

“Ipesurung niw te menge mememanà is Babilonia! Peliǥuwi niw para wazà ebpekepelaǥuy. Belesi niw sikandin sumalà te mibeelan din. Beeli niw ziyà te kandin is mibeelan din diyà te zuma, su midsukulan din is Nengazen, kes Waǥas he Megbevayà te Israel.

Jeremias 50:42

Neǥumeenan sikandan te menge panà wey menge vangkew. Mesipala sikandan ne wazè dan hizu. Emun ed-untud sikandan te menge kudè dan ne iring is keǥurub dan te keǥurub te dezekelà he menge vaǥel ziyà te zaǥat. Ebpekeuma sikandan is andam en he edsurung keniyu te menge meǥinged diyà te Babilonia.

Jeremias 50:7

Edsurungen sikandan te ebpekaahà kandan. Egkaǥi is menge kuntada zan te, ‘Nekesalè dan diyà te Nengazen he iyan tutuu he eputè dan wey egkeperateng te menge kepuun dan, umbe wazè tew televaken emun edsurungen tew sikandan.’

Jeremias 50:9

Su ibpesurung ku is Babilonia te menge sundaru he gurupu he ebpuun diyà te gemhanan he menge nasyun diyà te zizaya. Edsurung dan diyà te Babilonia ne egkaaǥew zan heini. Metau utew sikandan he menge mememanà ne kenà ebperis is kebpanè dan.

Jeremias 51:2

Edsuǥuen ku is menge lumelengyawà te kedsurung wey kedezaat te Babilonia su wey mehimu heini he iring te ukap he idlayap te keramag. Edsurungen dan is Babilonia ziyà te minsan hendei zutun te timpu te kezeetan.

Jeremias 51:27

Ivayew niw is bendirà he tuus te kebpekidtebek! Ipezaǥing is menge vudyung diyà te menge nasyun! Ipepengandam niw sikandan para te kedsurung diyà te Babilonia. Suǥùa niw te kedsurung is menge sundaru ziyà te Ararat, Mini, wey Ashkenaz. Pilì kew te pengulu wey peuwit kew te menge kudà he iring kezakel te terapan.

Jeremias 51:3

Kenè dan en ebeǥayan te timpu is menge mememanà diyà te Babilonia te kegamit te menge panè dan wey menge kelasag dan. Ne wazà edsemaan dan he vetan-en he maama. Ebpurungan dan edezeeti is menge sundaru ziyà te Babilonia.

Habakuk 2:17

Mibpemiley niw is menge kayu ziyà te Lebanon, ne midhimetayan niw is menge langgam duen. Umbe edezeetan kew zaan ne egkerkeren kew te kegkahandek. Egkehitavù heini keniyu tenged te kebpenhimatey niw te menge etew wey kebpendezaat niw te menge tanè dan wey menge inged dan.

Habakuk 2:8

Tenged te mahabet he menge nasyun is mid-eǥawan niw te menge azen, ne iyan kew en maan ed-eǥawan te menge etew he nesamà keniyan he menge nasyun. Egkehitavù heini keniyu tenged te kebpenhimatey niw te menge etew wey kebpendezeeti niw te menge tanè dan wey menge inged dan.

1 Samuel 17:20

Umbe, zutun te sunud he andew midsayu med-enew si David, ne mid-andam te egkeenen he ed-uwiten din. Ne impeventayan din is menge kerehidu zin duen te sevaha he bekidu, ne migenat sikandin sumalà te migkaǥi kandin te amey zin. Ne hein nekeuma sikandin diyà te kampu te menge Israilihanen, nenggawas is menge sundaru he ebpemengulahì te kulehian te ebpekidtebek.