Jeremias 49:23 - Manobo Western Bukidnon OT

²³ Iyan heini menge lalag mehitenged te Damascus: “Netingkemed is menge tig-Hamat wey menge tig-Arpad te mezaat he tudtul he nezineg dan. Neliveǥan sikandan wey kenà ebpekehulenà is ked-isip-isip dan; neiring dan te ebpemaǥel he zaǥat.

Jeremias 49:23 교차 참조

Genesis 14:15

Ne hein mezukilem, mibahin ni Abram te dezuwa he grupu is menge sundaru zin. Ne zutun midsurung dan is menge kuntada zan, ne nezaag dan heini. Ne haazà is menge kuntada zan ne mibpemelaǥuy midal-as eni Abram taman te inged he Hoba, he ziyà te zapit te egkezizaya te inged he Damascus.

Genesis 15:2

Ne midtavak dutun si Abram te, “Sikew is Nengazen he Megbevayà, wazà igkeveǥey nu kediey he ibmeupiya te ǥehinawa ku su kenè bes egkehimu he egkevuwad a, ne iyan ebpekepengevilin te menge azen ku si Eliezer he tig-Damascus.”

2 Samuel 17:10

Ne minsan is pinekemevurut he sundaru nu, he henduen te mevurut he erimaung, egkahandek. Su netuenan te langun he Israilihanen he is amey nu ne utew nelayam he ebpekidtebek wey mevurut is menge sakup din.

2 Samuel 8:9

Ne netuenan heini ni Hadì Tou he hadì te Hamat he nezaag ni David is langun he sundaru ni Hadadezer.

1 Hadì 11:24

ne nehimu sikandin he pengulu te menge ribildi he midtiǥum din. Hein nezaag ni David is menge sundaru ni Hadadezer, midhendiyà si Rezon te Damascus duma te menge etew zin. Midsakup dan heini he lugar ne zutun dan med-ubpà.

2 Hadì 17:24

Duen menge etew he midsuǥù te hadì diyà te Asiria he medhendiyè dan te Samaria. Ebpemuun sikandan diyà te Babilonia, Cut, Ava, Hamat, wey Sefarvaim, ne impeubpè din sikandan diyà te menge inged diyà te Samaria he liwan te menge tig-Israel. Umbe midsakup dan is Samaria wey is duma pa he menge inged diyà te Israel.

2 Hadì 18:34

Duen be nehimu te menge ed-ezapen diyà te Hamat, Arpad, Sefarvaim, Hena, wey Iva? Nelibri ve te menge ed-ezapen diyà te Samaria is tanè dan puun te gehem ku? Wazà daan!

2 Hadì 19:13

Duen be nehimu te menge hadì diyà te Hamat, Arpad, Sefarvaim, Hena, wey Iva?”

2 Hadì 5:12

Kenè be meupiya pa is wahig diyà te Abana wey Farfar ziyà te Damascus kenà te zuma he menge wahig kayi te Israel? Kenè be ziyè e zà mebpenhugas para meulii a?” Umbe migenat sikandin he utew egkepauk.

2 Cronica 16:2

Ne mibpenguwa ni Asa sikan is menge brunsi wey menge vulawan diyà te valey te Nengazen wey ziyà te turuǥan din. Ne imbeǥey zin heini ki Hadì Ben Hadad he hadì te Aram diyà te Damascus he iyan ed-ubpaan ni Ben Hadad. Iyan heini menge lalag ni Asa ki Ben Hadad:

Exodus 15:15

Is menge pengulu te Edom wey Moab, egkeheratan utew te kegkahandek, ne is pengulu ziyà te Canaan, ne edliyasen te kegkahandek.

Isaias 10:9

Wazà mibizahayan te Carkemish te Calno, wey Arpad te Hamat, wey is Damascus te Samaria? Neked-iiring dà heini he menge inged su pudu ku naaǥew.

Isaias 11:11

Dutun daan he timpu, ed-umanan egemita te Nengazen is gehem din te kebpeulì te nesamà he menge etew zin diyà te Asiria, Ehipto, Patros, Etiopia, Elam. Babilonia, Hamat, wey is diyà te menge pulu.

Isaias 13:7

Dutun he timpu eguyaan is langun he menge velad. Egkaawà is kevurut te langun he menge etew.

Isaias 36:19

Duen be nehimu te menge ed-ezapen diyà te Hamat, Arpad, wey Sefarvaim? Nelibri ve te menge ed-ezapen diyà te Samaria is tanè dan puun te gehem ku? Wazà daan!

Isaias 37:13

Duen be nehimu te menge hadì diyà te Hamat, Arpad, Sefarvaim, Hena, wey Iva?”

Isaias 57:20

Piru is menge lalung, ne wazè dan kelinew; iring sikandan te ebpemaǥel he zaǥat he edtampil te menge sagbet wey menge meremerik diyà te veyvey.

Isaias 7:8

Su is Damascus iyan dà kepital te Aram, ne si Rezin, diyè dà sikandin midhadì te Damascus. Ne is Samaria iyan dà kepital te Israel, ne si Peka he anak ni Remalia ziyè dà sikandin midhadì te Samaria. Egkezeeten is Israel seled te 65 he tuig, umbe kenè ne heini egketawag he sevaha he nasyun. Emun kenà melig-en is kedtuu niw ne egkezeetan kew iyan.’ ”

Jeremias 39:5

Piru midal-as sikandan te menge sundaru te Babilonia, ne ziyè dan mesaut te menge suǥud diyà te Jerico. Midakep dan si Zedekia ne mid-uwit dan diyà te ki Hadì Nebucadnezar ziyà te Ribla he sakup te Hamat, ne zutun midhukuman sikandin ni Hadì Nebucadnezar.

Ezekiel 27:18

“ ‘Mibpetiǥayun daan diyà te kenikew is tig-Damascus su mahabet is ketiǥeyunan nu wey menge pruduktu. Is inliwè dan te velegyè nu binu he ebpuun diyà te Helbon wey welin he ebpuun diyà te Zahar.

Amos 6:2

Egkeǥiyan niw is menge sakup niw te, “Ahaa niw is inged he Calne, wey is dekelà he inged he Hamat, wey is inged he Gat he sakup te Filistia. Hengkey, edhuna ve sikandan he mekeǥeǥehem te ginhedian te Juda wey Israel? Kenà. Edhuna ve he meluag is tanè dan te kenitew? Kenà daan.”

Nahum 2:10

Egkezeetan, egkeǥevà, egkevengkag en is Nineve! Umbe egkulbaan en is menge meǥinged kayi; egkerkeren is tivuuk he lawa zan, egkerkeren is menge vuel zan, ne ebmemeluntak sikandan.

Numero 13:21

Umbe, midhipanew sikandan ne midsusi zan haazà is tanà puun te sibsivayan he Zin pehendiyà te Rehob he uvey te Lebo Hamat.

Deuteronomio 20:8

“Ne megkaǥi pa is menge upisyal te, ‘Emun duen keniyu egkahandek etawa egkulbaan, ne med-ulì sikandin su kela ke elin kulbai is menge zuma zin.’

Josue 14:8

Piru mibpelihandek te menge zuma ku is menge etew. Piru siak, metinumanen a te kedsunud te Nengazen he Megbevayè ku.

Josue 2:11

Nengahandek key hein nezineg dey haazà ne naawà is kevurut te kada sevaha kenami tenged keniyu. Su is Nengazen he Megbevayè niw iyan Megbevayà diyà te langit wey zini te tanà.