Is etew he ed-un-undahan din is menge pubri, iyan din egkesudì is Megbevayà su iyan man midlimbag kandan, ne is igkesuat din is kegkehitevua te mezaat diyà te sengeetew, siguradu edsilutan sikandin.
Migkaǥi kayi te kedì is Nengazen he Megbevayà te Israel te, “Kuwaa nu ziyà te velad ku is tasa he nepenù te pauk ku, ne ipeinum nu te menge etew ziyà te langun he menge nasyun he zutun ku sikew suǥùa.
Su zuma a keniyu ne edlibriyen ku sikiyu. Ebpurungan ku edezeeti is menge nasyun he zutun kew ipeyapat. Piru kenè ku mulà heini ed-ul-uluhan diyà te keniyu. Piru kenà heini ebpesavut he kenè ku sikiyu edsilutan. Ebmensuwen ku sikiyu te hustu he paaǥi.”
“Piru sikiyu is menge Israilihanen he menge kevuwazan te suluǥuen ku he si Jacob, kenè kew luyahi wey mahandek su edlibriyen ku sikiyu puun diyà te meziyù he lugar he zutun kew vihaǥa. Ed-uman kew ebpengungubpaan he melinawen wey wazà kezeetan, ne wazè en ebpelihandek keniyu.
Iring te midsilutan is menge etew ku ziyà te segradu he vuntud ku, ne edsiguduwan daan edsiluti is langun he menge nasyun. Ebpurungan ku sikandan edsiluti taman te egkengahanew sikandan.”
