Jeremias 48:37 - Manobo Western Bukidnon OT

³⁷ Is kada sevaha kandan mibpaahà te kegkeseeng din pinaaǥi te kebpevangul, kegkiskis te sumpà, kebpemelìi te velad, wey kebivisti te saku.

Jeremias 48:37 교차 참조

Genesis 37:29

Ne hein midlikuan ni Reuben haazà is budsi ne wazè en dutun si Jose, ne mibindas din is bisti zin su utew neseeng.

Genesis 37:34

Ne mibindas ni Jacob is bisti zin ne mibivisti te saku he tuus te kegkeseeng din. Neuǥet is kedlalew zin te anak din.

1 Hadì 18:28

Umbe, midsigudu en sikandan megkulahì ne mibpemelian dan en is menge lawa zan te ubpit wey ispada, su iyan haazà neleyaman dan te ebaal, ne nenuravid en is lengesa zan.

1 Hadì 21:27

Kegkezineǥa ni Ahab dutun te migkaǥi ni Elias, mibindas din is bisti zin ne mibivisti te saku, ne mibpuasa. Midlipezeng sikandin he bivisti te saku wey midhiphipanew is neseeng.

2 Hadì 6:30

Ne hein nezineg dutun te hadì haazà is migkaǥi zutun te vahi, mibindas din is bisti zin tenged te utew zin kegkeseeng. Dutun te kedhipanew zin diyà te zivavew te verengbeng, naahà sikandin te menge etew he mibpezizeleman din is bisti zin te visti he saku tenged te kedlalew zin.

1 Cronica 19:4

Ne zutun impezakep ni Hanun is menge sakup ni David ne migkiskisan is menge sumpè dan. Impetavas din daan is menge kumbalè dan puun te hawak pehendiyà te dizalem ne human ipeulì sikandan.

Isaias 20:2

Dutun te wazè pa heini mehitavù ne migkaǥi is Nengazen diyà te ki Isaias he anak ni Amoz te, “Luwasa nu is bisti nu he saku wey pul-uta nu is sendalyas nu.” Midtuman heini ni Isaias, ne midhiphipanew sikandin is wazà bisti wey sendalyas.

Isaias 3:24

Kenè en hinuun sikandan ebmehemut, kekenà, ebmemahù dan. Pisì dà is bagkes dan, ne ed-upawan is meupiya he vulvul zan. Is mahalen he menge visti zan ed-ilisan te saku, ne egkaawà is kekempet dan.

Isaias 37:1

Ne hein nezineg ni Hadì Hezekia is tudtul zan diyà te kandin, mibindas din is bisti zin ne midseluub sikandin te saku su ibpetuusan din is kedlalew zin, ne midhendiyà sikandin te valey te Nengazen.

Jeremias 16:6

Ebpematey is minsan hentei kayi he tanà, sepian man etawa pubri, ne wazà ebpekeleveng kandan wey wazà edlalew tenged kandan. Wazè en ebpelian din is lawa zin etawa ebpevangul su ibpetuusan din is kedlalew zin tenged te minatey he zuma zin.

Jeremias 41:5

duen 80 he menge etew he edhendiyà te Mizpa he ebpuun diyà te Shekem, Shilo, wey Samaria. Migkiskisan dan is menge sumpè dan, mibindasbindas dan is menge visti zan, wey mibpemelian dan is menge lawa zan tenged te kedlelaw zan. Duen uwiten dan he menge pemuhat he para gasa wey veyewà he edtutungen dan diyà te valey te Nengazen.

Jeremias 47:5

Is menge tig-Gaza ebpemevangul su ibpeehè dan is kedlalew zan, ne is menge tig-Ashkelon ebpereremek he egkengeseeng. Sikiyu is menge meǥinged diyà te menge suǥud, kenè bes egkeengked is kebpelii niw te lawa niw he tuus te kedlalew?

Jeremias 49:3

“Ebpekesineǥew kew taman te egkehimu niw, is menge etew ziyà te Heshbon, su egkezeetan is Ai. Ebpekesineǥew kew zaan is menge meǥinged diyà te Raba! Ebivisti kew te saku is edlikù-likù ebpelelaǥuy ziyà te kilid te verengbeng te kebpaahà he edlalew kew. Su ebihaǥen is ed-ezapen niw he si Molec duma te menge memumuhat wey te menge upisyal zin.

Ezekiel 27:31

Egkiskisan dan is ulu zan wey ebivisti sikandan te saku zutun te edsineǥew sikandan is egkeseeng.

Ezekiel 29:18

“Sikew is etew, is menge sundaru ni Hadì Nebucadnezar he hadì te Babilonia mibpurung mebpekidtebek te menge sundaru te Tyre taman te nengeupew en sikandan wey mibpenlupangan en is menge pemenayen dan. Piru wazà nekuwa ni Nebucadnezar wey te menge sundaru zin diyà te menge tig-Tyre.

Ezekiel 7:18

Ebivisti sikandan te saku wey egkiskisan dan is menge ulu zan te kebpaahà te kegkeseeng dan. Ne utew sikandan egkahandek wey egkeeled.

Leviticus 19:28

wey kenè niw zaan pelii is lawa niw. Wey kenè kew zaan mebpepatik. Iyan a kes Nengazen.

Amos 8:10

Edhimuwen ku he sineǥawan is kedlipey niw emun timpu te pista, ne edhimuwen ku he hulùhulù is menge kegkanta niw. Ebpevistiyan ku sikiyu te saku wey edsuǥuen ku he mebpevangul su wey niw ikepaahà is kedlalew niw, iring te menge ǥinikanan he edsineǥew tenged te kebpatey te vudtung he anak dan. Piru edhuna pa he mesakit is ketepusan kayi he menge silut.”

Micas 1:16

Is pelanggè niw he menge anak, egkuwaan diyà te keniyu ne ed-uwiten diyà te zuma he lugar, umbe idlalew niw is menge anak niw ne ibpeehè niw heini pinaaǥi te kegkiskisi niw te ulu niw iring te ulu te vanug.”