Jeremias 44:17 - Manobo Western Bukidnon OT

¹⁷ Ebeelan dey is langun he egkesuatan dey te ebaal: is kedtutung te veyewà he para te ed-ezapen dey he ‘Rayna te Langit’ wey is kedhalad diyà te kandin te pemuhat he inumen iring te mibeelan dey ziyà te menge inged diyà te Juda wey ziyà te menge zalan te Jerusalem. Ne iyan daan heini mibeelan te menge kepuun dey wey menge hadì dey wey menge upisyal. Dutun he timpu meupiya man is kebpekesavuk dey; dekelà is keenen dey wey wazà mezaat he nehitavù kenami.

Jeremias 44:17 교차 참조

2 Hadì 17:16

Inselikwey zan is langun he menge suǥù te Nengazen he Megbevayè dan, ne nengugelingen sikandan mebaal te ledawan te zezuwa he nati he vaka, wey te tukud he simbulu te vahi he ed-ezapen he si Ashera. Mid-azap dan is andew, is bulan, wey is menge vituen wey mibeǥayan dan si Baal te zengeg.

2 Hadì 22:17

Ibpeehè ku is pauk ku kayi he lugar ne kenà heini egkeengked, su inselikwey a te menge etew ku; su midtutung dan te veyewà su mid-azap dan te zuma he menge ed-ezapen. Midhimu zan he mepauk a pinaaǥi te menge ulaula zan.’

2 Cronica 28:23

Nemuhat sikandin te menge pemuhat diyà te menge ed-ezapen te menge tig-Damascus he nekezaag kandin. Su ke sikandin te, “Is menge hadì te Aram ne midtevangan te menge ed-ezapen dan. Umbe ebpemuhaten ku zaan heini he menge ed-ezapen para tevangi e zan.” Piru iyan heini nekezezaat kandin wey te tivuuk he Israel.

Nehemias 9:34

Is menge hadì dey, menge pengulu zey, menge memumuhat dey, wey is menge kepuun dey, wazà medtuman te Kesuǥuan nu. Wazè dan seǥipaa is menge suǥù nu wey menge petizaan nu.

Salmo 106:6

Nekesalè key iring te menge kepuun dey; utew mezaat is mibeelan dey.

Salmo 12:4

Ke sikandan te, “Ebmezeeǥen key pinaaǥi te kebpahambug dey. Ebpekehimu key he egkaǥi te minsan hengkey he egkesuatan dey, ne wazà ebpekezawey kenami.”

Exodus 16:3

Ke sikandan te, “Deyzey pa ke ziyè key zà himetayi te Nengazen hein diyè key pa te Ehipto. Diyà, ne ebayèbayè key te minsan hengkey he egkekaan dey. Piru ǥuntaan, mid-uwit key kayi keniyu te sibsivayan wey key mengeumes.”

Isaias 48:5

Umbe, zaan ku en he migkaǥi ziyà te keniyu is ebeelan ku. Te wazè pa heini mehitavù mibpeseyuzan ku en keniyu su para kenè kew mekekaǥi he iyan is menge kayu wey menge mital he ed-ezapen niw midtagnà wey midtuman kayi.

Jeremias 1:16

Edsilutan ku is menge etew ku tenged te kelelalung dan. Inselikwey e zan pinaaǥi te kedtutung dan te veyewà para te zuma he menge ed-ezapen. Uya, mid-azap dan is menge ledawan he vineelan dan.

Jeremias 11:12

Ne ziyà sikandan ebuyù te tavang te menge ed-ezapen he ebpemuhaten dan te edtutungen he veyewà, piru kenà heini ebpeketavang kandan emun egkeumahan dan en te kezeetan.

Jeremias 18:15

Piru is menge etew ku nelipatan e zan en. Midtutungan dan te veyewà is wazè din pulus he menge ed-ezapen. Mid-ewaan dan is hustu he zalan he kezaan en ne ziyè dan med-ikul te kenà hustu he zalan ne zutun sikandan meseligkat.

Jeremias 19:13

Uya, is langun he ubpeey ziyà te Jerusalem, ragkes en is turuǥan te menge hadì te Juda, ed-isipen he meremerik iring te Tofet. Diyà te atep kayi he menge valey, edtutung is menge etew te menge veyewà he para te ed-ezapen dan he menge vituen, wey ebpemuhat dan kayi te pemuhat he inumen he para te zuma he menge ed-ezapen.’ ”

Jeremias 44:21

“Egkeisip niw ve he wazà metueni te Nengazen is kedtutung niw te veyewà wey is kedtutung te veyewà te menge kepuun niw, menge hadì wey menge upisyal wey menge etew ziyà te menge inged diyà te Juda wey ziyà te menge zalan te Jerusalem?

Jeremias 44:25

Iyan heini migkaǥi te Nengazen he Mekeǥeǥehem, he Megbevayà te Israel: ‘Midtuman niw wey te menge esawa niw is impenaad niw he kedtutung te veyewà wey kedhalad te pemuhat he inumen he para te Rayna te Langit. Sigi en, leusa niw en is baal niw. Tumana niw is impenaad niw.

Jeremias 44:9

Nelipatan niw en be is kelelalung te menge kepuun niw wey te menge hadì wey menge rayna te Juda, wey is mezaat he menge vaal niw wey te menge esawa niw hein diyè kew pa te Juda wey Jerusalem?

Jeremias 7:17

Wazè nu ve maahà is menge ebeelan dan guntaan diyà te menge inged diyà te Juda wey te menge zalan diyà te Jerusalem?

Jeremias 7:18

Ebpengayu is menge vatà, ne idtetavun haazà te menge amey zan, ne is menge vahi ebmasa te herina, su ebeelan dan he supas para te ed-ezapen he egngezanan te Rayna ziyà te Langit. Ebpemuhaten dan daan te inumen is duma he menge ed-ezapen su wey a mepauk.

Ezekiel 20:32

“ ‘Kenà egkehitavù is egkeisip niw he egkeiring kew te zuma he menge nasyun he is menge etew zuen ed-azap te menge ed-ezapen he ledawan he vatu wey kayu.

Ezekiel 20:8

“ ‘Piru midsupak e zan, ne wazè dan mebpemineg. Wazè dan iselikwey is utew mezaat he menge ed-ezapen diyà te Ehipto. Umbe migkaǥi a te ibpeǥezaman ku kandan is pauk ku zutun te ziyà sikandan te Ehipto.

Ezekiel 23:41

Ne heini, si Ohola wey si Oholiba, mibpinuu zan diyà te mekempet he katri, ne ziyà te egkesineruwan kayi zuen lemisahan he midsevukan dan te veyewà wey lana he ibpemuhat dan kun kediey.

Ezekiel 8:16

Ne mid-uwit e zin diyà te seled he lama duen te valey te Nengazen. Ne ziyà te ǥemawan te valey te Nengazen he ziyà te pid-elangan te varkun wey pemuhatà, duen 25 he menge etew. Ed-iniyug sikandan duen te valey te Nengazen he edsinaru ziyà te edsilaan su ed-ezapen dan is edsilà he andew.

Habakuk 1:16

Ne tenged te mahabet is nevihag dan, midalig dan is keugelingen dan tenged te kebpekegaga zan; iring sikandan te mengingisdà he mibeǥayan din te zengeg is bunuwit din etawa puket din pinaaǥi te kedtutung te veyewà he pemuhat para kayi he menge azen. Su pinaaǥi te vunuwit din etawa puket din ne midsepian sikandin ne egkekaan din is metaam he menge keenen he egkesuatan din te egkaan.

Numero 30:12

Iyan, emun ebelavag is esawa zin dutun te kegketueni zin kayi, kenè en kinahanglan he edtumanen din heini. Ebpeseyluwen sikandin te Nengazen su mibelavag man kandin is esawa zin.

Numero 30:2

Emun ebpenaad etawa ebpenangdù is sevaha he maama diyà te Nengazen he ebeelan din etawa kenà haazà is sevaha he vaal he midtendek din, kinahanglan he edtumanen din is langun he mibpengaǥi zin.

Deuteronomio 23:23

Piru minsan hengkey he ibpenaad niw ziyà te Nengazen he Megbevayè niw, kinahanglan he tumana niw.

Zatù 11:36

Midtavak haazà is anak ni Jefta te, “Amà, nekepenangdù ka ziyà te Nengazen. Umbe, tumana nu is penangdù nu, su impezaag keniyu te Nengazen is menge kuntada niw he menge Amunihanen.