Jeremias 36:21 - Manobo Western Bukidnon OT

²¹ Ne midsuǥù dutun te hadì si Jehudi he kuwaa zin sikan is linulun he velesahan. Ne migkuwa haazà ni Jehudi diyà te ruǥu ni Elishama ne mibasa zin duen te hadì wey te langun he ebpemenhitindeg diyà te avey zin he menge upisyal.

Jeremias 36:21 교차 참조

2 Hadì 22:10

Ne migkaǥi pa sikandin dutun te hadì te, “Duen libru he imbeǥey kedì duen te memumuhat he si Hilkia.” Ne mibasa zin haazà diyà te etuvangan dutun te hadì.

2 Cronica 34:18

Migkeǥiyan din pa haazà is hadì te, “Duen libru he imbeǥey kedì te memumuhat he si Hilkia.” Ne mibasa zin haazà diyà te etuvangan dutun te hadì.

Jeremias 23:28

Bey-ani en heini he menge ebpeneuven ke ebpenudtul zan te menge teǥeinep dan, piru sikan is menge ebpeneuven he nekezineg te lalag ku kinahanglan he edtudtulen dan heini te tinutuuwà. Su zuen kebpekedselekawà te teǥeinep dan wey is lalag ku iring te kebpekedselekawà te reǥami wey veǥas din.

Jeremias 36:14

Ne zutun, midsuǥù te menge upisyal si Jehudi he anak ni Netania he apù ni Shelemia wey apù te vuel ni Cushi, te kedhendiyà te ki Baruc, ne mibpekeǥiyan dan te, “Uwita nu sikan is linulun he velesahan ne hengkayi ka te kenami.” Umbe midhendiyà si Baruc te kandan he uwiten din sikan is linulun he velesahan.

Jeremias 36:15

Ne hein nekeume en si Baruc, migkaǥi haazà is menge upisyal te, “Pinuu ka ne vesaha nu kayi te kenami is ingkesurat keniyan te linulun he velesahan.” Umbe mibasa haazà ni Baruc diyà te kandan.