Jeremias 35:4 - Manobo Western Bukidnon OT

⁴ Miduma ku sikandan diyà te valey te Nengazen, diyà te ruǥu te menge anak he maama ni Hanan he anak ni Igdalia te suluǥuen te Megbevayà. Heini he ruǥu avey te ruǥu te upisyal ne ziyà heini te zivavew te ruǥu ni Maasea he anak ni Shalum, he vantey te ǥemawan te valey te Nengazen.

Jeremias 35:4 교차 참조

1 Hadì 12:22

Piru migkeǥiyan te Megbevayà si Shemaya he suluǥuen din te,

1 Hadì 13:1

Dutun he timpu midsuǥù te Nengazen is sevaha he suluǥuen din he tig-Juda te kedhendiyà te Betel. Ne kebpekeuma zin diyà, ne edhithitindeg si Jeroboam diyà te pemuhatà su ebpemuhat.

1 Hadì 13:26

Ne hein nezineg heini zuen te meǥurang he ebpeneuven, ke sikandin te, “Iyan sikandin sikan is suluǥuen te Megbevayà he midsupak din is migkaǥi kandin te Nengazen. Imbeǥey sikandin te Nengazen duen te erimaung he mid-etaki wey midhimatey kandin, su iyan heeyan nekaǥi te Nengazen diyà te kandin.”

1 Hadì 17:18

Migkaǥi haazà is bahi ziyà te ki Elias te, “Sikew is suluǥuen te Megbevayà hengkey is ingkepeuki nu kediey? Iyan be inhendini nu su edhimetayan nu is anak ku su silut kedì tenged te menge salè ku?”

1 Hadì 17:24

Ne migkaǥi haazà is bahi ziyà te ki Elias te, “Guntaan netuenan ku en he tutuu iyan he suluǥuen ka te Megbevayà, wey tutuu he ebpekidlalag is Nengazen pinaaǥi kenikew.”

1 Hadì 20:28

Midhendiyà is suluǥuen te Megbevayà te hadì diyà te Israel ne migkaǥi te, “Iyan heini lalag te Nengazen: Egkeisip te menge Aramihanen he megbevayà a ziyà te menge vuvungan ne kenà diyà te menge suǥud. Umbe ebpengelinteuwan ku he mezaag nu is utew mahabet he menge sundaru zan su para metueni niw he iyan a Nengazen.”

2 Hadì 1:9

Ne midsuǥù is hadì te sevaha he upisyal duma te 50 he menge etew te kedakep ki Elias. Hein neturedu zuen te upisyal si Elias he ebpimpinuu ziyà te puntur te vuvungan, migkeǥiyan dutun te upisyal te, “Sikew is suluǥuen te Megbevayà, midsuǥù a te hadì he ibpehendiyè ka te kandin.”

2 Hadì 12:9

Migkuwa si Jehoyada te kahun ne mibudsiyan din is tangeb kayi. Ne insavuk din heini ziyà te kilid te pemuhatà, diyà te egkekewanan emun edseled ki zuen te valey te Nengazen. Emun duen edseled duen te valey te Nengazen he ebeǥey te selapì, ne id-ahuk heini te menge memumuhat he ebantey te gemawan duen te kahun.

2 Hadì 25:18

Mibihag daan ni Nebuzaradan si Seraya he lavew he memumuhat, si Zefanias he ebpeketinundug is kegkelavew zin ki Seraya, wey is tetelu he perevantey te ǥemawan te valey te Nengazen.

2 Hadì 5:14

Umbe, midhendiyà si Naaman te Wahig he Jordan ne midlùluan din is lawa zin te kepipitu, sumalà is nekaǥi te suluǥuen te Megbevayà he si Elisha. Ne neulian is daru zin, ne mibmetilak is lundis din he henduen be te lundis te zeisey pa he vatà.

2 Hadì 5:20

ne sikan is suluǥuen ni Elisha he si Gehazi, neisip din is, “Impeǥenat te egalen ku si Naaman he Aramihanen he wazè din dewata is igasa zin. Ebpenangdù a ziyà te uuyag he Nengazen he edel-asen ku sikandin ne egkuwa a ziyà te kandin te minsan hengkey.”

2 Hadì 6:10

Umbe, midsuǥù is hadì te Israel dutun te lugar he nekaǥi ni Elisha he kinahanglan he egkeǥiyan is menge meǥinged duen he med-andam dan. Layun heini ebeeli ni Elisha.

2 Hadì 7:17

Iyan insavuk duen te hadì he ed-atur te ebpemenlawang he menge etew ziyà te pultahan dutun te inged, sikan is upisyal he sineriǥan din. Piru nepiley sikandin ne neǥunas te menge etew zutun te pultahan, ne minatey sikandin sumalà te nekaǥi ni Elisha he suluǥuen te Megbevayà hein midhendiyà te kandin sikan is hadì.

2 Hadì 7:2

Ne Migkaǥi haazà is upisyal he sineriǥan te hadì te, “Kenà heeyan egkehitavù, su minsan dekelà is menge sebpet su ibpeuzan te Nengazen, ne kenà iring keniyan keveratu is keenen.” Midtavak si Elisha te, “Egkeehè nu is kegkeul-ulaha kayi, piru kenè ka ebpekekaan duen te nekaǥi ku.”

1 Cronica 9:27

Ebpurang sikandan he ebantey ziyà te peliǥuy zutun te valey te Nengazen su kinahanglan haazà he ebentayan dan wey ebpuwasan dan kada meselem.

2 Cronica 8:14

Ne sumalà te sulunuzen te amey zin he si David, migrupu zin is menge memumuhat wey menge Levihanen para te menge vuluhaten dan. Is menge Levihanen, ne iyan ebpengegalen te menge etew he edalig te Megbevayà, wey ed-uǥup dan te menge vuluhaten te menge memumuhat dutun te valey te Nengazen kada andew. Migrupu zin daan is menge ebantey te kada gemawan te valey te Nengazen su iyan heini insuǥù ni David he suluǥuen te Megbevayà.

Salmo 84:10

Is senga andew he ked-ubpà diyà te valey nu ne meupiya pa te nengkelibu he andew he ked-ubpà diyà te minsan hendei he lugar. Edtumuen ku is kedhithitindeg diyà te ǥemawan te valey nu, He Megbevayà, kenà is ked-ubpà diyà te valey te menge lalung.

Jeremias 21:1

Mibpekidlalag is Nengazen pinaaǥi ki Jeremias hein si hadì Zedekia, he hadì te Juda, midsugù din diyà te ki Jeremias si Pashur he anak ni Malkia wey is memumuhat he si Zefanias he anak ni Maasea. Ne migkaǥi sikandan diyà te ki Jeremias te,

Jeremias 26:10

Ne hein nezineg heini te menge upisyal te Juda, migenat dan puun te turuǥan, ne midhendiyè dan te valey te Nengazen. Mibpinuu zan diyà te veyeey he migngezanan te Beǥu he Gemawan he valey te Nengazen he para te kedhukum.

Jeremias 35:3

Umbe, mibeyaan ku si Jaazania (anak sikandin te egngezanan daan te Jeremias, he anak ni Habazinia) wey is langun he menge suled din wey menge anak. Iyan sikandan tivuuk he pemilya te menge Rikabnen.

Jeremias 52:24

Mibihag daan ni Nebuzaradan si Seraya he lavew he memumuhat, si Zefanias he ebpeketinundug is kegkelavew zin ki Seraya, wey is tetelu he perevantey te ǥemawan te valey te Nengazen.

Ezekiel 40:38

Ne zuen ku naahà he ruǥu he zuen din gemawan, he avey te varkun te veyeey he zapit te zizaya. Dutun edlùlùi is menge pemuhat he edtutungen.

Ezekiel 43:8

Dengan mibaal sikandan te pemuhatà he para te zuma he menge ed-ezapen diyà te avey te pemuhatà he para kediey he verengbeng dà is nekepetug-elang. Midremerikan dan is waǥas he ngazan ku pinaaǥi keniyan te utew mezaat he menge vaal zan. Umbe tenged te pauk ku midezeetan ku sikandan.

Deuteronomio 33:1

Iyan heini menge lalag ni Moises te suluǥuen te Megbevayà hein mibpenubtuvazan din is menge Israilihanen dutun te wazè pa sikandin mebpatey.

Josue 14:6

Midhendiyà te ki Josue ziyà te Gilgal is nepipira he etew te tribu ni Juda. Is sevaha kandan iyan si Caleb he anak ni Jefune he Kinishanen. Migkaǥi sikandin te, “Egketenuzan nu pe be sikan is migkaǥi te Nengazen diyà te ki Moises he suluǥuen te Megbevayà mehitenged kenita te zezuwa hein diyè kiw pa te Kadesh Barnea?

1 Samuel 2:27

Duen sevaha he suluǥuen te Megbevayà he mid-uvey ziyà te ki Eli he egkaǥi te, “Iyan heini lalag te Nengazen: Impesavut ku ziyà te gin-epuan niw he si Aaron wey ziyà te pemilya zin te kemulu zan pa neuripen te hadì te Ehipto.