Jeremias 33:4 - Manobo Western Bukidnon OT

⁴ Iyan heini migkaǥi te Nengazen he Megbevayà te Israel vahin te menge valey kayi he inged wey te turuǥan te hadì he impenrundus niw, su wey niw mekuwa zutun is menge himan he ebeelan niw he pengalang te edsurung he menge kuntada niw,

Jeremias 33:4 교차 참조

Isaias 22:10

Mid-ehè niw is menge valey ziyà te Jerusalem ne midrundus niw is duma zutun su egemiten niw is menge vatu zuen te kebpurung te verengbeng te inged.

Isaias 32:13

Is tanà te menge etew ku edtuvuan dà te zuǥiyen he zezeisey he kayu wey menge sagbet. Ne egkaawà is melipayen he menge pemilya wey is inged he melipayen is menge etew zuen.

Isaias 32:14

Is inged he mezakel zengan is mid-ubpà duen, ne kenè en maan ed-ubpaan. Is melig-en he menge vahin kayi, ebey-anan en. Is mibuntud-buntud wey turi kayi egkeiring te sibsivayan minsan keenu. Edriǥuriǥu kayi is menge asnu ne ebpemenabtab is menge langgam.

Jeremias 32:24

Ne ǥuntaan midtambù te tanà is menge tig-Babilonia kayi te kilid te verengbeng te Jerusalem he egkeveyaan dan te kedseled dan kayi te inged su wey zan maaǥew heini. Ne tenged te tebek, bitil, wey zaru, egkaaǥew te menge tig-Babilonia heini is inged su iyan heeyan migkaǥi nu.

Jeremias 6:6

Iyan heini migkaǥi te Nengazen he Mekeǥeǥehem: “Penamped kew te menge kayu he egkeǥamit niw te kebengkag te verengbeng te Jerusalem, ne tambù kew te tanà diyà te kilid te verengbeng he iyan egkepemenehikan niw. Heini he inged ereg en he edezeetan, su midelandap en kayi he lugar is kebpendaagdaag.

Penhulùhulù 2:7

Inselikwey te Nengazen is pemuhatà he zutun sikandin ebpemuhata wey is baley zin. Impewaǥey zin te menge kuntada is menge verengbeng diyà te melig-en he menge vahin te Jerusalem. Nemengulahì heini he menge kuntada ziyà te valey te Nengazen he henduen be te edsilibra zan te pista.

Ezekiel 21:22

Is egkehubus din he vesut te panà iyan is mibmerkahan te Jerusalem. Ne edhabet sikandin ebpemensag he edsurungen dan en is Jerusalem ne egeraan dan is meǥinged kayi. Ebpesevukan din is pultahan te Jerusalem te zezekelà he menge kayu he ibengkag. Ebaal sikandin te turi-turi wey edtambù te tanà diyà te kilid duen te verengbeng duen te inged su para mepemenehiki heini.

Ezekiel 26:8

Ibpepenhimetayan din is menge meǥinged diyà te menge inged niw pinaaǥi te ispada. Edsurung is menge sundaru zin he ed-uwit te menge turi-turi, wey menge kelasag, ne edtembuan dan te menge tanà is peliǥuy te menge verengbeng niw su para mepemenehiki heini.

Ezekiel 4:2

Ne himuwa nu heini he henduen be te edliǥuyan te menge kuntada. Ne sevuki nu heini te para te kedsurung: menge turi-turi, pemenehikà dutun te verengbeng, idtambù he menge tanà su para mepemenehiki is berengbeng, menge kayu he ibpenbengkag dutun te verengbeng. Ne pelinguti nu heini te menge kampu.

Habakuk 1:10

Bà dan dà edsudia is menge hadì wey menge pengulu. Ne và dan dà ed-engiti is kada vinerengbeng he inged, su ebpekeliyu zan kayi pinaaǥi te kedtambù te tanà diyà te kilid te verengbeng, ne zutun egkaaǥew zan haazà is inged.

Deuteronomio 20:20

Piru egkehimu mulà ke ebpemilayen niw is menge kayu he kenà egkekaan is beǥas dan, ne egkeǥamit niw heini he himan para wazà ebpekepelaǥuy zutun te inged taman te egkaaǥew niw haazà.