Jeremias 33:18 - Manobo Western Bukidnon OT

¹⁸ Wey layun daan duen menge memumuhat he menge kevuwazan ni Levi he ebpenilbi kedì wey ebpemuhat te menge pemuhat he edtutungen, menge pemuhat he para gasa, wey zuma pa he menge pemuhat.”

Jeremias 33:18 교차 참조

Ezra 3:5

Kenà ragkes kayi is menge pemuhat he edtutungen he ibpemuhat dan te meselem wey mahapun, ebpemuhat daan sikandan te menge pemuhat te kada Pista te Kebpuun te Hayag wey te zuma pa he menge pista te ked-azap te Nengazen. Ebpemuhaten dan daan is Nengazen te menge pemuhat he keugelingen he suat is kebeeli zuen.

Isaias 56:7

Ed-uwiten ku sikandan diyà te segradu he vuvungan ku, ne edlipayen ku sikandan diyà te valey ku he elempuanan. Edewaten ku ziyà te pemuhatà he para kediey is menge pemuhat dan he edtutungen wey zuma pa he menge pemuhat; su is baley ku egngezanan te valey he elempuanan te menge etew ziyà te langun he menge nasyun.”

Isaias 61:6

Egngezanan kew he menge memumuhat te Nengazen, wey menge suluǥuen te Megbevayè tew. Ebpezaharan kew te ketiǥeyunan te menge nasyun, ne egkelipey kew te kegkeengkena niw kayi.

Jeremias 33:19

Ne migkaǥi is Nengazen diyà te ki Jeremias,

Jeremias 33:22

Ibpemahabet ku is menge kevuwazan ni David he suluǥuen ku wey ni Levi he iring kahabet te menge vituen diyà te langit wey pantad diyà te veyvey te zaǥat he kenà egkevilang.”

Jeremias 35:19

Umbe, edsaad a he si Jonadab he anak ni Recab, ne kenà egkeewaan te kevuwazan he ebpenilbi kedì. Iyan a, is Nengazen he Mekeǥeǥehem, he Megbevayà te Israel, is migkaǥi kayi.’ ”

Ezekiel 44:15

“Piru is menge memumuhat he ebpuun diyà te tribu ni Levi he menge kevuwazan ni Zadok he metinumanen he nenilbi kedì diyà te valey ku hein mid-awà kayi te kedì is menge Israilihanen, nenilbi zan mulà kedì. Iyan sikandan egkehimu he ebpemuhat kedì te tavà wey lengesa te uyaǥen. Iyan a, is Nengazen he MEGBEVAYÀ, is migkaǥi kayi.

Ezekiel 45:5

Is ketengà kayi he tanà ne 12 he kilumitru is keleyatan din ne lelima he kilumitru is keluaǥan din gaked te menge Levihanen he umuuǥup te menge memumuhat diyà te valey ku. Ed-engkenen dan heini su para zuen dan menge inged he egkeubpaan.

Numero 3:5

Migkaǥi is Nengazen diyà te ki Moises te,

Deuteronomio 18:1

“Is menge memumuhat he kevuwazan ni Levi wey is duma pa he sakup te tribu ni Levi, iyan sikandan tribu te Israel he wazà tanà he egkepengevilin dan. Iyan dà egkekaan dan is puun duen te menge pemuhat pinaaǥi te hapuy he ibpemuhat diyà te Nengazen, su iyan heini kandan he egkepengevilin.

Deuteronomio 24:8

“Bahin te mekelimlimezang he zaru te lundis, purungi niw sunuza is menge sulunuzen he ibpeveelan keniyu te menge memumuhat he menge kevuwazan ni Levi. Tumana niw is insuǥù ku kandan.

Josue 3:3

ne mibmenduan dan is menge etew te, “Emun egkeehè niw en he ebintingen en te menge memumuhat he menge kevuwazan ni Levi sikan is Kavan te Kebpekid-uyun te Nengazen he Megbevayè niw, ne tundug kew en kandan,