Jeremias 31:18 - Manobo Western Bukidnon OT

¹⁸ Nezineg ku is sineǥawan te menge tig-Efraim. Ke sikandan te, “Nengazen, neiring key te nati he vaka he wazà melayam te eyuǥu, iyan, mibpenurù key kenikew te kebpezumazuma kenikew. Iyan ka Nengazen he Megbevayè dey, umbe ilikù key kenikew ziyà te tanè dey.

Jeremias 31:18 교차 참조

Job 5:17

“Deyzey is etew he edtulizen te Megbevayà is betasan din. Umbe kenè nu isipa he mezaat is kebmensuwa kenikew te Mekeǥeǥehem he Megbevayà,

Salmo 118:18

Minsan utew zekelà is silut te Nengazen kedì, piru wazè din ituǥut he mebpatey a.

Salmo 119:67

Hein aney he wazè e pa kenikew mensuwa, ne mid-awà a ziyà te kenikew, piru ǥuntaan midtuman ku en is lalag nu.

Salmo 119:75

Netuenan ku, Nengazen, he metazeng is menge suǥù nu. Ne ǥeina te metinumanen ka te egkeǥiyen nu, umbe mibmansu a kenikew.

Salmo 31:15

Is untung ku ne ziyan te kenikew; libriya a te menge kuntada ku he edezaat kedì.

Salmo 32:9

Kenè nu iringi is kudà he kenà ebpekesavut, he kinahanglan pa he egkekangan wey edrindahan su para mekepezumazuma.”

Salmo 80:19

He Nengazen he Mekeǥeǥehem he Megbevayà, ilikù nu zini te kenami is meupiya he kebpekesavuk dey! Ipeehè nu kenami is hizu nu su wey key melibri.

Salmo 80:3

He Megbevayà, iliku nu kayi te kenami is keupiya te kebpekesavuk dey zengan. Ipeehè nu kenami is hizu nu su wey key melibri.

Salmo 80:7

He Megbevayà he Mekeǥeǥehem, ilikù nu kayi te kenami is meupiya he kebpekesavuk dey zengan. Ipeehè nu kenami is keupiya nu su wey key melibri.

Salmo 85:4

He Megbevayà he menluluwas dey, ilikù nu kayi te kenami is meupiya he kebpekesavuk dey. Iawè nu en is pauk nu kenami.

Salmo 94:12

Nengazen, utew zeyzey is etew he ebmensuwen nu pinaaǥi te kebpenurua nu kandin te menge kesuǥuan nu.

Erubasa 26:3

Kinahanglan he edlegkuten wey ebusalan is kudà wey asnu. Iring din is tulebung, kinahanglan he ebpigahan.

Erubasa 29:1

Is etew he kenà ebpezumazuma minsan layun en edewaya, ne iyan egkepengkusan din is egkerumpak sikandin diyà te kezeetan ne wazè en paaǥi wey meǥaud sikandin dutun.

Erubasa 3:11

Mama, kenè nu isipa he mezaat is kebmansu te Nengazen wey kenè nu ikeepes is kedawey zin.

Isaias 1:5

Menge tig-Israel, maan is mibpedayun kew mebpekidsukulà? Egkesuat kew ve he edsilutan? Iring kew te etew he nepurung te palì is ulu zin wey utew mesakit is gehinawa zin.

Isaias 51:20

Nengevidtawan sikandan ne nemekehidhizeǥà diyà te suyuk te kada kersada he henduen be te selazeng he nengelitag. Nesuǥat sikandan te utew kegkepauk te Nengazen; wey kebpendawey te Megbevayè nu.

Isaias 53:7

Midaagdaag sikandin wey mibpesekitan, iyan, wazà sikandin medriklamu. Iring sikandin te kerehidu he ed-uwiten diyà te lepeey, wey iring te kerehidu he ebpereremek dà emun ed-elutan.

Isaias 63:16

Su iyan ka Amey zey minsan kenè key egkilelaan te menge kepuun dey he si Abraham wey si Jacob he menge kevuwazan dan. Uya, iyan ka Nengazen, amey zey, iyan ka Menluluwas dey puun pa zengan.

Isaias 9:13

Piru is menge etew te Israel kenà gihapun edlikù diyà te Nengazen he Mekeǥeǥehem he midsilut kandan.

Jeremias 17:14

He Nengazen, iyan ke zà ebpekevawì kedì wey a meulii; iyan ke zà ebpekelibri kediey. Iyan ka midalig ku.

Jeremias 2:30

Midsilutan ku is menge anak niw para memansu, piru wazà heini medrimeǥas te meupiya ziyà te kandan. Kenà sikandan egkesuat he ebpenuruen. Iyan kew mismu midhimatey te menge ebpeneuven diyà te keniyu; neiring kew te egkevitil he erimaung.

Jeremias 3:25

Ereg key he ed-eles tenged te kegkeeled su sikami wey is menge kepuun dey nekesalà diyà te kenikew, Nengazen he Megbevayè dey. Puun pa te kegkevatè dey taman en guntaan ne wazè key medsunud kenikew.”

Jeremias 31:6

Egkeuma is timpu he zutun is menge vantey ziyà te menge vuvungan he Efraim ne ebpemensag, ‘Hendini kew, su edtekezeg kiw ziyà te Jerusalem te ked-azap te Nengazen he Megbevayè tew.’ ”

Jeremias 31:9

Ed-umanan ku sikandan ed-uwità is edsineǥew wey ebpengemuyù. Ed-uwiten ku sikandan diyà te menge wahig, ne ed-ikul sikandan diyà te meupiya he zalan he kenè dan duen ebpekesipà. Su iyan a amey te menge Israilihanen, ne si Efraim is kakey he anak ku.

Jeremias 5:3

Ne zutun migkaǥi a te, “He Nengazen, kenè be nengeehè ka te etew he egkeseriǥan? Mibpesekitan nu is menge etew nu, piru wazè dan heini seǥipaa. Midsilutan nu sikandan wey zan mepenurù, piru kenè dan egkesuat he ebpenuruen. Wazè dan en keelezan ne kenè en sikandan ed-engked te kebaal te mezaat.

Penhulùhulù 5:21

He Nengazen, ipelikù key ziyà te kenikew ne edlikù key. Ilikù nu zini te kenami is meupiya he kebpekesavuk dey zutun te nehuna he timpu.

Ezekiel 20:43

Ne zutun egketenuzan niw is menge vaal niw he nekeremerik keniyu, ne egkesilag kew te keugelingen niw tenged te langun he mezaat he mibeelan niw.

Daniel 9:13

Nehitavù diyà te kenami heini he silut sumalà is ingkesurat diyà te Kesuǥuan ni Moises. Piru Nengazen he Megbevayè dey, minsan pa te iyan heini nehitavù kenami wazè key ǥihapun medtinguha te kebpenunuat kenikew pinaaǥi te ked-iniyug te menge salè dey wey kegkilala te tutuu.

Hoseas 10:11

Dengan ebpeeyehey kew zà; iring kew te zumeraǥa he vaka he nelayam he ibpeǥunas he ingkesuat din heini he terebahu. Piru ǥuntaan edlislisezen ku sikiyu is menge tig-Israel ragkes en is menge tig-Juda; egkeiring kew te zumeraǥa he vaka he ed-eyuǥuwan is tengel zin he wazè pa kubali, ne id-eradu.

Hoseas 4:16

Su utew mesinupaken is menge tig-Israel, iring sikandan te simadun he dumeraǥa he vaka. Umbe kenè ku sikandan egkaatur iring te menge kerehidu he ibpepenabtab diyà te penebtavà.

Hoseas 5:15

Ne kegkepasad dutun edlikù a ziyà te lugar ku, taman te ed-engkenen dan is menge salè dan. Ne edangep dan kayi te kedì tenged te kegkerasey zan.”

Jonas 3:10

Ne hein naahà te Megbevayà is mid-ulaula zan he iyan is ked-engkezi zan te mezaat he menge ulaula, nehizuwan din sikandan ne wazè din sikandan leusi te edlimas.

Zefanias 3:2

Wazà minsan hentei he ebpezumdumahan dan, ne kenè dan egkesuat he edewayen. Wazè dan medsarig wey mebpetavang diyà te Nengazen he Megbevayè dan.

Malakias 3:16

Duen menge etew zutun he zuen dan kegkehandek te Nengazen. Hein nezineg dan heini is menge lalag, mibpelelelaǥè dan ne nemineg kandan is Nengazen, ne nezineg din sikandan. Ne ziyà te etuvangan din duen belesahan he midsuratan te mehitenged duen te zuen dan kegkehandek wey kedtahud te Nengazen.

Malakias 4:6

Edhimuwen din he mahala te menge ǥinikanan is menge anak dan wey mahala te menge anak is menge ǥinikanan dan, su wey ku kenà mezezeeti is menge tanè niw.”

Numero 2:18

“Is tribu ni Efraim, Manase, wey ni Benjamin, ne ziyà megkampu te zapit te edsenlepan, diyà te zizalem te bendira te kada tribu zan. Iyan heini menge ngazan te menge pengulu zan wey kahabet te menge sakup dan: Tribu; Pengulu; Kahabet Efraim; Elishama he anak ni Amiud; 40,500 Manase; Gamaliel he anak ni Pedazur; 32,200 Benjamin; Abidan he anak ni Gideoni; 35,400