Jeremias 30:18 - Manobo Western Bukidnon OT

¹⁸ Migkaǥi pa is Nengazen te, “Idlikù ku is menge ketiǥeyunan diyà te menge inged te menge kevuwazan ni Jacob, ne egkehizuwan ku sikandan. Ed-umanan dan ebenguna is inged wey is turuǥan diyè mismu te lugar he zutun dan heini tukuza hein aney.

Jeremias 30:18 교차 참조

1 Cronica 29:1

Ne migkeǥiyan ni Hadì David is langun he menge Israilihanen te, “Si Solomon he anak ku he mibpilì te Megbevayà, betan-en pa ne wazè din pa kesinetian. Dekelà is buluhaten, su is edtukuzen he vilding ne kenà para te etew, kekenà, para te Nengazen he Megbevayà.

1 Cronica 29:19

Wey iveǥey nu zaan diyà te anak ku he si Solomon is dekelà he tinguhà te kedtuman te menge suǥù nu, menge penurù, wey te menge sulunuzen, wey te kebaal te langun he ibpetuman ku mehitenged te kedtukuza te valey te Nengazen he mibpurungan ku pengendami.”

Nehemias 7:4

Dutun he timpu, minsan meluag is Jerusalem, deisey zà is menge meǥinged duen wey menge valey.

Salmo 102:13

Andam en is hizu nu para te Zion, su neume en is midtelaan he timpu he zutun ibpeehè nu is keupiya nu para te Zion.

Salmo 102:14

Su heini he inged mibmahal ǥihapun te menge etew nu he menge suluǥuen nu minsan pa te nezeetan en heini.

Salmo 122:7

Berakat he melinawen wey meupiya is kebpekesavuk diyà te seled te Jerusalem wey te menge melig-en he vahin kayi.”

Salmo 48:13

Purungi niw ahaa is menge verengbeng wey is melig-en he menge vahin kayi te inged, su para metudtul niw ziyà te edsunud he menge lapis te kevuwazan

Salmo 48:3

Diyà is Megbevayà te melig-en he menge vahin te Jerusalem, ne impeehè din en te menge meǥinged kayi he iyan sikandin eputè dan.

Salmo 78:69

Dutun din benguna is baley zin, ne iring heini te langit wey tanà su taman te taman is kelig-en kayi.

Salmo 85:1

Nengazen, impeehè nu is keupiya nu pinaaǥi te kebpekeveǥey te keupiyaanan te tanè nu he Israel; impeuswag key en maan kenikew.

Isaias 44:26

Edtumanen ku is menge tagnà te suluǥuen ku wey menunudtulà. Migkaǥi a he egkeumanan egkeubpai is Jerusalem, ne ed-umanan ebenguna is menge inged diyà te Juda he nengevengkag.

Isaias 44:28

Migkeǥiyan ku si Cyrus te, “Iyan ka ed-elima te menge etew ku, ne veeli nu is langun he egkesuatan ku. Ne suǥù ka he ed-umanan ebenguna is Jerusalem wey is baley kayi.”

Jeremias 23:3

Iyan a mismu edtiǥum te nesamà he menge etew ku puun diyà te nekedseselekawà he menge lugar he zutun ku sikandan ipeyapat, ne idlikù ku sikandan diyà te tanè dan, ne zutun ebmahabet sikandan utew.

Jeremias 29:11

Netuenan ku ke ebmenmenuwen ku te edtuman is pelanu ku para keniyu, pelanu te kebpeuswag keniyu ne kenà kedrasey, pelanu te kebeǥey keniyu te perateng he zuen meupiya ziyà te egkeumahan niw he timpu.

Jeremias 29:14

Uya, edtevangan ku sikiyu, ne idlikù ku ziyà te keniyu is ketiǥeyunan niw. Edtiǥumen ku sikiyu puun te nekedseselekawà he menge nasyun he zutun ku sikiyu ipeyapat, ne idlikù kew ziyà te keugelingen niw he lugar. Iyan a, is Nengazen, is migkaǥi kayi.

Jeremias 30:3

Su egkeuma is timpu he ibpeuli ku is nengevihag he menge etew ku he menge tig-Israel wey menge tig-Juda ziyà te tanè dan. Uya, ibpeuli ku sikandan diyà te tanà he imbeǥey ku ziyè te menge kepuun dan wey zan meengken. Iyan a, is Nengazen, is migkaǥi kayi.”

Jeremias 31:23

Migkaǥi is Nengazen he Mekeǥeǥehem, he Megbevayà te Israel te, “Emun igkepelikù ku en is menge etew ziyà te Juda ziyà te tanè dan, ne egkaǥi en maan sikandan te, ‘Berakat he tuvazi te Nengazen is segradu he vuntud he iyan is Jerusalem, he iyan ubpeey zin.’

Jeremias 31:38

Mibpedayun megkaǥi is Nengazen te, “Egkeuma is timpu he ed-umanan ebenguna is Jerusalem puun te Turi ni Hananel pehendiyà te Pultahan diyà te Suyuk.

Jeremias 31:4

Ibpeuman ku sikiyu ibpehitindeg is menge tig-Israel he iring te vahi he wazè pa mehileveti. Ne ebpekesayew kew tenged te kegkelipey te ebpezumahan te tukar te menge tamburin niw.

Jeremias 31:40

Minsan is tivuuk he suǥud-suǥud he timbaǥà te ebpematey wey menge igmuk te menge pemuhat, ne idsivey para kedì; ragkes en is langun he vevesukà diyà te Kidron he zal-ug diyà te edsilaan, pehendiyà te Pultahan te menge Kudà diyà te zizaya. Kenè en egkeuman egkezeeti heini he inged.”

Jeremias 32:15

Su egkeuma is timpu he is menge etew ebpememase en maan te menge valey, menge vevesukà, wey menge pemuleey te paras kayi he lugar.’ ”

Jeremias 32:44

“Uya, egkehitavù ded is kebeyazi te menge etew te pelata te menge vevesukà. Ebaal sikandan te kesebutan. Ebpirmahan, edtetakan is menge pepilis, ne edtistiǥusan. Egkeulaula heini ziyà te menge tanà ni Benjamin, wey ziyà te zezeisey he menge inged he nekeliǥuy te Jerusalem, malù dezekelà he menge inged diyà te Juda, wey te menge inged diyà te menge vuvungan, diyà te inged te menge mibuntud-buntud diyà te edsenlepan, wey ziyà te inged he Negev. Ibpelikù ku is menge etew ku wey ibpeuswag ku sikandan ibpeuman. Iyan a, is Nengazen, is migkaǥi kayi.”

Jeremias 33:11

is kedlipey wey keguǥusà. Egkezineg is kebpeeyuwà te beuǥu, wey is kedlipey te ebpemen-uwit te menge pemuhat diyà te valey te Nengazen he para te kebpeselamat. Egkaǥi zan te, ‘Ebpeselamat kiw te Nengazen he Mekeǥeǥehem, su meupiya sikandin. Wazà pidtemanan te ǥaǥew zin.’ Edlipey is menge etew su idlikù ku is meupiya he kebpekesavuk dan kayi he tanà iring te kebpekesavuk dan dengan. Iyan a, is Nengazen, is migkaǥi kayi.”

Jeremias 33:7

Ibpelikù ku is menge tig-Israel wey menge tig-Juda ziyà te tanè dan, ne ed-umanan ku ebenguna is menge inged dan iring te nehuna he timpu.

Jeremias 46:27

“Piru sikiyu is menge Israilihanen he menge kevuwazan te suluǥuen ku he si Jacob, kenè kew luyahi wey mahandek su edlibriyen ku sikiyu puun diyà te meziyù he lugar he zutun kew vihaǥa. Ed-uman kew ebpengungubpaan he melinawen wey wazà kezeetan, ne wazè en ebpelihandek keniyu.

Jeremias 49:39

Piru ziyà te huziyan he timpu idlikù ku zed is meupiya he kebpekesavuk diyà te Elam. Iyan a, is Nengazen, is migkaǥi kayi.”

Jeremias 49:6

Piru ziyà te huziyan he timpu, ne idlikù ku is meupiya he kebpekesavuk te menge Amunihanen. Iyan a, is Nengazen, is migkaǥi kayi.”

Ezekiel 36:11

Ibpemahabet ku is menge etew wey menge uyaǥen diyà te keniyu. Ebpeumanan ku sikiyu ebpeubpai te menge etew iring te zengan, ne ibpeuswag ku sikiyu te lavew pa te zengan. Ne egketuenan niw he iyan a Nengazen.

Amos 9:14

Ibpeulì ku is menge etew ku he menge tig-Israel ziyà te tanè dan puun te kegkevihaǥa kandan. Ed-umanan dan ebenguna is nevengkag he menge inged dan ne zutun sikandan ed-ubpà. Ebpemula zan te menge paras ne ed-inum dan te vinu kayi. Ebpemula zan diyà te menge pemuleey zan ne egkaan dan te menge veǥas kayi.

Zacarias 1:12

Ne migkaǥi is belinsuǥuen te Nengazen te, “Nengazen he Mekeǥeǥehem, 70 en he tuig is kegkepeuki nu te menge tig-Jerusalem wey menge meǥinged diyà te zuma he menge inged diyà te Juda. Keenu nu pa edtepusa is kenè nu kegkehizuwi kandan?”

Zacarias 1:16

Umbe, edtevangan ku is menge tig-Jerusalem, ne ed-umanan ku ebenguna is Jerusalem ragkes en baley ku. Iyan a is Nengazen he Mekeǥeǥehem migkaǥi kayi.”

Zacarias 12:6

“Dutun daan he andew edhimuwen ku is menge pengulu te Juda he iring te egkeregreg he vaǥa ziyà te rapug etawa vinagkes he seresag he mesiǥa. Edezeetan dan is menge nasyun diyà te peliǥuy zan. Ne kenè mulà egkemenu is menge etew ziyà te Jerusalem dutun te kandan he lugar.

Zacarias 12:7

Ketau ku he ebpekehuna ebpekezaag is duma he menge inged diyà te Juda, su para kenà medlavew is dengeg te kevuwazan ni David wey menge meǥinged te Jerusalem te zengeg te zuma he menge inged diyà te Juda.

Zacarias 14:10

Egkehimu he suǥud is tivuuk he tanà puun te Geba ziyà te zizaya pehendiyà te Rimon diyà te zivavà te Jerusalem. Piru ebmetikang is Jerusalem diyà te nepelestaran din, ne ed-ubpaan heini puun te pultahan ni Benjamin pehendiyà te nepelestaran te Kezaan he Pultahan, ne pehendiyè en te Pultahan diyà te Suyuk; wey puun te Turi ni Hananel pehendiyà te keresà te paras te hadì. Kenè en ed-umanen edezeeti is Jerusalem, ne is menge meǥinged kayi ebpengungubpaan en he wazà ebpekezezaat kandan.