Jeremias 3:13 - Manobo Western Bukidnon OT

¹³ Engkena nu zà he nekesalè ka pinaaǥi te kebpekidsukulè nu te Nengazen he Megbevayè nu, wey midsunud ka te zuma he menge ed-ezapen pinaaǥi te ked-ezapa nu kandan diyà te sihung te kada merapung he kayu. Engkena nu he wazè ka mebpezumazuma kediey. Iyan a is Nengazen, is migkaǥi kayi.”

Jeremias 3:13 교차 참조

Nehemias 9:2

Wazè dan ipetampu is kenà menge Israilihanen. Midhitindeg dan ne intug-an dan is menge salè dan wey is menge salà te menge kepuun dan.

Erubasa 28:13

Is etew he id-eles din is menge salè din ne kenà ed-uswag, iyan, is etew he idtug-an din wey ed-engkezan din te ed-ulaula is menge salè din, igkehizu sikandin te Megbevayà.

Isaias 57:5

Ed-ezapen niw is menge ed-ezapen pinaaǥi te kebpekidhilavet diyà te sihung te kada merapung he kayu. Ibpemuhat niw pa is menge anak niw ziyà te zal-ug he alug te menge kelendiǥan.

Jeremias 14:10

Iyan heini tavak te Nengazen te menge etew: “Ingkelipey niw is kebpekeziyu kediey; mid-ulaula niw is minsan hengkey he egkesuatan niw. Umbe kenè ku en sikiyu egkilelaan he menge etew ku. Edtentenuzan ku is kelelalung niw ne edsilutan ku sikiyu tenged te menge salè niw.”

Jeremias 14:20

He Nengazen, mid-angken dey is kelelalung dey wey is menge salà te menge kepuun dey. Nekesalè key ziyà te kenikew.

Jeremias 2:20

“Hein menge uripen kew pa, iring kew te vaka he mid-eyuǥuwan wey pinirisu he migkedinahan, piru hein midlibri ku en sikiyu, kenè kew ebpenilbi kedì. Mid-azap kew hinuun te zuma he menge ed-ezapen diyà te kada metikang he vuvungan wey ziyà te sihung te kada merapung he kayu. Iring kew te vahi he ebelegyà te zengeg din.

Jeremias 2:25

“Sikiyu is menge Israilihanen, egkehilis en is sendalyas niw, wey egkemezahan en is bekereng niw te kedtulung niw kedtundug te zuma he menge ed-ezapen. Egkaǥi kew pa te, ‘Kenà egkehimu ke ed-iniyuǥan dey is duma he menge ed-ezapen. Mahal zey sikandan ne edsunud key kandan.’

Jeremias 3:2

“Tengtengi niw is demilag te menge vuvungan. Duen pe be lugar zutun he wazè niw meremeriki? Midremerikan niw is tanà pinaaǥi te ked-azap niw te zuma he menge ed-ezapen wey menge kelelalung niw. Iring kew te vahi he ebelegyà te zengeg din he ebpimpinuu ziyà te kilid te zalan is edtaǥad te maama. Iring kew zaan te tulisan he ed-ayan te egkeizen din.

Jeremias 3:25

Ereg key he ed-eles tenged te kegkeeled su sikami wey is menge kepuun dey nekesalà diyà te kenikew, Nengazen he Megbevayè dey. Puun pa te kegkevatè dey taman en guntaan ne wazè key medsunud kenikew.”

Jeremias 3:6

Dutun te timpu te kedhadì ni Josia migkaǥi is Nengazen kayi te kedì te, “Neehè nu ve is mibeelan te kenà menge metinumanen he menge Israilihanen? Mid-azap dan is duma he menge ed-ezapen diyà te kada metikang he vuntud wey ziyà te sihung te kada merapung he kayu. Iring sikandan te vahi he ebelegyà te zengeg din.

Jeremias 7:24

“Piru wazè dan mebpemineg wey medtuman te migkaǥi ku. Su iyan dan mibpezumdumahan is indikta te mezaat he gehinawa zan. Wazà sikandan med-uvey kayi te kedì, kekenà, mid-iniyuǥan e zan.

Jeremias 7:26

Piru wazè niw sikandan pemineǥa wey tuuwi. Edhuna kew pa he menge mesinupaken wey edhuna pa he mezaat is menge vaal niw kenà te menge kepuun niw.

Ezekiel 16:15

“ ‘Piru midsarig ka te kempet nu, ne migamit nu he puhunan is bentuǥan nu zutun ke kebpelelevag nu. Imbeǥey nu is keugelingen nu ziyà te minsan hentei he maama he edsaǥad, ne mibpurungan ke zan pemulpulusi.

Hoseas 5:15

Ne kegkepasad dutun edlikù a ziyà te lugar ku, taman te ed-engkenen dan is menge salè dan. Ne edangep dan kayi te kedì tenged te kegkerasey zan.”

Deuteronomio 12:2

Emun edsegseǥen niw en is menge etew he ebpen-ubpà dutun, purungi niw pemengkaǥa is langun he menge lugar he zutun dan ed-ezapa is ebpen-ezapen dan he tarù he menge megbevayà he ziyà te metikang wey mevavà he menge vuntud wey sihung te merapung he menge kayu.