Jeremias 29:23 - Manobo Western Bukidnon OT

²³ Egkehitavù heini kandan su nekevaal zan te mezaat he vaal ziyà te Israel. Nengumpadi sikandan te esawa te zuma wey migamit dan is ngazan ku zutun te kedtarùtarù dan, ne wazà ku isuǥù kandan is kebaal kayi. Netuenan ku heini is mibeelan dan, ne igkepeehè ku is puriba kayi. Iyan a, is Nengazen, is migkaǥi kayi.”

Jeremias 29:23 교차 참조

Genesis 31:50

Emun ebpesipelahan nu is menge esawa nu he menge anak ku, wey emun ebpengesawa ke pa te zuma pa he vahi, tentenuzi nu he minsan ke kenè ku egkaahà, egkeehè ka mulà te Megbevayà he iyan ebpenistiǥus te neuyunan ta.”

Genesis 34:7

Ne hein netudtulan is menge anak ni Jacob he menge maama zutun te neulaula, segugunè dan mid-ulì. Utew mibmezaat is gehinawa zan ne utew zan egkepeuki si Shekem tenged te mid-ulaula zin he kenà meupiya he vaal, he nekeveǥey te keelezan te pemilya ni Jacob.

2 Samuel 13:12

Migkeǥiyan ni Tamar sikandin te, “Kenà a leyuǥa! Telesuled ki! Kenè nu veeli heini is mekeeled-eled he vaal kayi te kedì. Kenà heini engayan he egkeulaula kayi te Israel.

Erubasa 5:21

Su egkaahà te Nengazen is langun he menge vaal nu. Ne minsan hendei ka ebpevayà ne egkeehè ke zin.

Jeremias 13:27

Neehè ku is utew mezaat he menge vaal niw he iyan is ked-azap niw te zuma he menge ed-ezapen diyà te menge vuvungan wey menge vevesukà. Neiring kew te vahi he mengungumpadi he utew subra is kegkeeriǥi zin, wey te mekeeled-eled he vahi he ebelegyà te zengeg din. Mekehizuhizu kew is menge tig-Jerusalem! Keenu vuwa egkaawà is keremerik niw?

Jeremias 16:17

Neehè ku is langun he menge vaal zan. Wazà nekeeles kayi te kediey. Neehè ku is menge salè dan.

Jeremias 23:14

Piru neehè ku he edlavew pa he lalung is menge ebpeneuven diyà te Jerusalem. Mid-azap dan te zuma he menge ed-ezapen ne midtarùtarù dan pa. Ed-iniyaten dan is menge lalung te kebpeiseg te kelelalung dan. Umbe wazè dan engkezi is kelelalung dan. Is menge etew ziyà te Jerusalem, iring kezaat te menge etew ziyà te Sodom wey Gomora.

Jeremias 23:16

Migkeǥiyan te Nengazen he Mekeǥeǥehem is menge etew ziyà te Jerusalem te, “Kenè kew pemineg te egkeǥiyen kayi te teruen he menge ebpeneuven. Ibpeperateng kew zan dà te tarù. Is egkeǥiyen dan he nengelewasan dan ne kenà diyà ebpuun te kediey su ziyè dà te isip dan.

Jeremias 23:21

Wazè ku suǥua heini he menge ebpeneuven, piru migenat sikandan gihapun. Wazè ku sikandan lelaǥi, piru nenagnè dan ded.

Jeremias 23:32

Kuntada ku is menge ebpeneuven he ebpenudtul te tarù he menge teǥeinep dan, ne midtazin dan is menge etew ku pinaaǥi te kebpenarùtarù dan. Wazè ku sikandan suǥùa te kebpenudtul. Umbe, wazà minsan hengkey he keupiyaanan he igkeveǥey zan diyà te menge etew. Iyan a, is Nengazen, is migkaǥi kayi.

Jeremias 29:21

Iyan heini migkaǥi te Nengazen he Mekeǥeǥehem, he Megbevayà te Israel, mehitenged ki Ahab he anak ni Kolaya wey ki Zedekia he anak ni Maasea, “Heini he menge etew egkaǥi te tarù diyà te keniyu, ne egemiten dan is ngazan ku. Umbe ibeǥey ku sikandan ki Hadì Nebucadnezar he hadì te Babilonia ne ibpehimetayan din sikandan diyà mismu te etuvangan niw.

Jeremias 29:31

“Ipetueni heini he menge lalag te langun he menge vihag. Keǥiyi nu sikandan he iyan heini migkaǥi ku vahin ki Shemaya he tig-Nehelam: Wazè ku suǥùa si Shemaya te kebpenudtul ziyà te keniyu. Impetuu kew zin te tarù din.

Jeremias 5:8

Neiring sikandan te menge tudu he kudà he mibpelelevag is nepurungan meelimahi. Is kada sevaha kandan egkeeriǥan te esawa te zuma.

Jeremias 7:11

Egkeisip niw ve he heini is baley ku, he mibpili ku he kayi a ebeǥayi te zengeg, egkehimu he elesà te menge tulisan? Neehè ku is langun he mezaat he menge vaal niw keniyan. Iyan a, is Nengazen, is migkaǥi kayi.

Ezekiel 35:13

Mibpahambug kew zaan wey minsan hengkey zà is ebpengeǥiyen niw he ebpekesuǥat kediey, ne nezineg ku heini.

Zefanias 3:4

Is menge ebpeneuven diyà te kandan ne menge teruen ne kenà egkeseriǥan. Midremerikan te menge memumuhat dan is baley te Nengazen wey midsupak dan is Kesuǥuan te Megbevayà.

Malakias 2:14

Ed-insè kew ke maan is wazè din seǥipaa is menge ibpemuhat niw. Tenged te iyan is Nengazen nenistiǥus he wazè niw tumana is penaad niw ziyà te esawa niw he impenangdù niw zutun te kebpengesawa niw hein menguhed kew pa. Midrapas niw is penangdù niw te esawa niw he mebmetinumanen kew kandan.

Malakias 3:5

Migkaǥi is Nengazen he Mekeǥeǥehem te, “Edhendiyà a te keniyu su edhukum a. Segugunè ku ibpetueni is menge salà te menge veyilan, menge mengungumpadi, menge ebpenistiǥus te tarù, menge egalen he ebpenlimbung, menge ebpemintahà te menge valu he vahi wey menge ilu, wey menge lumelengyawà, wey is menge wazè dan kedtahud kedì.”

Zatù 11:10

Ne midtavak dan te, “Uya, iyan ka edhimuwen dey he pengulu. Ne iyan ebpeketistiǥus kayi is Nengazen.”