Jeremias 29:10 - Manobo Western Bukidnon OT

¹⁰ Iyan a, is Nengazen, migkaǥi he emun egketapus en is 70 he tuig he kebpensakup te Babilonia, ne edlikuan ku sikiyu ne edtumanen ku is insaad ku he idlikù ku sikiyu ziyà te keniyu he lugar.

Jeremias 29:10 교차 참조

2 Cronica 36:21

Umbe, netuman is migkaǥi te Nengazen pinaaǥi te ebpeneuven he si Jeremias he egkehimu he mekevulungbulung haazà is tanà ne ebpekehimeley heini seled te 70 he tuig.

2 Cronica 36:22

Dutun te nehuna he tuig te kedhadì ni Cyrus diyà te Persia, insavuk te Nengazen diyà te ǥehinawa ni Cyrus he medsurat te sevaha he pehibelu he ibpehibelu ziyà te tivuuk he ginhedian din. Nehitavù heini su wey metuman is migkaǥi te Nengazen pinaaǥi ki Jeremias.

Ezra 1:1

Dutun te nehuna he tuig te kedhadì ni Cyrus diyà te Persia, insavuk te Nengazen diyà te ǥehinawa ni Cyrus he medsurat te sevaha he pehibelu he ibpehibelu ziyà te tivuuk he ginhedian din. Nehitavù heini su wey metuman is migkaǥi te Nengazen pinaaǥi ki Jeremias.

Ezra 1:2

“Iyan heini impehibelu ni Hadì Cyrus he hadì te Persia: “Imbeǥey kedì te Nengazen he Megbevayà diyà te langit, is langun he ginhedian kayi te kelibutan, ne insarig din kedì is kebangun diyà te Jerusalem he sakup te Juda te valey he para kandin.

Salmo 102:14

Su heini he inged mibmahal ǥihapun te menge etew nu he menge suluǥuen nu minsan pa te nezeetan en heini.

Jeremias 25:11

Egkehimu he mekevulungbulung heini is tivuuk he tanà. Heini he nasyun wey is menge nasyun diyà te peliǥuy kayi ebpenilbi te hadì te Babilonia seled te 70 he tuig.

Jeremias 25:12

“Iyan, emun egketapus en is 70 he tuig, edsilutan ku is hadì te Babilonia wey is menge etew zin tenged te salè dan. Edhimuwen ku zaan is nasyun dan he mekevulungbulung taman te taman.

Jeremias 27:7

Ebpenilbi kandin is menge etew ziyà te langun he menge nasyun. Ebpenilbi zan daan te menge anak din wey menge apù din taman te timpu he iyan en maan edezeetan is Babilonia. Dutun he timpu, iyan en maan ebpekepenilbi is menge tig-Babilonia te mahabet he menge nasyun wey te mekeǥeǥehem he menge hadì.

Jeremias 29:28

Mibpesuratan key zin pa ganì kayi te Babilonia he egkeuǥet key pe kun kayi. He ke sikandin te mebpetukud key te menge valey he egkeubpaan dey, wey mebpemula key wey megkaan key te menge sebpet dey.’ ”

Jeremias 29:32

Umbe, migkaǥi a, is Nengazen te, ‘Edsilutan ku sikandin wey is menge kevuwazan din. Wazà minsan sevaha te menge kevuwazan din he ebpekaahà te meupiya he ebeelan ku ziyà te keniyu, su mibpenurù kew zin te kebpekidsukulè kedì. Iyan a, is Nengazen, is migkaǥi kayi.’ ”

Jeremias 30:3

Su egkeuma is timpu he ibpeuli ku is nengevihag he menge etew ku he menge tig-Israel wey menge tig-Juda ziyà te tanè dan. Uya, ibpeuli ku sikandan diyà te tanà he imbeǥey ku ziyè te menge kepuun dan wey zan meengken. Iyan a, is Nengazen, is migkaǥi kayi.”

Jeremias 33:14

Migkaǥi pa is Nengazen te, “Egkeuma is timpu he edtumanen ku is meupiya he insaad ku te menge etew ziyà te Israel wey Juda.

Ezekiel 11:17

Umbe siak, is Nengazen he MEGBEVAYÀ migkaǥi a he ed-umanan ku sikiyu edtiǥuma puun te menge nasyun he zutun kew mekepeyapat, ne id-uman ku ibeǥey keniyu is tanà he Israel.

Zefanias 2:7

Is tanè niw ed-engkenen te egkesamà he menge etew te Juda. Dutun sikandan ebpemepenabtab te menge uyaǥen dan, ne emun mezukilem diyè dan edhizeǥà te menge valey ziyà te Ashkelon. Edtentenuzan sikandan te Nengazen he Megbevayè dan ne idlikù din is meupiya he kebpekesavuk dan.”

Zacarias 1:12

Ne migkaǥi is belinsuǥuen te Nengazen te, “Nengazen he Mekeǥeǥehem, 70 en he tuig is kegkepeuki nu te menge tig-Jerusalem wey menge meǥinged diyà te zuma he menge inged diyà te Juda. Keenu nu pa edtepusa is kenè nu kegkehizuwi kandan?”

Zacarias 7:5

“Keǥiyi nu is langun he menge etew te Israel ragkes en is menge memumuhat, he is kebpuasa zan wey kedseengseeng dan te kada ikelima wey ikepitu he vulan seled te kepituwan en he tuig wazè dan himuwa para kediey.

Ruth 1:6

Hein netuenan ni Naomi he edtentenuzan te Nengazen is menge etew zin pinaaǥi te kebeǥayi zin kandan te meupiya he sebpet, ne mibpenines sikandin wey ambey zin su edlikù dan diyà te Juda.