Jeremias 25:7 - Manobo Western Bukidnon OT

⁷ Piru wazè kew iyan mebpemineg te Nengazen. Midhimu niw he mepauk sikandin pinaaǥi te menge vineelan niw he zuma he menge ed-ezapen. Umbe iyan kew mismu mid-uwit te silut para keniyu.

Jeremias 25:7 교차 참조

2 Hadì 17:17

Impemuhat dan is menge anak dan pinaaǥi te hapuy; midangep dan diyà te menge menenagnà wey menge veyilan; mibpevayèbayè dan te mezaat he vaal ziyà te etuvangan te Nengazen, ne utew ingkepauk heini te Nengazen!

2 Hadì 21:15

Egkehitavù heini kandan su mezaat is mibeelan dan diyà te etuvangan ku, ne midhimu zan he mepauk a, puun pa te kegawas te menge kepuun dan diyà te Ehipto taman en guntaan.”

2 Cronica 24:19

Mibpevayaan te Nengazen te menge ebpeneuven din is menge etew su wey zan mekelikù diyà te kandin. Ne minsan mibpetizeenan sikandan te menge ebpeneuven, ne wazè dan mebpemineg.

Nehemias 9:26

“Piru minsan pa te iyan haazà, midsupak dan wey nekidsukulà kenikew. Mid-iniyuǥan dan is Kesuǥuan nu. Mibpenhimetayan dan is menge ebpeneuven nu he ed-umew kandan te kedlikù diyà te kenikew. Utew subra is kedsumpelita zan kenikew!

Erubasa 8:36

Piru is etew he wazà meketuredu kedì, edezeetan din is keugelingen din. Ne is langun he egkeepes kedì, ne iyan dan egkesuatan is kemetayen.”

Jeremias 19:15

“Pemineg kew, su iyan heini migkaǥi te Nengazen he Mekeǥeǥehem, he Megbevayà te Israel: Ibpaaǥi ku kayi he inged wey ziyà te menge inged he nekeelingkus kayi is kezeetan he nekaǥi ku he idezaat kandan, geina te utew sikandan mesinupaken ne wazè dan mebpemineg te menge lalag ku.”

Jeremias 22:21

Mibpetizeenan ku sikiyu hein meupiya pa is kebpekesavuk niw, piru wazè kew mebpemineg. Iyan en iyan heeyan betasan niw puun pa te kegkevatè niw; wazè kew mebpezumazuma kedì.

Jeremias 25:8

Umbe, iyan heini migkaǥi te Nengazen he Mekeǥeǥehem: “Ǥeina te wazè kew mebpemineg te menge lalag ku,

Jeremias 29:19

Su wazà sikandan mebpemineg te menge lalag ku he layun ku ibpetudtul ziyà te kandan pinaaǥi te menge suluǥuen ku he menge ebpeneuven ku, wey minsan sikiyu is nevihag en wazè kew ǥihapun mebpemineg.”

Jeremias 44:7

“Umbe siak, is Nengazen he Megbevayà he Mekeǥeǥehem, he Megbevayà te Israel mid-insà te: Maan is midezeetan niw is keugelingen niw? Egkesuat kew ve he maamin is menge etew te Juda–is menge maama, is menge vahi, is menge vatà, wey is menge edsusu pa?

Jeremias 44:8

Maan is midhimu niw he mepauk a pinaaǥi te kebaal niw te menge ed-ezapen? Edtutung kew pa te veyewà para kayi zini te Ehipto he iyan ed-ubpaan niw guntaan. Pinaaǥi kayi midezeetan niw is keugelingen niw wey midhimu niw he telemayen wey mekeeled-eled diyà te etuvangan te menge etew ziyà te langun he nasyun kayi te kelibutan.

Zacarias 1:4

Kenè niw iringi is mibeelan te menge kepuun niw. Impekeǥiyan ku sikandan dengan te menge ebpeneuven he iniyuǥi zan en is mezaat he menge vaal zan, piru wazà sikandan medtuu. Wazà sikandan mebpezumazuma kedì.

Deuteronomio 32:21

Impepengelikud e zan pinaaǥi te ked-azap dan te kenà tutuu he megbevayà, ne midhimu zan he mepauk a pinaaǥi te ked-azap dan te wazè din pulus he menge ed-ezapen. Kela su nasì ku edhimuwa he mesina zan te zuma he etew. Edhimuwen ku he mepauk dan pinaaǥi te kedtuvazi ku te menge etew he tulebung.