Jeremias 25:30 - Manobo Western Bukidnon OT

³⁰ “Jeremias, keǥiya nu ziyà te kandan is langun he migkaǥi ku, ke sikew te: ‘Puun te langit iring te erimaung he edhiniǥer is Nengazen; edraǥeb is laǥeng din he ebpuun diyà te segradu he ubpeey zin. Ebpekezeǥingen din is kedhinigera zin te menge etew zin. Egkulehian din is langun he ed-ubpà kayi te kelibutan iring te etew he ebpengulahì emun egkeres sikandin te paras.

Jeremias 25:30 교차 참조

2 Samuel 15:25

Ne migkeǥiyan ni David si Zadok te, “Ilikù kes Kavan te Kebpekid-uyun te Megbevayà diyà te Jerusalem. Emun meupiya is gehinawa te Nengazen kedì, ne ibpelikù e zin diyà te Jerusalem ne egkeehè ku zed heini wey is lugar he egkesevukan din.

1 Hadì 9:3

Migkaǥi is Nengazen diyà te kandin te, “Nezineg ku is ampù nu wey hangyù nu kayi te kediey. Heini is baley ku he mibangun nu, mibpilì ku heini he lugar he kayi a ebeǥayi te zengeg taman te taman. Ebentayan ku heini wey layun ku ed-etura.

2 Cronica 30:27

Ne zutun midhitindeg is menge memumuhat wey menge Levihanen ne mibpenubtuvazan dan is menge etew. Ne mibpemineg heini te Megbevayà he ziyà te segradu he ubpeey zin diyà te langit.

Salmo 11:4

Diyà is Nengazen ed ubpà te segradu he valey zin; diyà te langit is pinuuwè din te kedhadì. Ed-ahaan din wey edsusiyen din is langun he menge etew.

Salmo 132:14

“Iyan heini ubpeey ku taman te taman; kayi a ed-ubpà su kayi a egkesuat.

Salmo 46:6

Egkengeheratan is menge nasyun; egkengehuyung is menge ginhedian. Tenged te kulehian te Megbevayà henduen be te egketunew en te kegkahandek is menge etew kayi te tivuuk he kelibutan.

Salmo 78:65

Piru nehitavù he henduen be te neelimukawan is Nengazen; neiring sikandin te mezesen he etew he mibmevurut tenged te vinu.

Isaias 16:9

Umbe edsineǥew a, iring te tig-Jazer he midsineǥew tenged duen te pemuleey te paras diyà te Sibma. Edsineǥawan ku is Heshbon wey Eleale su kenè ne egkezineg dutun is kedlipey te menge kedraǥun dan.

Isaias 33:3

Ebpemelaǥuy is menge etew emun egkezineg dan is daǥing te laǥeng nu he henduen be te ruǥung. Emun edhitindeg ka su edsilut ka ebpekedsusuwey is menge etew ziyà te menge nasyun.

Isaias 42:13

Ebpekidtebek is Nengazen he iring te sundaru he andam en he ebpekidtebek. Ebpengulahì sikandin he tuus te edsurung en, ne egkezaag din is menge kuntada zin.

Jeremias 17:12

He Nengazen, is baley nu iyan mekempet he pinuuwè nu te kedhadì puun pa zengan.

Jeremias 25:38

Is Nengazen, egkeiring te erimaung he migawas puun te elesè din su ebpen-ahà te edewiyen din. Egkehimu is tanà he mekevulungbulung tenged te tebek, wey tenged te utew kegkepauk te Nengazen.

Jeremias 48:33

Kenè en egkezineg diyà te tanà te Moab is kedlipey wey keguǥusà diyà te vevesukà wey menge pemuleey te paras. Wazè en edtudà he vinu ziyà te keresà. Wazè en egkeres te paras he ed-uruhuy tenged te kegkelipey zin. Duen hinuun kulehian piru kenà kulehian tenged te kegkelipey.

Hoseas 11:10

“Edsunud kew kediey zutun te edhiniǥer a iring te erimaung. Siguradu he edhiniǥer a, ne ed-agpas kew ed-ulì puun te edsenlepan.

Hoseas 5:14

Su edsurungen ku is Israel wey Juda he iring a te erimaung he ebpitaspitas te egkezawi zin. Iyan a mismu edezaat kandan. Ed-uwiten ku sikandan diyà te zuma he menge nasyun, ne wazà ebpekelibri kandan.

Joel 3:16

Eghiniǥer is Nengazen he ebpuun te Zion; edraǥeb is laǥeng din he ebpuun te Jerusalem. Ne tenged kayi egkehuyung is kelibutan wey is langit. Piru melig-en he eputà is Nengazen para te menge Israilihanen he menge etew zin.

Amos 1:2

Migkaǥi si Amos te, “Edhiniǥer is Nengazen he ebpuun te Zion; edraǥeb is laǥeng din puun te Jerusalem. Ne tenged kayi nengeǥangu is menge pepenebtavà te menge vantey te menge kerehidu ragkes en is menge pinemula ziyà te puntur te Buntud he Carmel.”

Amos 3:8

Hentei man is kenà egkahandek emun edhiniǥer is erimaung? Hentei man is kenà ebpekekaǥi te menge lalag te Nengazen he MEGBEVAYÀ emun iyan en is Nengazen he MEGBEVAYÀ ebpekaǥi kandin?

Zacarias 2:13

Ebmelinawen is langun he menge etew ziyà te etuvangan te Nengazen, su ebpekeuma sikandin puun te segradu he ubpeey zin.

Deuteronomio 26:15

Seǥipaa key kenikew puun diyan te segradu he ubpeey nu ziyan te langit, ne tuvazi nu is menge etew nu he Israilihanen wey is meupiya wey selebpeten he tanà he imbeǥey nu kenami sumalà is impenangdù nu ziyà te menge kepuun dey.’