Jeremias 18:19 - Manobo Western Bukidnon OT

¹⁹ Umbe, mid-ampù a, ke siak te, “He Nengazen, tevangi a! Pemineǥa nu is ebpengeǥiyen te menge kuntada ku he idezaat dan kedì.

Jeremias 18:19 교차 참조

2 Hadì 19:16

Nengazen, pemineg ka, ne tengtengi nu is langun he nehitavù. Pemineǥa nu is langun he migkaǥi ni Senakerib te ked-undaunda kenikew te uuyag he Megbevayà.

Nehemias 6:9

Netuenan ku he ebpelihendeken key zan su para mekeengked key he edterebahu. Piru mid-ampù a ziyà te Megbevayà he lig-eni e zin pa.

Salmo 109:28

Midrewakan e zan, piru edtuvazan a mulà kenikew. Egkepeel-elezan is menge kuntada ku emun edsurungen e zan, ne egkelipey a mulà is suluǥuen nu.

Salmo 109:4

Minsan ebpekid-emiǥu a kandan, ne edtebeken e zan; piru in-ampù ku ǥihapun sikandan.

Jeremias 18:18

Ne migkaǥi is menge etew te, “Hendini kew, su ebpen-ehè kiw te paaǥi wey tew ikepeengked si Jeremias te kegkaǥi! Duen tew man daan menge memumuhat he ebpekepenurù kenitew te kesuǥuan wey menge ebpeneuven he ebpekeseysey ziyà te kenitew te menge lalag te Megbevayà. Umbe ebaal kiw te serupet he tudtul he ebpekezezaat kandin ne kenè tew en ebpemineǥen is ebpengeǥiyen din.”

Jeremias 18:20

Meupiya is mibeelan ku ziyà te kandan ne ebelesan e zan te mezaat. Mibangbang sikandan su para meulug a zutun. Tentenuzi nu he midangep a ziyà te kenikew te kedhangyù he kenè nu en sikandan kepeuki.

Jeremias 20:12

He Nengazen he Mekeǥeǥehem, netuenan nu ke hentei is metazeng. Netuenan nu is gehinawa wey isip te etew. Ipeehè nu kedì is penimales nu kandan, su insarig ku kenikew is kasu ku.

Penhulùhulù 3:59

Neehè nu Nengazen, is mezaat he mibeelan te menge kuntada ku kayi te kediey, umbe beǥayi a te hustu he kukuman.

Micas 7:8

Migkaǥi is menge Israilihanen te, “Kenà ereg he edsudì kenitew is menge kuntada tew. Su minsan nezeetan kiw ne ed-uman kiw ed-enew. Wey minsan diyè kiw te merusirem ne iyan is Nengazen kerayag tew.