Isaias 66:4 - Manobo Western Bukidnon OT

⁴ Ne gawas keniyan, ebpeeǥiyan ku zaan sikandan te silut he igkeherati zan. Su hein nengumew a, wazà sikandan medtavak; ne hein migkaǥi a, wazà sikandan mebpemineg. Mibaal sikandan te kelelalung diyà te etuvangan ku, ne ke hengkey is kenè ku egkesuatan iyan ebeelan dan.”

Isaias 66:4 교차 참조

2 Hadì 21:2

Mezaat is ulaula zin diyà te etuvangan te Nengazen. Mid-iringan din is utew mezaat he menge vaal te menge etew ziyà te menge nasyun he impesegseg te Nengazen te menge Israilihanen.

2 Hadì 21:6

Impemuhat ni Manase is keugelingen din he anak pinaaǥi te hapuy. Mibaal zaan sikandin te menge vaal te menge veyilan wey menge menenagnà, ne ed-insà daan sikandin diyà te menge veyilan he ebpekidlalag te ǥimukud te nemematey en. Utew subra is kebaal zin te salà diyà te Nengazen, ne ingkepauk heini te Nengazen.

Salmo 81:12

Umbe, mibpesagdan ku sikiyu te kebmesinupaken niw, ne mibeelan niw is egkesuatan niw.

Erubasa 1:24

Tenged te kenè kew ebpezumazuma te ked-umew ku wey kenà a keniyu edseǥipaan,

Erubasa 10:24

Iring te is igkeherati te etew he mezaat is menge ulaula zin, ne egkelaus egkehitavù diyà te kandin, is etew he metazeng, egkekuwa zin is edtinguhaan din.

Isaias 50:2

Maan is hendei kew vuwa hein nekeuma a? Maan is wazà midtavak te pengumawan ku? Kenè e ve ebpekehimu he edlibri keniyu? Egkehimu ku man ganì te ebpekemaza is daǥat pinaaǥi zà te kedsuǥù ku wey kedhimu te menge wahig he iring te disirtu he egkehimu he hinungdan te kebpematey te menge isdà.

Isaias 59:15

Uya, naawè en is ketutuanan, ne is menge edlikey te kebaal te mezaat ne ebpesipelahan. Naahà heini te Nengazen, ne wazè din ikelipey is kenà ked-ikul te hustu he kukuman.

Isaias 59:7

Elistu kew he ebaal te salà ne abtik kew he edhimatey te wazà mekesalà. Mezaat is menge ed-is-isipen niw, ne minsan hendei kew ebpevayà ne ebpendezaat kew.

Isaias 65:12

Is ukur niw ne iyan is kemetayen, ne egkeamin kew ebpematey, su hein nengumew a ne wazè kew medtavak, ne hein migkaǥi a ne wazè kew mebpemineg. Mibaal kew te mezaat diyà te etuvangan ku, ne ke hengkey is kenè ku egkesuatan, ne iyan ebeelan niw.

Isaias 65:2

“Edsigudu ad edtaǥad he mekelikù kayi te kedì is menge etew ku he menge mesinupaken, he wazà med-ikul te meupiya he vetasan, su iyan dan dà ebpezumdumahan is keugelingen dan he isip.

Isaias 65:3

Edhimuwen dan he mepauk a; ibpeehè dan diyà te etuvangan ku is kebpedayun dan ked-azap te menge ed-ezapen dan pinaaǥi te kebpemuhat dan diyà te menge pemuleey zan wey kedtutung te veyewà diyà te atep te menge valey zan.

Jeremias 35:17

Umbe, siak, is Nengazen he Megbevayà he Mekeǥeǥehem, he Megbevayà te Israel, migkaǥi te: Pemineg kew! Is menge etew ziyà te Juda wey Jerusalem, ibpaaǥi ku ziyà te keniyu is langun he kezeetan he migkaǥi ku he idezaat keniyu. Mibpekidlalag a keniyu piru wazà a keniyu pemineǥa; mid-umew ku sikiyu piru wazè kew medtavak.”

Jeremias 7:13

Dutun te kebeeli niw kayi te mezaat he menge vaal, edtulungan ku en sikiyu ebpetizeeni, piru wazè kew mebpemineg. Mid-umew ku sikiyu piru wazè kew medtavak.

Jeremias 7:30

Migkaǥi is Nengazen te, “Mezaat is menge vaal te menge etew ziyà te Juda. Diyè dan ipenavuk is utew mezaat he menge ed-ezapen dan te valey ku, he mibpili ku he zutun a ebeǥayi te zengeg, ne tenged dutun mibmeremerik heini.

Ezekiel 11:8

Egkahandek kew te tebek, piru ibpesurung ku sikiyu te menge kuntada niw. Iyan a, is Nengazen he MEGBEVAYÀ, is migkaǥi kayi.

Ezekiel 14:4

Guntaan, keǥiyi nu sikandan he siak, is Nengazen he MEGBEVAYÀ, migkaǥi a he is minsan hentei he Israilihanen he utew zin mibmahal is menge ed-ezapen din he iyan midsinumag kandin wey mekesalà, emun ebpenginginsà sikandin diyà te ebpeneuven ku mehitenged te menge lalag ku, ne siak is Nengazen, iyan a mismu edtavak kandin pinaaǥi te silut sumalà te kahabet te menge ed-ezapen din.

Ezekiel 20:25

Umbe, mibey-anan ku en sikandan he ebpedayun edtuman te menge suǥù wey menge sulunuzen he kenà meupiya wey kenà ebpekeveǥey kandan te meluǥayad he untung.

1 Samuel 8:19

Piru wazè dan pemineǥa is menge sambag ni Samuel. Ke sikandan te, “Kenà egkehimu! Egkesuatan dey he zuen hadì he ed-uwit kenami.