Isaias 3:8 - Manobo Western Bukidnon OT

⁸ Kenà duwazuwa he egkezeetan is Jerusalem wey is Juda, tenged te iyan dan ebeelan wey ebpengeǥiyen is igkeepes te Nengazen. Wazè dan mebpezizalem te zekelà he keǥehem te Nengazen.

Isaias 3:8 교차 참조

2 Cronica 28:18

Ne gawas kayì, midsurung daan te menge Filistihanen is menge inged te Juda he ziyà te menge mibuntud-buntud diyà te edsenlepan wey te Negev. Ne naaǥew zan is Bet Shemesh, Ayalon, Gederot, Soco, Timnah, wey Gimzo, ragkes en is menge lugar he nekelingut kayi ne zutun en sikandan med-ubpà.

2 Cronica 33:11

Umbe, impesurung sikandan te Nengazen te menge sundaru te Asiria. Mibihag dan si Manase, migkew-itan dan is izung din, migkedinahan dan te brunsi, ne miduma zan diyà te Babilonia.

Erubasa 26:27

Is ebangbang para meulug is duma, iyan sikandin egkeulug dutun. Is edlilid te vatu su wey melilizi is duma, iyan sikandin egkelikuan egkelilizi zutun.

Isaias 1:7

Nehimu he mekevulungbulung is nasyun niw; ne nengevinsulan is menge inged niw. Ne nevembentayan niw is kebpenguwaa te menge veǥas te pinemula niw ziyà te vevesukè niw te menge etew ziyà te zuma he lugar. Edezeetan dan is tanè niw taman te kenè en heini egkepulusan.

Isaias 49:19

Nezeetan ka wey nehimu he mekevulungbulung, piru ǥuntaan ed-ubpaan ke en te menge etew nu; hapit sikandan kenà ed-ereg diyà te kenikew. Ne sikan is menge midezaat kenikew ne ebpekepeziyù en.

Isaias 57:4

Ed-un-undahan niw is menge metazeng; ebingiǥan niw wey edyewyawan sikandan. Menge kevuwazan kew te menge mesinupaken wey menge teruen.

Isaias 59:3

Su ebpenhimatey kew te etew, wey ebaal kew te zuma pa he mezaat. Midtarùtarù kew wey migkaǥi kew te mezaat he menge lalag.

Isaias 6:11

Ne mid-insà a te, “Sengemenu is kegkeuǥet kayi, Nengazen?” Midtavak sikandin te, “Taman te egkengewaǥey is menge inged diyà te Israel ne wazè en duen menge etew. Taman te wazè en ebpen-ubpà diyà te menge valey, ne is tanà egkepurung en egkezeeti.

Isaias 9:17

Umbe kenà igkelipey te Nengazen is betan-en dan he menge maama, ne kenè din egkehizuwan is menge ilu kandan wey menge valu he vahi. Su lalung sikandan is langun ne kenà edsunud te Megbevayà; pudu mekeeled-eled is ebpengeǥiyen dan. Piru is pauk te Nengazen kenè pa egkeengked. Andam gihapun sikandin he edsilut kandan.

Jeremias 23:36

kenè te egkaǥi sikandin te, ‘Duen menge lalag he ibpetudtul kandin te Nengazen.’ Su iyan heini egkeǥiyen dan su para tuuwi sikandan te zuma, umbe egketuis is menge lalag te uuyag he Megbevayà, he Nengazen he Mekeǥeǥehem.

Jeremias 26:18

“Hein si Hezekia pa is hadì te Juda, si Mica he tig-Moreshet, midtudtul zin diyà te langun he menge etew kayi te Juda is menge lalag te Nengazen. Ke sikandin te, ‘Migkaǥi is Nengazen he Mekeǥeǥehem he edezeetan is Zion, is inged te Jerusalem. Egkeiring heini te mid-eradu he bevesukà, ne egkehimu heini he egketembuan te menge nengeǥevà. Ne egkehimu heini he ketelunan is buvungan he mibengunan te valey te Nengazen.’

Jeremias 26:6

edezeetan ku heini is baley ku iring te kedezeeti ku te Shilo. Ne heini he inged, edrewakan te menge etew ziyà te langun he menge nasyun kayi te tivuuk he kelibutan.”

Jeremias 4:13

Tengteng kew! Ebpekeume en is kuntada tew he iring te ǥapun. Is menge kerwahi zin, henduen be te eribpures, ne is menge kudè din, edhuna pa he elistu te menge mendereǥit. Mekehizuhizu kiw! Su egkezeetan kiw en.

Jeremias 44:3

tenged te mezaat he menge vaal te menge meǥinged duen. Midhimu zan he mepauk a pinaaǥi te kedtutungi zan te veyewà wey ked-ezapa zan te menge ed-ezapen he wazè dan duen hanew wey te menge kepuun dan.

Penhulùhulù 1:9

Is keremerik din naahà te langun. Wazè din isipa zengan is egkehitavù kandin. Utew sikandin nezeeti, ne wazà midtavang kandin. Umbe migkaǥi sikandin te, “He Nengazen, seǥipaa nu is kegkerasey ku, su nezaag a te kuntada.”

Ezekiel 8:12

Ne migkaǥi is Megbevayà kayi te kedì te, “Sikew is etew, neehè nu en be ke hengkey is ebeelan he meeles te menge edumala te Israel? Diyà is kada sevaha kandan te ruǥu te ed-ezapen din, su ke sikandan te, ‘Kenè kiw egkaahà te Nengazen; inselikwey zin en is Israel.’ ”

Ezekiel 9:9

Midtavak sikandin kediey te, “Utew en subra is salà te menge etew te Israel wey Juda. Subre en is kebpehimhimetayà ne wazè en hustu he kukuman diyà te inged. Egkaǥi pa sikandan te kenà edtengteng is Nengazen kenitew, su inselikwey zin en is Israel!

Hoseas 5:5

Is kegkemepelevawen niw iyan ebpengintutuu he ereg kew he edsilutan. Ne tenged te menge salè niw ne egkezeetan kew is menge tig-Israel zuma te menge tig-Juda.

Hoseas 7:16

Midangep dan diyà te wazè din pulus. Iring sikandan te nezeetan he panà he wazè din en pulus. Ebpatey te tebek is menge pengulu zan su wazè dan kedtahud emun egkaǥi zan. Tenged kayi ed-engitan sikandan te menge tig-Ehipto.

Micas 3:12

Umbe, tenged keniyu edezeetan is Zion he iyan is inged he Jerusalem. Egkeiring heini te mid-eradu he bevesukà, ne egkehimu heini he egketembuan te menge nengeǥevà. Ne egkehimu heini he ketelunan is buvungan he nevengunan te valey te Nengazen.”

Micas 6:12

Mesipala is menge sepian keniyu, ne menge teruen kew.

Habakuk 1:13

Geina te metazeng ka, ne kenè nu egkaantus is kedtengteng te kelelalung wey kegubut. Piru maan is mibey-anan nu zà is meluiven he menge tig-Babilonia? Maan is intuǥut nu he mezèdeeti zan is menge etew he emun idhindeg kandan ne edhuna sikandan he lalung?