4 Ipeubpè key is menge tig-Moab diyà te tanè niw. Pengelangi key keniyu te egkesuat he edezaat kenami.” Egkeengked is kebpendaagdaag wey kebpendezaat. Egkaawè en is ebpendaagdaag diyà te tanà he Israel.
Benar iyan, edtevangan te Nengazen is menge etew ziyà te Buvungan he Zion, ne edsilutan din mulà is menge tig-Moab. Edtekutakan din sikandan iring te kedtekutaki te reǥami ne ebpesegdanen en he meredak.
Mekehizuhizu kew is menge ebpendezaat he wazà mekesaǥad he edezeetan. Mekehizuhizu kew is menge meluiven he wazà mekesaǥad he edluivan. Emun egkepasad en is kebpendezaat niw wey kebpenluib, ne iyan kew en maan edezeetan wey edluivan.
Ibpekaan ku te menge midaagdaag kenikew is keugelingen dan he lawa, ne iring te vinu egkelangut dan te keugelingen dan he lengesa. Ne egketuenan te langun he etew he iyan a Nengazen, iyan a Menluluwas nu wey Perevelukas, iyan a Mekeǥeǥehem he Megbevayà ni Jacob.”
Nelipatan niw en be he iyan a mibaal keniyu? Iyan a midempas te langit wey mibpelastar te midtukuzan te kelibutan. Maan is nengungubpaan kew he layun egkahandek te pauk te ebpesipala wey egkesuat he edezaat keniyu? Is pauk dan kenè en ebpekekaid keniyu.
Ebmelig-en ka su edtinazeng is menge etew nu. Ebpeleǥuyan ka te menge kuntada nu, umbe wazè nu en igkahandek. Kenè en ed-uvey ziyà te kenikew is menge kuntada nu, ne kenè ke en egkeheratan.
Beǥayi niw te keenen is egkengevitil, ipeubpè niw ziyà te menge valey niw is menge wazà egkeubpaan, bistiyi niw is menge wazà bisti, wey tevangi niw is menge kezuzumahi niw he ebpenginahanglan.
Su ibpekeziyù nu sikandan diyà te midlupiglupig kandan. Iring sikandan te uyaǥen he ebedtien nu is id-eyuǥu zuen wey is tuked he idlagkut duen. Is ebeelan nu kandan iring te mibeelan nu zengan hein midaag nu is menge Midianhen.
Nezineg daan te menge Judio he nemelaǥuy ziyà te Moab, Ammon, Edom, wey zuma pa he menge nasyun he intuǥut ni Hadì Nebucadnezar he zuen egketaǥak he menge etew ziyà te Juda ne iyan midhimu si Gedalia he anak ni Ahikam wey apù ni Shafan he pengulu kayi he menge etew.
“Sikiyu is menge meǥinged diyà te Dibon, pekevavè kew ne lumpeng kew ziyà te tanà. Su is edezaat te Moab edsurung daan diyà te keniyu; ebengkaǥen dan is menge inged niw he mibpeliǥuyan te verengbeng.
“Ebpekeuma ziyà is ebpendezaat te kada inged, ne wazà inged he kenà egkezeetan. Egkezeetan daan is menge inged diyà te menge suǥud wey suǥud-suǥud diyà te vuvungan. Egkehitavù heini, su iyan a, is Nengazen, is migkaǥi kayi.
Wazè kew pezem med-ayan diyà te menge lembaǥan is ebpemenhimatey te ebpemelaǥuy he ebpuun te Jerusalem. Ne wazè niw pezem ipalad sikandan diyà te menge kuntada zutun te timpu te kedlised dan.”
Edsevaha is menge etew te Juda ne egkeiring sikandan te mezesen he menge sundaru he edaag te menge kuntada zan he henduen dà te vasak diyà te menge zalan he edtekutakan dan. Ebpekidtebek dan su ǥeina te siak is Nengazen, dume e zan. Ne edaaǥen dan is menge pereuntud te kudà.
Edtekutakan niw is lalung he menge etew ne egkeiring dà sikandan te igmuk he ebpenggiekan niw zutun te andew te kedhimuwa ku he mehitavù heini, migkaǥi is Nengazen he Mekeǥeǥehem.
