Isaias 10:6 - Manobo Western Bukidnon OT

⁶ Edsuǥuen ku is menge tig-Asiria te kedsurung te egkeepesan ku he nasyun. Heini is nasyun, kenà sikandan edsunud kedì te Megbevayè dan. Heini sikandan, edezeetan ku iring te vasak diyà te kersada he edtekutakan, wey mepenguwa te menge tig-Asiria is langun he menge azen dan.”

Isaias 10:6 교차 참조

2 Samuel 22:43

Midruntek ku sikandan taman te neiring en sikandan te eliyavuk. Midtekutakan ku sikandan he iring te tunaan diyà te menge zalan.

2 Hadì 18:25

Egkeisip nu ve he wazà a suǥua te Nengazen te kedhendini te kedezaat kayi he nasyun? Iyan mismu is Nengazen midsuǥù kedì te kedsurung wey kedezaat kayi he nasyun.”

Isaias 19:17

Igkahandek dan is Juda, minsan egkezineg dan dà is kegngezani kayi ne egkengeheratan en sikandan. Egkeulaula heini tenged te pelanu te Nengazen he Mekeǥeǥehem he nekesuǥat diyà te kandan.

Isaias 22:5

Su iyan en heini timpu he midtelaan te Nengazen he MEGBEVAYÀ he Mekeǥeǥehem he timpu te kegkegurigew, kebpemelaǥuy, wey kegkengeliveǥi te menge etew ziyà te suǥud-suǥud he zutun duen egkengelewasan. Egkengetempag is menge verengbeng kayi, ne is kulehian te menge etew ebpekeuma is kegkezineǥa zuen diyà te menge vuvungan.

Isaias 24:5

Midremerikan is kelibutan te menge meǥinged kayi, su wazè dan tumana is menge kesuǥuan wey menge sulunuzen he ibpesunud te Megbevayà. Midrapas dan is wazà pidtemanan he kebpekid-uyun te Megbevayà kandan.

Isaias 29:13

Migkaǥi is Nengazen te, “Heini he menge etew ziyè dà te vèbè dan is kedeliǥa wey kebeǥayi zan kedì te zengeg, piru meziyù kayi te kedì is gehinawa zan. Ne is ked-ezapa zan kedì, ne tenged dà te edtumanen dan is kandan dà he sulunuzen.

Isaias 32:6

Su tinulebung is egkeǥiyen te tulebung, ne is mezaat he isip din dutun is pelanu te kebaal te vaal he kenà sungkad te egkesuatan te Megbevayà, tarù is menge lalag din mehitenged te Nengazen, wey kenè din edseǥipaan is menge egkevitil wey egkemezahan.

Isaias 33:1

Mekehizuhizu kew is menge ebpendezaat he wazà mekesaǥad he edezeetan. Mekehizuhizu kew is menge meluiven he wazà mekesaǥad he edluivan. Emun egkepasad en is kebpendezaat niw wey kebpenluib, ne iyan kew en maan edezeetan wey edluivan.

Isaias 33:14

Mibpengerker tenged te kekahandek is menge mekesasalà diyà te Zion. Egkaǥi sikandan te, “Is Megbevayà, iring te edriyubriyub he hapuy he kenà egkeuvukan. Hentei man kenitew is ebpekeubpà diyà te etuvangan te Megbevayà?”

Isaias 41:25

Mibpilì ku he edumala is sevaha he etew he ziyà ebpuun te zizaya. Midangep sikandin kayi te kediey; ne ǥuntaan ebpekeuma sikandin puun te edsilaan. Edezeetan din is menge ebpemendumala iring te kedtekutaki te mendiziyun te vasak he ebeelan din he ziniyun.

Isaias 49:17

Hapit en ebpekeuma is ed-uman ebangun kenikew, ne ed-ewaan ke en duen te menge midezaat kenikew.

Isaias 49:25

Piru iyan heini egkeǥiyen te Nengazen: “Uya, egkelibri nu is menge mibihag te mesipala he menge sundaru, ne egkahawì nu is mibpen-aǥew zan. Su ebpekidtebek a te menge nekidtebek kenikew, ne edlibriyen ku is menge etew nu.

Isaias 5:25

Umbe tenged te utew kegkepeuki keniyu te Nengazen te menge etew zin, ne edsilutan kew zin. Egkehuyung is menge vuvungan ne ebpekepeyapat kew ziyà te kersada is ebpemematey he egkeiring te menge vesura. Ne minsan pa zutun kenè pa egkaawà is pauk te Nengazen. Andam pa ǥihapun sikandin he edsilut keniyu.

Isaias 5:29

Dutun te ked-surung dan ebpengulahì dan he iring te edhiniǥer he erimaung. Ne is egkebiktima zan, ed-uwiten dan diyà te meziyù ne wazà egkelibri kandan.

Isaias 5:5

“Guntaan egkeǥiyan ku sikiyu ke hengkey is ebeelan ku zutun te pemuleey ku. Id-awè ku is menge nenuvù diyà te nekeliǥuy kayi he iyan nehimu he kudal zin, wey ebengkaǥen ku is menge alad kayi su para penebtavà heini te menge langgam ne wey zan daan metekutaki.

Isaias 63:3

Midtavak is Nengazen te, “Tenged te pauk ku migkeres ku is menge etew ziyà te menge nasyun iring te paras. Iyan e zà migkeres kayi, ne wazà miduma kedì. Is lengesa zan, midresik diyà te visti ku, umbe nezekiyan heini.

Isaias 63:6

Tenged te pauk ku, midtekutakan ku is menge nasyun, ne impeziregdireg ku sikandan he iring te egkengelangut. Imperanew ku ziyà te tanà is lengesa zan.”

Isaias 7:17

Diyà te huziyan he timpu, sikew wey is menge etew nu, ragkes en is lavew he pemilya nu, ibpesurung te Nengazen te hadì te Asiria. Ne egkeseǥazan niw is kelised he wazè niw pa keenu meseǥazi puun te kebpekidsivayà te Israel te Juda.

Isaias 8:4

Ne te kenè pa egketau heeyan is batà he edsampit te Amà etawa Inà, ne is ketiǥeyunan diyà te Damascus wey is midtavan te menge tig-Samaria ne egkuwaan te hadì te Asiria.”

Isaias 8:8

Edeǥurus sikandan diyà te Juda he iring te zalem he teǥelieg is kezalem ne edlepayan dan is tivuuk he tanà.” Piru zuma zey ǥihapun is Megbevayà!

Isaias 9:17

Umbe kenà igkelipey te Nengazen is betan-en dan he menge maama, ne kenè din egkehizuwan is menge ilu kandan wey menge valu he vahi. Su lalung sikandan is langun ne kenà edsunud te Megbevayà; pudu mekeeled-eled is ebpengeǥiyen dan. Piru is pauk te Nengazen kenè pa egkeengked. Andam gihapun sikandin he edsilut kandan.

Isaias 9:19

Tenged te pauk te Nengazen he Mekeǥeǥehem, egkevinsulan is tanè dan, ne egkehimu sikandan he tavun he ed-epuren te hapuy. Kenè dan egkehizuwan minsan is iring dan he menge Israilihanen.

Jeremias 25:9

ibpesurung ku sikiyu te menge etew ziyà te zizaya he ebpenguluwan te suluǥuen ku he si Hadì Nebucadnezar he hadì te Babilonia. Edsurungen dan heini he tanà wey is langun he meǥinged kayi, ragkes en is langun he menge nasyun diyà te nekeelingkus kayi. Ebpurungan ku sikiyu edezeeti, ne egkeheratan is menge etew he ebpekaahà te egkehitavù keniyu ne egkehimu kew he telemayen. Uya, egkezeetan kew taman te taman.

Jeremias 3:10

Minsan pa kayi te langun, kenà tinutuuwà is kedlikù te meluiven he Juda kayi te kedì. Uvag-uvag dà is kedlikù din kayi te kedì. Iyan a, is Nengazen, is migkaǥi kayi.”

Jeremias 34:22

edsuǥuen ku sikandan te ked-uman kedsurung diyà te inged niw. Edsurung dan kayi ne ed-eǥawen dan heini, ne ebinsulan dan. Edhimuwen ku he mekevulungbulung is menge inged diyà te Juda ne wazè en ed-ubpè kayi. Iyan a, is Nengazen, is migkaǥi kayi.”

Jeremias 4:14

“Menge tig-Jerusalem, lumpiyuwi niw is kezaat te gehinawa niw su wey kew melibri. Ebpedayun en be is kezaat te isip niw?

Ezekiel 29:20

Ibeǥey ku kandin is Ehipto he suhul te kedhaǥù din. Su para kediey is kedhimuwa zin kayi wey te menge sundaru zin. Iyan a, is Nengazen he MEGBEVAYÀ, is migkaǥi kayi.

Ezekiel 38:12

Ed-eǥawen ku is menge azen kayi te menge inged he nehimu zengan he mekevulungbulung, piru ǥuntaan neeneb en te menge etew he nemenlikù puun te zuma he menge nasyun. Mahabet is menge uyaǥen dan wey menge azen, ne migkilala zan is nasyun dan he iyan utew impurtanti he nasyun kayi te kelibutan.

Ezekiel 38:13

“Egkaǥi ziyà te kenikew is menge etew ziyà te Sheba wey Dedan, wey is menge nigusyanti ziyà te menge inged diyà te Tarshish te, ‘Midtiǥum nu en be is menge sundaru nu su para ed-eǥawen en is menge pelata, menge vulawan, menge uyaǥen wey menge azen te menge Israilihanen?’ ”

Micas 7:10

Egkaahà heini te menge kuntada tew ne egkepeel-elezan sikandan. Su hein aney ne edsudien kiw zan he ke sikandin te, ‘Hendei en is Nengazen he Megbevayè niw?’ Kenà egkeuǥet egkeehè tew is kegkezeeti zan. Egkeiring sikandan te vasak diyà te kersada he edtekutakan.”

Habakuk 1:12

Migkaǥi si Habakuk te, “He Nengazen, Megbevayè ka puun te nehuna. Iyan ka waǥas he Megbevayè ku ne wazè nu kemetayen. He Nengazen he iring te endilungà he vatu, mibpilì nu is menge tig-Babilonia te kedsilut kenami.

Zacarias 10:5

Edsevaha is menge etew te Juda ne egkeiring sikandan te mezesen he menge sundaru he edaag te menge kuntada zan he henduen dà te vasak diyà te menge zalan he edtekutakan dan. Ebpekidtebek dan su ǥeina te siak is Nengazen, dume e zan. Ne edaaǥen dan is menge pereuntud te kudà.