Isaias 1:23 - Manobo Western Bukidnon OT

²³ Is menge pengulu nu ne mibpekidsukulà wey miduma te menge tekawen. Egkesuat dan he layun edsipsip, wey ebuyù sikandan te menge gasa. Wazè dan levani is ketenged dutun te menge ilu wey wazè dan pemineǥa is riklamu te valu he menge vahi.

Isaias 1:23 교차 참조

2 Cronica 36:14

Ne gawas kandin, minsan is lavew he menge memumuhat wey is menge pengulu te menge etew midluib en te Megbevayà. Mid-iringan dan is utew mezaat he vaal te menge etew ziyà te zuma he menge nasyun ne midremerikan dan is baley te Nengazen, he mid-isip din he segradu he lugar ziyà te Jerusalem.

Exodus 23:8

“Kenè kew medawat te sipsip, su is sipsip iyan ebpekepelakap te etew su minsan netuenan din en is tutuu, edtuisen din gihapun is menge lalag te metazeng he etew.

Erubasa 17:23

Is lalung he etew, edewaten din is idsipsip diyà te kandin su para kenà metuman is hustu he kukuman.

Erubasa 29:24

Is etew he kumpeniya te tekawen, iyan ebpekezezaat te keugelingen din. Minsan ibpepenangdù pa sikandin he iketug-an din ke hentei is duma zin, ne kenà sikandin edtug-an.

Isaias 1:17

Penginenau kew te kebaal te meupiya, wey iyan niw ikula is hustu he kukuman. Dewaya niw is menge ebpemeǥespeǥes, wey levani niw is ketenged te menge ilu wey menge valu he vahi.”

Isaias 1:18

Migkaǥi pa is Nengazen te, “Hendini kew, su edhusayen tew heini. Minsan sengemenu keremerik is menge salè niw, edlumpiyuwan ku heeyan su wey kew mehimu he lumpiyu.

Isaias 1:22

He Jerusalem, hein aney mevali ka iring te pelata, piru ǥuntaan wazè nu en pulus. Hein aney iring ka te vinu he wazè din sahug piru ǥuntaan nesehuǥan te wahig.

Isaias 28:14

Umbe, sikiyu is memesudì he menge edumala kayi te menge etew ziyà te Jerusalem, pemineǥa niw is Nengazen.

Isaias 3:14

Edhukuman din is menge ebpemendumala wey menge pengulu te menge etew zin. Iyan heini sumbung din kandan, “Midezeetan niw is pemuleey ku te paras he iyan is menge etew ku. Nepenù is menge valey niw te menge azen he mibpenguwa niw ziyà te menge pubri.

Isaias 30:1

Migkaǥi is Nengazen te, “Mekehizuhizu is menge anak ku he menge mesinukulen. Mibpelanu sikandan te menge pelanu he supak te egkesuatan ku. Nekid-uyun sikandan te zuma te kandan dà he ketau, ne kenà kediey. Umbe mid-iseg medekelà is salè dan.

Isaias 33:15

Is ebpekeubpà dutun, iyan is etew he nengungubpaan he metazeng wey tutuu is menge lalag din, ne wazà mebpenapì, wey wazà medawat te sipsip. Wazà sikandin mebpekiduma te mibpelanu te kebpemenhimatey wey te kebaal te zuma pa he mezaat he menge vaal.

Isaias 5:23

Edlibriyen niw is ebpekesalà tenged te sipsip, piru wazè niw veǥayi te hustu he kukuman is wazà mekesalà.

Isaias 65:2

“Edsigudu ad edtaǥad he mekelikù kayi te kedì is menge etew ku he menge mesinupaken, he wazà med-ikul te meupiya he vetasan, su iyan dan dà ebpezumdumahan is keugelingen dan he isip.

Jeremias 22:17

Ne sikew mulà, wazè duma he tinguhè nu, kekenà, iyan dà is kebpenlimbung, kebpemenhimatey te menge wazà mekesalà, kebpendaagdaag, wey kebpenhukhuk.

Jeremias 32:32

Midhimu te menge etew ziyà te Israel wey Juda he mepauk a tenged te mezaat he menge vaal zan. Pudu sikandan–is menge hadì dan wey menge upisyal zan, is menge memumuhat dan, is menge ebpeneuven, wey is langun he menge etew ziyà te Juda wey Jerusalem.

Jeremias 4:17

Midliǥuyan dan is Jerusalem he henduen be te ebantey sikandan te pinemula zan, su midsukulan a te menge tig-Jerusalem. Iyan a, is Nengazen, is migkaǥi kayi.

Jeremias 5:5

Umbe, midhendiyà a te menge pengulu zan su wey ku sikandan melelaǥi. Siguradu he netuenan dan is menge paaǥi te Nengazen he Megbevayè dan he ibpetuman kandan.” Piru minsan sikandan, inselikwey zan daan is menge ibpetuman te Megbevayà.

Jeremias 5:6

Umbe, edsurungen sikandan te menge kuntada zan he henduen be te erimaung he ebpuun diyà te ketelunan etawa zumezaas he asu he ebpuun diyà te disirtu, wey iring te liyupardu he ed-ayan diyà te uvey te inged su edawi te minsan hentei he egawas. Neulaula heini kandan su utew en subra is kebpekidsukulè dan te Megbevayà wey layun dan en ed-iniyuǥi sikandin.

Ezekiel 12:2

“Sikew is etew, nengungubpaan ka zuma te mesinupaken he menge etew. Duen dan menge mata piru kenè dan ebpekaahà, duen dan menge telinga piru kenè dan ebpekezineg, su menge mesinupaken sikandan he menge etew.

Ezekiel 22:27

Is menge upisyal zan iring te zumezaas he menge asu he ebpitaspitas te egkezawi zan. Edhimatey zan para zà mekeselapì sikandan.

Hoseas 4:18

Emun ebpekepasad dan en he ed-inum, ebpenigudu en sikandan ebpekidhilavet. Is menge perezumala zan egkesuat he ebaal te mekeeled-eled he menge vaal.

Hoseas 5:10

Is menge pengulu te Juda iring te menge etew he idhalin dan is menge simintu su mid-eǥawan dan te tanà is Israel. Umbe ibusbus ku ziyà te kandan is pauk ku he iring te zalem.

Hoseas 9:15

Migkaǥi is Nengazen te, “Is langun he kelelalung te menge etew ku mibpuun hein diyè dan te Gilgal. Ne zutun he lugar neepesan ku en sikandan. Ne tenged te kelelalung dan ibpaawè ku sikandan kayi te Israel he mid-isip ku he ubpeey ku. Ne kenè ku en sikandan ebmahalen; nekidsukulà kedì is langun he menge pengulu zan.

Amos 5:12

Su netuenan ku ke sengemenu kahabet wey ke sengemenu kezekelà is menge salè niw. Edèdaaǥen niw is menge etew he wazà mekesalà ne mibpenepian niw pa. Wazè niw veǥayi te hustu he kukuman diyà te hukmanan is menge pubri.

Micas 3:11

Emun edhukum kew ebpeburan niw is ebeǥey te sipsip diyà te keniyu. Ne sikiyu is menge memumuhat, ebpenurù kew su ǥeina te ebeyazan kew. Ne sikiyu zaan is menge ebpeneuven, ebpenagnè kew tenged dà te selapì. Edsarig kew pa he edtevangan kew te Nengazen, su egkaǥi kew te, ‘Zuma zey is Nengazen. Umbe wazà mezaat he egkehitavù kenami.’

Micas 3:9

“Sikiyu is menge pengulu te Israel wey Juda, pemineg kew! Igkeepes niw is metazeng he kukuman ne mibulegkù niw is hustu.

Micas 6:12

Mesipala is menge sepian keniyu, ne menge teruen kew.

Micas 7:3

Nelayam sikandan te kebaal te mezaat. Is menge pengulu wey menge meghuhukum ne edawat te sipsip. Ne ebpezumdumahan dan dà is egkesuatan te menge nekilala wey gehemanen he menge etew. Nesevaha sikandan te kebulegkù te hustu he kukuman.

Zacarias 7:10

Kenè niw dèdaaǥa is menge valu he vahi, is menge ilu, is menge lumelengyawà, wey menge pubri. Kenè kew med-isip te mezaat diyà te minsan hentei keniyu.’

Malakias 3:5

Migkaǥi is Nengazen he Mekeǥeǥehem te, “Edhendiyà a te keniyu su edhukum a. Segugunè ku ibpetueni is menge salà te menge veyilan, menge mengungumpadi, menge ebpenistiǥus te tarù, menge egalen he ebpenlimbung, menge ebpemintahà te menge valu he vahi wey menge ilu, wey menge lumelengyawà, wey is menge wazè dan kedtahud kedì.”

Numero 22:7

Umbe, migenat is menge perezumala ziyà te Moab wey Midian he uwiten dan is ibayad ki Baalam. Midtudtulan dan heini te migkaǥi ni Balak.

Deuteronomio 16:19

Kenè dan bulegkua is hustu he kukuman ne emun edhukum sikandan kinahanglan he wazè dan edlevanan. Kenè dan medawat te suhul su is suhul ebpekepelakap te uluwanen wey metazeng, wey ebpekeipiktu te kedhukum dan.

1 Samuel 8:3

Piru wazè dan sunuza is ulaula te amey zan. Edhuna ziyà te gehinawa zan is selapì, edawat dan te sipsip, wey edtuisen dan is hustu he kukuman.