Hoseas 8:13 - Manobo Western Bukidnon OT

¹³ Nemuhat sikandan kayi te kedì ne migkaan dan is usa te uyaǥen he ibpemuhat dan, piru wazè ku sikandan ikelipey. Ne ǥuntaan ed-isipen ku is kelelalung dan; edsilutan ku sikandin tenged te menge salè dan. Ne edlikù sikandan diyà te Ehipto.

Hoseas 8:13 교차 참조

Exodus 20:3

“Kenè kew med-azap te zuma he ed-ezapen gawas kedì.

Exodus 32:34

Ne ǥenat ke en, ne zumaha nu sikan is menge etew ziyà te lugar he migkaǥi ku kenikew. Tentenuzi nu he iyan egiya keniyu is belinsuǥuen ku, iyan, egkeuma ǥihapun is timpu te kedsiluti ku keniyan te menge etew tenged te salè dan.”

Erubasa 21:27

Kenà igkesuat te Nengazen is ibpemuhat te menge lalung, lavew en ke mezaat is tuyù dan te ked-ul-ulaha zan dutun.

Isaias 1:11

Ke sikandin te, “Wazà bali kayi te kediey te mahabet he menge pemuhat niw. Midsemu ad te menge pemuhat niw he edtutungen menge kerehidu wey menge tavà te menge uyaǥen he impelambù niw. Wazè ku ikelipey is lengesa te menge tudu he vaka, menge kerehidu, wey menge kambing.

Jeremias 14:10

Iyan heini tavak te Nengazen te menge etew: “Ingkelipey niw is kebpekeziyu kediey; mid-ulaula niw is minsan hengkey he egkesuatan niw. Umbe kenè ku en sikiyu egkilelaan he menge etew ku. Edtentenuzan ku is kelelalung niw ne edsilutan ku sikiyu tenged te menge salè niw.”

Jeremias 6:20

Kenè ku ebeliyen is edtutungen dan he veyewà he ebpuun pa te Sheba, wey is menge pehemut he ebpuun pa ziyà te meziyù he lugar. Kenè ku egkezawat is menge pemuhat dan he edtutungen. Is menge pemuhat dan kenà ebpekelipey kedì.

Ezekiel 29:16

Ne kenè en ed-uman edsarig te Ehipto is menge etew te Israel. Is egkehitavù te Ehipto ebpekepetanudtanud te menge Israilihanen te menge salè dan, he iyan is kebuyù te tavang diyà te Ehipto. Ne egketuenan te menge Israilihanen he iyan a Nengazen he MEGBEVAYÀ.”

Hoseas 11:5

Ne ǥeina te kenè dan egkesuat he edlikù kayi te kedì, ne siguradu he ziyà sikandan ebpekelikù te Ehipto, ne tig-Asiria is edumala kandan.

Hoseas 12:11

Piru minsan pa zutun, is menge etew ziyà te Gilead, menge lalung sikandan wey wazà menge pulus, ne is menge etew ziyà te Gilgal nemuhat te menge tudu he vaka ziyà te zuma he menge ed-ezapen. Siguradu he ebengkaǥen is menge pemuhatè dan ne egkeiring heini te intambù he menge vatu he mibpenguwa ziyà te tanà he mid-eradu.

Hoseas 4:9

Umbe, ǥuntaan te edsilutan ku is menge etew, ne edsilutan ku zaan sikiyu is menge memumuhat. Edsilutan ku sikiyu tenged te vetasan niw; ebelesan ku sikiyu tenged te menge vaal niw.

Hoseas 5:6

Edangep kew kayi te kedì pinaaǥi te kebpemuhat niw te menge kerehidu, kambing, wey vaka, piru kenè niw en egkeseǥazan is kebpekiduma ku keniyu su mid-iniyuǥan ku en sikiyu.

Hoseas 6:6

Su kenè ku iyan egkesuatan is menge pemuhat niw, kekenà, iyan is kebmahala niw kedì. Igkesuat ku pa is kegkilelaa niw kedì kenà is kebpemuhat niw te menge pemuhat he edtutungen.

Hoseas 7:11

Iring sikandan te merepatik, he melemu zà he ed-ekalan wey wazè din emet. Mibuyù sikandan te tavang diyà te Ehipto wey Asiria.

Hoseas 7:16

Midangep dan diyà te wazè din pulus. Iring sikandan te nezeetan he panà he wazè din en pulus. Ebpatey te tebek is menge pengulu zan su wazè dan kedtahud emun egkaǥi zan. Tenged kayi ed-engitan sikandan te menge tig-Ehipto.

Hoseas 7:2

Ne kunaan dan ke egkelipatan ku is langun he kelelalung dan. Nevakus gihapun sikandan te menge salè dan ne neehè ku heini is langun.

Hoseas 9:6

Minsan egkepeleǥuyan niw is kezeetan, edtiǥumen kew gihapun diyà te Ehipto ne idleveng kew ziyà te Memfis. Egketembuan dà te sagbet wey zuǥiyen he dezeisey he kayu is mahalen he menge gelemiten niw he pelata wey is menge tulda niw.

Hoseas 9:7

“Menge tig-Israel, neume en is timpu te kedsiluti keniyu, kes timpu he ebelesan kew tenged te menge mibeelan niw. Ne egketuenan niw he neume en heini. Ne iyan lalag niw mehitenged kedì is, ‘Tulebung heeyan he ebpeneuven! Engey heeyan is edumelahan te mulin-ulin!’ Iyan heeyan lalag niw mehitenged kedì su ǥeina te zekelè en is salè niw ne egkeepesan a keniyu.

Hoseas 9:9

Midtaman kew en he menge lalung, iring kew en duen te menge maama zengan diyà te Gibea. Edtentenuzan te Megbevayè is kelelalung niw; edsilutan kew zin tenged te menge salè niw.”

Amos 3:2

Diyà te langun he menge nasyun kayi te tivuuk he kelibutan iyan kew zà mibpilì ku he mehimu he menge etew ku. Umbe edsilutan ku sikiyu tenged te langun he menge salè niw.”

Amos 5:22

Umbe, minsan uwiti e pa keniyu te nekedseselekawà he menge pemuhat, minsan iyan pa is kineupiyahan he pemuhat, kenè ku heeyan edewaten.

Amos 8:7

Umbe, nenangdù is Nengazen, kes Megbevayà he impahambug niw te menge kevuwazan ni Jacob, ke sikandin te, “Kenè ku edlipatan is langun he kelelalung he mibeelan niw.

Deuteronomio 28:68

Ibpelikù kew te Nengazen diyà te Ehipto he ibpeuntud kew te varku minsan pa te nenaad sikandin he kenè kew en ibpelikù diyà. Ne ziyà, ebpeuripen kew su ibelegyè niw en is keugelingen niw ziyà te menge kuntada niw, piru wazà ebpemasa kayi.”

1 Samuel 15:22

Midtavak si Samuel te, “Igkelipey ves te Nengazen is kebpemuhat niw kenà is kebpezumazuma kandin? Meupiya is kebpezumazuma te Nengazen kenà is kebpemuhat. Meupiya pa is kebpemineg kandin kenà is kebpemuhat te menge melambeg ke kerehidu.