Hoseas 7:16 - Manobo Western Bukidnon OT

¹⁶ Midangep dan diyà te wazè din pulus. Iring sikandan te nezeetan he panà he wazè din en pulus. Ebpatey te tebek is menge pengulu zan su wazè dan kedtahud emun egkaǥi zan. Tenged kayi ed-engitan sikandan te menge tig-Ehipto.

Hoseas 7:16 교차 참조

Salmo 12:3

Deyzey pezem Nengazen ke ibpetiem nu sikandan is ebpemenlimbung pinaaǥi te meungangen he menge lalag wey sikan is menge gelbuwen.

Salmo 12:4

Ke sikandan te, “Ebmezeeǥen key pinaaǥi te kebpahambug dey. Ebpekehimu key he egkaǥi te minsan hengkey he egkesuatan dey, ne wazà ebpekezawey kenami.”

Salmo 12:5

Migkaǥi is Nengazen te, “Edtevangan ku is menge egkaayuayu su edèdaaǥen sikandan, ne utew subra is kebpekeantus dan. Egkelesaǥan ku sikandan su iyan heini ebperetengen dan.”

Salmo 17:10

Wazè dan hizu, ne pinaaǥi te kegkagi zan, ebpelavew zan.

Salmo 52:2

Ebpelenuwan niw is igkezeeti te zuma he etew. Is menge zilè niw ne iring te meǥarang he kutsilyu su ebpekepalì te ǥehinawa te zuma. Kedlimbung is layun niw ed-ul-ulaha.

Salmo 57:4

Edliǥuyan a te menge kuntada ku he iring te menge erimaung he andam he edawi te etew. Is menge ngipen dan iyan is menge vangkew wey menge vesut te panà. Is menge zilè dan iyan is meǥarang he menge ispada.

Salmo 73:9

Mezaat is menge lalag dan he igkuntada zan te Megbevayà diyà te langit wey te menge etew kayi te kelibutan.

Salmo 78:37

Kenà meheǥet is gehinawa zan diyà te kandin; kenè dan metinumanen te kebpekid-uyun kandan.

Salmo 78:57

Iring te menge kepuun dan, mibpekeziyuan dan wey midluivan dan is Megbevayà. Ne iring sikandan te nevadtì he panà su kenà sikandan egkeseriǥan.

Isaias 3:8

Kenà duwazuwa he egkezeetan is Jerusalem wey is Juda, tenged te iyan dan ebeelan wey ebpengeǥiyen is igkeepes te Nengazen. Wazè dan mebpezizalem te zekelà he keǥehem te Nengazen.

Jeremias 18:18

Ne migkaǥi is menge etew te, “Hendini kew, su ebpen-ehè kiw te paaǥi wey tew ikepeengked si Jeremias te kegkaǥi! Duen tew man daan menge memumuhat he ebpekepenurù kenitew te kesuǥuan wey menge ebpeneuven he ebpekeseysey ziyà te kenitew te menge lalag te Megbevayà. Umbe ebaal kiw te serupet he tudtul he ebpekezezaat kandin ne kenè tew en ebpemineǥen is ebpengeǥiyen din.”

Jeremias 3:10

Minsan pa kayi te langun, kenà tinutuuwà is kedlikù te meluiven he Juda kayi te kedì. Uvag-uvag dà is kedlikù din kayi te kedì. Iyan a, is Nengazen, is migkaǥi kayi.”

Jeremias 42:18

“Migkaǥi pa is Nengazen he Mekeǥeǥehem, he Megbevayà te Israel te, ‘Iring te impeseǥazan ku te menge etew ziyà te Jerusalem is rimeǥas te utew ku kegkepauk, ibpeseǥazan ku zaan heini keniyu emun edhendiyè kew te Ehipto. Edrewakan kew wey egkelimezangan is menge etew tenged keniyu. Ed-un-undahan kew zan wey edsudien, ne kenè kew en ebpekelikù diyà te tanè niw.’

Ezekiel 23:32

“Uya, iyan is Nengazen he MEGBEVAYÀ, migkaǥi te, ‘Edsilutan ku sikew iring te kedsiluti ku te suled nu he vahi. Is silut ku, ne iring te inumen he ziyà te tasa he zekelà wey mezalem. Emun egkeinum nu en is nekepenù kayi te tasa he iyan is pauk ku, ed-un-undahan ka wey ed-engitan.

Ezekiel 36:20

Minsan hendei he nasyun is egkepeveyaan dan, egkependezeisey zan is waǥas he ngazan ku. Su egkaǥi is menge etew te, ‘Menge etew sikandan te Nengazen, piru midsegseg din sikandan puun te tanè dan.’

Daniel 7:25

Ebpengaǥi sikandin te menge lalag he idsupak din te Utew Lavew he Megbevayà, ne ebpurungan din edlisliseza is menge etew he ǥaked te Megbevayà. Ebpeninguhà sikandin he mahalin is menge pista zan wey Kesuǥuan dan. Ne idtuǥut kandin he mesakup din is menge etew he ǥaked te Megbevayà seled te tetelu he tuig wey tengà.

Hoseas 11:5

Ne ǥeina te kenè dan egkesuat he edlikù kayi te kedì, ne siguradu he ziyà sikandan ebpekelikù te Ehipto, ne tig-Asiria is edumala kandan.

Hoseas 11:7

Heini sikandan is menge etew ku, utew egkesuat he ebpekeziyù kayi te kedì. Umbe minsan medsevaha pa sikandan is ebpengumew-umew kedì, ne kenè ku sikandan edlibriyen.

Hoseas 6:4

Piru migkaǥi is Nengazen te, “Menge etew te Israel wey Juda, hengkey is ebeelan ku ziyà te keniyu? Is kebmahala niw kedì ne meǥaan dà egkaawà; iring dà heini te edsaǥad he virisbiris etawa zehemug emun meselem.

Hoseas 7:13

Mekehizuhizu zan su mibpekeziyù dan kayi te kedì. Edezeetan ku sikandan su nekidsukulà sikandan kediey. Egkesuat a pezem he edlibri kandan piru tarù is migkaǥi zan mehitenged kediey.

Hoseas 9:3

Ed-awè kew kayi te Israel he tanà te Nengazen, ne edlikù kew ziyà te Ehipto. Is duma keniyu edhendiyà te Asiria, ne zutun egkaan kew te menge keenen he mid-isip niw he meremerik.

Hoseas 9:4

Kenè en idtuǥut keniyu is kebpemuhat te vinu ziyà te Nengazen. Is menge pemuhat niw kenà ebpekepenunuat kandin. Is minsan hentei he egkaan te pemuhat niw ne ed-isipen he meremerik, su iring dà haazà te kegkaan diyà te mibpetayan. Is keniyu he egkeenen para zà te keniyu; kenè man diyà te valey te Nengazen is mibpemuhatan kayi.

Hoseas 9:6

Minsan egkepeleǥuyan niw is kezeetan, edtiǥumen kew gihapun diyà te Ehipto ne idleveng kew ziyà te Memfis. Egketembuan dà te sagbet wey zuǥiyen he dezeisey he kayu is mahalen he menge gelemiten niw he pelata wey is menge tulda niw.

Malakias 3:13

Migkaǥi pa is Nengazen te, “Mezaat is menge lalag niw mehitenged kedì. Piru ed-insè kew te, ‘Hengkey is migkaǥi zey he mezaat mehitenged kenikew?’

Malakias 3:14

Migkaǥi kew te, ‘Wazà pulus te kebpenilbi te Megbevayà. Hengkey is egkekuwa tew zutun te kedtuman tew te menge ibpeveelan din wey kebpaahà diyà te Nengazen he Mekeǥeǥehem he ingkeseeng tew is menge salè tew?’