Hoseas 2:15 - Manobo Western Bukidnon OT

¹⁵ Ne ked-awè dey zutun ne idlikù ku ziyà te kandin is menge pemuleey zin te paras, ne edhimuwen ku is Suǥud he Acor he veyeey he ebpetanudtanud te meupiya he egkeperateng. Edtevaken e zin iring te mibeelan din hein betan-en pa sikandin dutun te kebpuun din diyà te Ehipto.”

Hoseas 2:15 교차 참조

1 Hadì 16:31

Ne kurang pa ziyà te kandin is ked-iring te menge salà he mibeelan ni Jeroboam, kekenà, mid-esawa zin si Jezebel he anak ni Hadì Etbaal he tig-Sidon, ne nenilbi sikandin wey mid-azap te ed-ezapen he si Baal.

Salmo 106:12

Umbe, midtuuwan dan is menge saad din ne migkanta zan te kedalig kandin.

Salmo 129:1

Menge tig-Israel, keǥiya niw ke mibmenumenu kew te ebpaantus te menge kuntada niw puun pa te aney en he kegketukud te nasyun niw.

Isaias 65:10

Edtuvazan ku sikandan is midangep kayi te kediey. Is menge suǥud diyà te Sharon wey Acor egkehimu he penebtavà te menge uyaǥen dan.

Isaias 65:21

Dutun he timpu ebangun is menge etew ku te menge valey ne ed-ubpaan dan heini. Ebpemula zan te menge paras wey egkeenen dan is beǥas kayi.

Jeremias 2:1

Migkaǥi is Nengazen kayi te kedì te,

Jeremias 2:2

“Genat ka ne keǥiya nu heini ziyà te menge tig-Jerusalem: ‘Netenuzan ku is keheǥet te gehinawa niw kayi te kedì wey is kebpelenggaa niw kedì dengan he iring te kebpelenggaa te maama te betan-en he vahi he sikan din pa meesawa. Midsunud kew kedì minsan diyà te sibsivayan he wazà duen menge pinemula.

Jeremias 29:11

Netuenan ku ke ebmenmenuwen ku te edtuman is pelanu ku para keniyu, pelanu te kebpeuswag keniyu ne kenà kedrasey, pelanu te kebeǥey keniyu te perateng he zuen meupiya ziyà te egkeumahan niw he timpu.

Jeremias 3:4

Ne ǥuntaan egkaǥi kew kayi te kedì te, ‘Amey ku, duma ku sikew puun pa te vatè e pa.

Jeremias 32:15

Su egkeuma is timpu he is menge etew ebpememase en maan te menge valey, menge vevesukà, wey menge pemuleey te paras kayi he lugar.’ ”

Penhulùhulù 3:21

Piru edlikù is perateng ku emun iyan ku egketenuzan

Ezekiel 16:22

Dutun te kebaal nu te utew mezaat he menge vaal wey kebpelelevag nu wazè nu en tentenuzi ke mibmenumenu ku sikew te ed-elima hein betan-en ke pa, hein lelevas ka wey midtunè ka te keugelingen nu he lengesa.

Ezekiel 16:60

Piru edtumanen ku is kebpekid-uyun ku kenikew hein betan-en ke pa, ne edhimu a te kebpekid-uyun ku kenikew he ebpedayun te wazà pidtemanan.

Ezekiel 16:8

“ ‘Ne hein mid-uman a medsaǥad, neehè ku he egkehimu ke en he ed-esewaan. Ne midtembunan ku sikew is lelevas te samput ku ne nenangdù a he ebmahalen ku sikew. Midhimu ku is kebpekid-uyun kenikew, ne naangken ku sikew. Iyan a, is Nengazen he MEGBEVAYÀ, migkaǥi kayi.

Ezekiel 28:25

Migkaǥi zaan is Nengazen he MEGBEVAYÀ te, “Ed-umanan ku te edtiǥum is menge etew te Israel puun te menge nasyun he zutun sikandan mekepeyapat. Pinaaǥi kandan igkepetuusan ku ziyà te menge nasyun is kegkewaǥas ku. Dutun he timpu ebpekeubpè en is menge Israilihanen diyà te keugelingen dan he tanà, he iyan kes tanà he imbeǥey ku ziyà te suluǥuen ku he si Jacob.

Ezekiel 28:26

Ebpekeubpè dan dutun he melinawen. Ebangun sikandan te menge valey wey ebpemula te menge paras. Wazè en edsamuk kandan emun edsilutan ku en is menge etew ziyà te langun he menge avey zan he nasyun he mid-undaunda kandan. Ne egketuenan dan he iyan a Nengazen he Megbevayè dan.”

Hoseas 11:1

Migkaǥi is Nengazen te, “Hein iring pa te vatà is Israel, mibmahal ku sikandin. Mid-umew ku sikandin puun te Ehipto su anak ku sikandin.

Hoseas 12:13

Pinaaǥi te ebpeneuven ku he si Moises, ibpeǥawas ku sikiyu is menge Israilihanen diyà te Ehipto wey mid-elimahan ku.

Hoseas 12:9

Umbe siak, is Nengazen he Megbevayè niw he mibpeǥawas keniyu ziyà te Ehipto, ibpeuman ku sikiyu ibpeubpà diyà te menge lawig, iring te ebeelan niw emun timpu te Pista te Kebaal te menge Lawig.

Hoseas 13:4

“Iyan a kes Nengazen he Megbevayè niw he mibpeǥawas keniyu ziyà te Ehipto. Kinahanglan he wazè en duma he egkilelaan niw he Megbevayà wey Menluluwas, kekenà, iyan e zà.

Hoseas 2:12

Edezeetan ku is menge pinemula zin he paras wey menge kayu he higus he egkeǥiyen din he imbayad kandin te menge kumpadi zin. Ebpetuvuan ku is menge pemuleey zin te merisen he menge kayu, ne is menge veǥas kayi egkeenen te leew he menge langgam.

Amos 9:14

Ibpeulì ku is menge etew ku he menge tig-Israel ziyà te tanè dan puun te kegkevihaǥa kandan. Ed-umanan dan ebenguna is nevengkag he menge inged dan ne zutun sikandan ed-ubpà. Ebpemula zan te menge paras ne ed-inum dan te vinu kayi. Ebpemula zan diyà te menge pemuleey zan ne egkaan dan te menge veǥas kayi.

Zacarias 9:12

Sikiyu is menge nevihag he ebperateng he mekelingkawas, likù kew en diyà te melig-en he menge lugar. Ǥuntaan egkaǥi a ziyà te keniyu he idlikù diyà te keniyu he edtekepen is naawà diyà te keniyu.

Numero 21:17

Ne zutun kentaha te menge Israilihanen heini he kentahan: “Ebpedayun ebeǥey te wahig heini he teheb! Egkanta kiw mehitenged kayi he teheb

Josue 7:26

Ne kegkepasad dutun, midtembuan dan te vatu si Acan. Ne taman en guntaan dutun pa haazà is menge vatu. Ne haazà he lugar migngezanan te Suǥud te Acor taman guntaan. Ne tenged kayi naawà is pauk te Nengazen.

Zatù 8:34

Midlipatan dan is Nengazen he Megbevayè dan he iyan midlibri kandan te kedezeeti kandan te menge kuntada zan diyà te peliǥuy zan.