Hoseas 13:9 - Manobo Western Bukidnon OT

⁹ Edezeetan ku sikiyu is menge tig-Israel, su ǥeina te migkuntada a keniyu is iyan pezem edtavang keniyu.

Hoseas 13:9 교차 참조

2 Cronica 28:23

Nemuhat sikandin te menge pemuhat diyà te menge ed-ezapen te menge tig-Damascus he nekezaag kandin. Su ke sikandin te, “Is menge hadì te Aram ne midtevangan te menge ed-ezapen dan. Umbe ebpemuhaten ku zaan heini he menge ed-ezapen para tevangi e zan.” Piru iyan heini nekezezaat kandin wey te tivuuk he Israel.

Salmo 146:5

Utew zeyzey is etew he iyan edtavang kandin kes Megbevayà he ed-ezapen ni Jacob, ne iyan edseriǥan din is Nengazen he Megbevayè din,

Salmo 33:20

Edtaǥad kiw zuma is kedsarig te Nengazen. Iyan sikandin edtavang wey ebpengalang kenitew.

Salmo 46:1

Is Megbevayà iyan ebpengalang kenitew wey iyan ebeǥey kenitew te zesen. Ne layun sikandin andam he edtavang emun timpu te kelised.

Erubasa 6:32

Is etew he edhilavet te zuen din esawa ne kenà metau he ed-isip te hustu. Iyan dà sikandin ed-uney edezaat te lawa zin.

Erubasa 8:36

Piru is etew he wazà meketuredu kedì, edezeetan din is keugelingen din. Ne is langun he egkeepes kedì, ne iyan dan egkesuatan is kemetayen.”

Isaias 3:11

Piru mekehizuhizu mulà is menge lalung, su ebpekeuma ziyà te kandan is bangkit. Ebelesan sikandan tenged te menge vaal zan.

Isaias 3:9

Is dagwey zan midtistiǥus te ebpekesuǥat kandan. Utew keladu is kebaal zan te salà iring te mibeelan te menge tig-Sodom. Wazè dan heini ieles. Mekehizuhizu sikandan! Iyan dan mismu mid-uwit te kandan he kezeetan.

Jeremias 2:17

“Iyan kew mismu is menge Israilihanen, mid-uwit kayi he kezeetan diyà te keniyu. Su hein mibpenguluwan ku sikiyu ziyà te zalan, inselikwey a keniyu, is Nengazen he Megbevayà,

Jeremias 2:19

Tenged te kelelalung niw wey ked-iniyuǥi niw kedì, edsilutan ku sikiyu. Purungi niw is-isipa ke hengkey is ikezaat wey ikereǥen te kedselikwaya niw wey kenè niw kedtehuza te Nengazen he Megbevayè niw. Iyan a, is Nengazen he MEGBEVAYÀ he Mekeǥeǥehem, is migkaǥi kayi.

Jeremias 4:18

Keniyu mismu he menge vetasan wey menge vaal is mid-uwit kayi he kezeetan diyà te keniyu. Iyan heini silut niw. Utew heini merasey! Henduen be te midsundang is gehinawa niw tenged kayi.”

Jeremias 5:25

Is kelelalung niw iyan hinungdan he wazà heini mesigudu meulaula ziyà te keniyu. Is menge salè niw iyan mid-eǥen para kenè niw mezawat heini he menge tuvad.

Hoseas 13:4

“Iyan a kes Nengazen he Megbevayè niw he mibpeǥawas keniyu ziyà te Ehipto. Kinahanglan he wazè en duma he egkilelaan niw he Megbevayà wey Menluluwas, kekenà, iyan e zà.

Hoseas 14:1

Migkaǥi si Hoseas te, “He menge tig-Israel, likù kew ziyà te Nengazen he Megbevayè niw, su nezeetan kew tenged te menge salè niw.

Hoseas 7:14

Kenà tinutuuwà is ked-umawa zan kediey. Dutun te edsineǥew zan diyà te menge hizeǥaan dan is ebuyù diyà te zuma he menge ed-ezapen dan te trigu wey vinu, ebpelian dan is lawa zan. Mibpekeziyù sikandan kayi te kediey.

Hoseas 7:15

Mibmansu ku sikandan su wey zan mebmelig-en, piru mezaat gihapun is pelanu zan kayi te kedì.

Malakias 1:12

Piru midsumpalit a mulà keniyu pinaaǥi te kegkaǥi he meremerik is pemuhatà he para kediey, ne wazà pulus te menge ibpemuhat kayi.

Malakias 1:13

Ke sikiyu te neperahan kew he ebaal te ebpeveelan ku keniyu; iyan heini migkaǥi te Nengazen he Mekeǥeǥehem. Ne mid-uwit kew te nesazir, piang, etawa zuen din daru he menge uyaǥen he ibpemuhat niw kayi te kedì, ne kenè ku heeyan edewaten puun diyà te keniyu. Iyan heini migkaǥi te Nengazen.

Malakias 1:9

Migkaǥi si Malakias, “Guntaan, sikiyu is menge memumuhat, hengyua niw is Megbevayà he mehizuwi kiw zin. Piru heeyan he kelasi te menge pemuhat ne ibpemuhat niw kandin, siguradu he kenè kew zin ebpaahaan te keupiya zin. Iyan heini migkaǥi te Nengazen he Mekeǥeǥehem.”

Deuteronomio 33:26

Wazà iring te Megbevayà he ed-ezapen niw te menge Israilihanen. Ed-untud sikandin te ǥapun is edtavang keniyu. Pinaaǥi te gehem din edseǥazan din is langit.

Deuteronomio 33:29

Utew kew zeyzey is menge etew te Israel! Wazà iring keniyu su iyan kew menge etew he midlibri te Nengazen. Is Nengazen iyan ebpengalang wey edtavang keniyu, ne iyan sikandin ebpekidtebek para keniyu. Ebpenanap is menge kuntada niw pehendiyà te keniyu, ne edtekutakan niw is menge peka zan.”