Hoseas 13:5 - Manobo Western Bukidnon OT

⁵ Mid-elimahan ku sikiyu ziyà te disirtu he utew memaza he lugar.

Hoseas 13:5 교차 참조

Genesis 31:40

Iyan heini egkeulaula ku: utew a egkeiniti emun maandew, utew a egkeǥenew emun mezukilem, ne layun a egkepurang.

Salmo 1:6

Su egiyahan te Nengazen is menge metazeng, piru is menge ulaula te menge lalung iyan ed-uwit kandan diyà te kezeetan.

Salmo 142:3

Ne emun neewaan ad te perateng, ne heeyan ke zed is ebpekevantey te menge egkengehitavù kedì. Diyà te ibayè ku zuen idtuǥes kedì te menge kuntada ku.

Salmo 31:7

Egkelipey a su veliǥeǥawen ke man. Ne wazà mekeeles kenikew is menge elentusen ku, ne netuenan nu is menge kelised ku.

Salmo 63:1

He Megbevayà, iyan ka Megbevayè ku, ne meselem pa utew ne edangep e en diyà te kenikew. Ke và ke zà wahig ne egkemezahan a kenikew. Iring te ziyà a te memaza he tanà he wazà duen wahig.

Exodus 2:25

Naahà sikandan te Megbevayà ne nehizuwan din sikandan.

Jeremias 2:2

“Genat ka ne keǥiya nu heini ziyà te menge tig-Jerusalem: ‘Netenuzan ku is keheǥet te gehinawa niw kayi te kedì wey is kebpelenggaa niw kedì dengan he iring te kebpelenggaa te maama te betan-en he vahi he sikan din pa meesawa. Midsunud kew kedì minsan diyà te sibsivayan he wazà duen menge pinemula.

Jeremias 2:6

Wazè e zan en pen-ahaa minsan pa te iyan a mid-uwit kandan diyà te gawas te Ehipto, ne migiyahan ku sikandan pehendiyà te sibsivayan he wazà duen menge pinemula. Haazà he tanà disirtu, duen menge vudsi, memaza, dilikadu, wey wazà duen ed-ubpà wey minsan edsaǥad.

Hoseas 5:3

Netuenan ku is langun mehitenged keniyu te menge tig-Israel; wazà igkeeles niw kayi te kedì. Mid-azap kew te zuma he menge ed-ezapen, umbe neremerikan kew.

Hoseas 9:10

Migkaǥi is Nengazen te, “Menge tig-Israel, hein mibpilì ku is menge kepuun niw para mehimu he menge etew ku, ne utew a nelipey. Iring te etew he nelipey su nekaahà te midtuvù he paras diyà te disirtu etawa nekaahà te nehuna he veǥas te higus. Piru hein midhendiyè dan te Baal Peor, impehinungud dan is untung dan diyà te mekeeled-eled he ed-ezapen ne neiring sikandan kezaat dutun te ed-ezapen he mibmahal zan.

Nahum 1:7

Meupiya is Nengazen; melig-en sikandin he eputà emun timpu te kelised, ne ed-elimahan din is edangep diyà te kandin.

Deuteronomio 2:7

Tentenuzi niw is kedtuvazi ku te langun he mibeelan niw. Iyan a Nengazen he Megbevayè niw, iyan a mibantey keniyu ziyà te hipanew niw kayi te meluag he sibsivayan. Seled te 40 he tuig is kebpekiduma ku keniyu ne wazà megkurang is minsan hengkey he kinahanglan niw.” ’ Iyan haazà lalag te Nengazen kediey.

Deuteronomio 32:10

Neehè din sikandan diyà te disirtu he iyan kes lugar he wazè duen utew ebpeketuvù he pinemula. Mid-elimahan din sikandan wey mibpelembungan iring te kebpelembungi te etew te mata zin.

Deuteronomio 8:15

Migiyahan kew zin diyà te meluag wey mekahahandek he sibsivayan he zuen duen edhereg he menge uled wey menge venayew. Ne wazà wahig kayi he lugar, piru mibeǥayan kew zin te wahig he ebpuun te vatu.