Haggai 1:14 - Manobo Western Bukidnon OT

¹⁴ Umbe, mibaghet te Nengazen si Zerubabel, si Josue, wey is langun he zuma zan he menge Israilihanen he nemen-ulì diyà te Israel, te kebangun duen te valey te Nengazen he Megbevayè dan he Mekeǥeǥehem.

Haggai 1:14 교차 참조

1 Cronica 5:26

Umbe, ketau te Megbevayà te Israel he surunga sikandan ni Hadì Pul he hadì te Asiria (he iyan si Tiglat Piliser). Nevihag ni Pul is menge tribu ni Reuben, Gad, wey ketengà he tribu ni Manase ne ziyè din uwita te Hala, Habor, Hara, wey ziyà te Wahig te Gozan, ne zutun sikandan taman guntaan.

2 Cronica 36:22

Dutun te nehuna he tuig te kedhadì ni Cyrus diyà te Persia, insavuk te Nengazen diyà te ǥehinawa ni Cyrus he medsurat te sevaha he pehibelu he ibpehibelu ziyà te tivuuk he ginhedian din. Nehitavù heini su wey metuman is migkaǥi te Nengazen pinaaǥi ki Jeremias.

Ezra 1:1

Dutun te nehuna he tuig te kedhadì ni Cyrus diyà te Persia, insavuk te Nengazen diyà te ǥehinawa ni Cyrus he medsurat te sevaha he pehibelu he ibpehibelu ziyà te tivuuk he ginhedian din. Nehitavù heini su wey metuman is migkaǥi te Nengazen pinaaǥi ki Jeremias.

Ezra 1:5

Duen menge Israilihanen he insavuk te Megbevayà diyà te gehinawa zan is suat te ked-ulì diyà te Jerusalem. Umbe nengandam sikandan te kedhendiyà su ebengunen dan is baley te Nengazen. Duma kandan is menge pengulu te menge pemilya te tribu ni Juda wey te tribu ni Benjamin, is menge memumuhat, wey is menge Levihanen.

Ezra 5:2

Nemineg kandan si Zerubabel he anak ni Shealtiel wey si Jeshua he anak ni Jozadak. Umbe midlaus dan is kebenguna zuen te valey te Megbevayà diyà te Jerusalem ne midtevangan sikandan dutun te zezuwa he ebpeneuven te Megbevayà.

Ezra 5:8

“Ibpehibelu zey kenikew, Mahal he Hadì, he midhendiyè key te prubinsya he Juda, diyà te ebengunan te valey te mekeǥeǥehem he Megbevayà. Dezekelà he menge vatu is egemiten te kebenguna zuen te simbahan, ne is menge verengbeng din midteuzan te menge trusu su wey mebmelig-en. Mesigudu sikandan he edterebahu, umbe meǥaan is kebenguna zan kayi.

Nehemias 4:6

Mibpedayun key he edterebahu taman te nevangun dey en is ketengà te ketikang te verengbeng, su nenigudu medterebahu is menge etew.

Salmo 110:3

Dutun te andew te kedtebeka nu te menge kuntada nu, andam is menge etew nu te ked-uǥup kenikew. Is menge vetan-en he menge etew nu edhendiyà te kenikew zutun te segradu he menge vuvungan he henduen be sikandan te menge zehemug emun meselem.

Haggai 1:1

Dutun te nehuna he andew te ikeenem he vulan, dutun te ikezuwa he tuig te kedhadì ni Darius diyà te Persia, duen migkaǥi te Nengazen diyà te ki Zerubabel wey ki Josue pinaaǥi te ebpeneuven he si Haggai. Si Zerubabel he anak ni Shealtiel iyan gubirnedur ziyà te Juda, ne si Josue he anak ni Jehozadak iyan lavew he memumuhat.

Haggai 1:12

Mibpezumazuma te Nengazen si Zerubabel, si Josue, wey is langun he menge zuma zan he menge Israilihanen he nemen-ulì diyà te Israel puun te kegkevihaǥa kandan diyà te Babilonia. Su mibpemineg dan is migkaǥi te Nengazen he Megbevayè dan pinaaǥi te ebpeneuven he si Haggai he midsuǥù te Nengazen diyà te kandan. Ne pinaaǥi kayi midtahud dan is Nengazen.

Haggai 1:15

Mibpuunan dan is kebangun hein ike-24 he andew te ikeenem he vulan, dutun te ikezuwa he tuig te kedhadì ni Darius.

Haggai 2:21

Ke sikandin te, “Keǥiyi nu si Zerubabel he meǥaan ku en edhuyungen is langit wey is kelibutan.