Genesis 49:29 - Manobo Western Bukidnon OT

²⁹ Ne zutun duen intelaan ni Jacob diyà te menge anak din, ke sikandin te, “Meǥaan e en ebpekaamur te menge kepuun ku he nemematey en. Ne emun egkehitavù en heini, ne ziyà a keniyu ileveng te surung duma te menge kepuun ku he ziyà te vevesukà ni Efron he Hitihanen.

Genesis 49:29 교차 참조

Genesis 15:15

Sikew mulà, ebpekeluǥeyazen ku is untung nu; ebpatey ka tenged te keǥuǥurangi nu he melinawen.

Genesis 23:16

Ne mid-uyun dutun si Abraham sumalà is migkaǥi ni Efron, ne midtimbang din is 400 he vuuk he pelata sumalà is keveǥat he neuyunan he zaan te menge nigusyanti zutun. Ne imbayad din heini ki Efron dutun te etuvangan te menge Hitihanen.

Genesis 23:17

Umbe naangken ni Abraham haazà is bevesukà ni Efron diyà te Macpela, he uvey te inged he Mamre, ragkes is surung wey is menge kayu he nekeelibet dutun te vevesukà. Nepirmahan te langun he menge Hitihanen he nevurun diyà te pultahan te inged.

Genesis 23:20

Umbe, is bevesukà ragkes is surung he iyan dengan teǥiǥaked kayi is menge Hitihanen, nehimu en heini he ki Abraham, ne midhimu zin heini he penlevengè din.

Genesis 23:9

su wey zin ivelegyà kayi te kedì haazà is surung he kilid te vevesukè din diyà te Macpela. Keǥiyi niw sikandin he ebeyazan ku te hustu he prisyu, kayi te etuvangan niw para egkehimu he penlevengè ku.”

Genesis 35:27

Mid-ulì si Jacob diyà te amey zin he si Isaac he ziyà te Mamre he uvey te inged he Kiriat Arba (he iyan daan Hebron). Iyan haazà mid-ubpaan dengan ni Abraham wey ni Isaac.

Genesis 35:29

Meǥurang en utew sikandin te kebpatey zin, ne in-amur sikandin te menge kepuun din he nemematey en. Inleveng sikandin te menge anak din he si Esau wey si Jacob.

Genesis 47:30

Emun ebpatey ad, ne ileveng a kenikew ziyà te penlevengà te menge kepuun ku.” Ne midtavak dutun si Jose te, “Uya, edtumanen ku is intelaan nu kediey.”

Genesis 49:28

Iyan heini sikan is 12 he anak ni Jacob he menge tribu te Israel. Ne iyan haazà menge petizaan ni Jacob te kada sevaha kandan.

Genesis 49:33

Ne hein nepasad ni Jacob is menge idtelaan din te menge anak din, mid-ayun sikandin medhizeǥà diyà te hizeǥaan ne minatey sikandin. Ne nekaamur sikandin te menge kepuun din he nemematey en.

Genesis 50:12

Midtuman te menge anak ni Jacob is intelaan din kandan.

Genesis 50:13

Ne mid-uwit dan is lawa zin diyà te Canaan ne inleveng dan diyà te surung he ziyà te vevesukà te Macpela, diyà te edsilaan te Mamre. Heini he vevesukà mibpemasa ni Abraham diyà te ki Efron he Hitihanen, su ebeelan din he penlevengà.

2 Samuel 19:37

Ed-ulì e en, su emun ebpatey a ne ziyè e zed ebpatey te kediey he inged, he zutun daan ileveng is ginikanan ku. Heini zed is anak ku he si Kimhan ibpezuma ku kenikew para egkehimu he suluǥuen nu. Dumaha nu sikandin, Mahal he Hadì, ne iyan ke en metau ke hengkey is meupiya he ebpeveelan nu kandin para kenikew.”