Hein naahà ni Jose si Benjamin is lumunè din en te ǥetek, ke sikandan te, “Iyan be heini sikan is hazi niw he migkaǥi niw zengan kedì?” Ne migkeǥiyan din si Benjamin te, “Mama, berakat he tuvazi ka te Megbevayà.”
Ne midtavak dan te, “Geina te mibpeniguduwan key zin insai mehitenged te pemilya tew. Ke sikandin te, ‘Uuyag pe be is amey niw? Duen niw pe be hazi?’ Umbe intug-an dey su wazè dey isipa he egkeǥiyen din he kinahanglan he edumahan dey pa is hazi zey ziyà te Ehipto.”
Ne midtavak key te duen dey iyan amey he meǥurang en utew wey zuen dey pa hazi he in-anak te meǥurang en utew is amey zey. Iyan dà sikandin nesamà te menge anak te iney zin su minatey en is kakey zin. Ne utew sikandin pinelanggà te amey zey.
