Genesis 42:21 - Manobo Western Bukidnon OT

²¹ Ne pesikaǥi zan dutun te, “Umbe egkeulaula en heini kenitew su silut tenged te mid-ulaula tew ziyà te hazi tew he si Jose. Su minsan pa te utew sikandin nerasey wey midhengyuan kiw zin, midtengtengan tew zà ne wazè kiw mebpehangyù. Umbe edlised kiw en guntaan.”

Genesis 42:21 교차 참조

Genesis 41:9

Ne zutun mid-uvayan duen te egalen te pereuwit te vinu sikan is hadì te Ehipto he egkaǥi te, “Netenuzan ku ǥuntaan is menge salè ku.

Genesis 44:16

Ne midtavak si Juda te, “Datù, wazè dey en igkepengetezengan kenikew, ne kenè dey zaan egkekaǥi he wazè dey salà. Iyan is Megbevayà mibpezayag te salè dey. Sikami is langun ne menge uripen key en kenikew wey kes naahaan nu zuen te tasa.”

Genesis 45:3

Migkaǥi si Jose ziyà te menge suled din te, “Iyan a si Jose! Uuyag pe be is amey ku?” Piru wazà meketavak dutun is menge kakey zin su utew zan netentani.

Genesis 50:15

Ne haazà is menge suled ni Jose, dutun te minatey en is amey zan, pesikaǥi zan te, “Kela ke ebelesan kiw en ni Jose tenged te mezaat he mid-ulaula tew zengan kandin.”

2 Samuel 12:13

Ne migkeǥiyan ni David si Natan te, “Nekesalà a te Nengazen.” Midtavak si Natan te, “Mibpesaylu ke en te Nengazen, ne kenè ke zed ebpatey kayi he salà.

1 Hadì 17:18

Migkaǥi haazà is bahi ziyà te ki Elias te, “Sikew is suluǥuen te Megbevayà hengkey is ingkepeuki nu kediey? Iyan be inhendini nu su edhimetayan nu is anak ku su silut kedì tenged te menge salè ku?”

Erubasa 21:13

Emun kenè ta idtetepian is egkengeayuayu he ebpekitavang kenita, ne kenè ki zaan idtetepian emun iyan ki ebpekitavang.

Erubasa 28:17

Is etew he edsemuken te isip din tenged te kebpekevaal zin te mezaat pinaaǥi te kebpemumunù din, wazè din kelinew taman te kebpatey zin. Ne kenà sikandin ipetevangi te minsan hentei.

Jeremias 2:17

“Iyan kew mismu is menge Israilihanen, mid-uwit kayi he kezeetan diyà te keniyu. Su hein mibpenguluwan ku sikiyu ziyà te zalan, inselikwey a keniyu, is Nengazen he Megbevayà,

Jeremias 2:19

Tenged te kelelalung niw wey ked-iniyuǥi niw kedì, edsilutan ku sikiyu. Purungi niw is-isipa ke hengkey is ikezaat wey ikereǥen te kedselikwaya niw wey kenè niw kedtehuza te Nengazen he Megbevayè niw. Iyan a, is Nengazen he MEGBEVAYÀ he Mekeǥeǥehem, is migkaǥi kayi.

Jeremias 34:17

“Umbe siak, is Nengazen, migkaǥi a te geina te wazà a keniyu pezumdumahi su wazè niw veǥayi te vayàbayà is menge uripen niw he iring niw he Hebriyuhanen, ebeǥayan ku sikiyu te vayàbayà he ebpematey pinaaǥi te tebek, bitil, wey menge zaru. Tenged te egkeulaula keniyu egkelimezangan is langun he ginhedian kayi te kelibutan.

Jeremias 4:18

Keniyu mismu he menge vetasan wey menge vaal is mid-uwit kayi he kezeetan diyà te keniyu. Iyan heini silut niw. Utew heini merasey! Henduen be te midsundang is gehinawa niw tenged kayi.”

Hoseas 5:15

Ne kegkepasad dutun edlikù a ziyà te lugar ku, taman te ed-engkenen dan is menge salè dan. Ne edangep dan kayi te kedì tenged te kegkerasey zan.”

Numero 32:23

“Iyan, emun kenè niw heini edtumanen, ne ebpekesalè kew ziyà te Nengazen, ne siguradu he ebeyazan niw is salè niw.

Zatù 1:7

Migkaǥi si Adoni Bezek te, “70 he hadì is mibpenamped ku is tindezekelà te menge velad dan wey menge paa zan, ne nekepengimù sikandan te menge mumu ziyà te zizalem te lemisahan ku. Ne ǥuntaan mibeelan te Megbevayà kayi te kedì is mibeelan ku ziyà te kandan.” Mid-uwit dan sikandin diyà te Jerusalem ne ziyè en mebpatey.