6 Ne mid-uvey ziyà te ki Esau haazà is dezuwa he suluǥuen he vahi wey is menge anak dan, ne midluhud sikandan he iyan kedtahud dan kandin.
Ne hein neehè din is menge vahi wey menge vatà, ne mid-insaan din si Jacob te, “Hentei heini is menge zuma nu?” Ne midtavak si Jacob te, “Iyan heini menge anak ku he imbeǥey kediey te Megbevayà su ingkehizu e zin.”
Ne midsunud si Lea wey is menge anak din, ne midluhud daan sikandan. Ne iyan nehuziyan he mid-uvey he ed-luhud si Jose wey is iney zin he si Raquel.
