Genesis 30:43 - Manobo Western Bukidnon OT

⁴³ Pinaaǥi kayi, midsepian utew si Jacob. Ne utew midmezakel is menge uyaǥen din ragkes is menge kemilyu wey menge asnu. Mezakel zaan is menge suluǥuen din he menge maama wey vahi.

Genesis 30:43 교차 참조

Genesis 12:16

Tenged ki Sarai mibpurungan dutun te hadì si Abram, ne mibeǥayan din si Abram te menge vaka, kerehidu, menge asnu he vehiyan wey meemahan, wey menge kemilyu, wey menge uripen he vahi wey maama.

Genesis 13:2

Utew en sepian si Abram su utew mezakel is menge ayam din wey mezakel is menge azen din he pelata wey vulawan.

Genesis 24:35

Midtuvazan sikandin te Nengazen, ne utew zekelà is ketiǥeyunan din guntaan. Mibeǥayan sikandin te Nengazen te menge kerehidu, menge kambing, menge vaka, menge kemilyu, menge asnu, menge pelata, menge vulawan, wey menge suluǥuen he maama wey vahi.

Genesis 28:15

Tentenuzi nu he layun a eduma kenikew wey ebentayan ku sikew minsan hendei ka ebpevayà. Ibpelikù ku sikew kayi he tanà, ne kenè ku sikew ed-ewaan taman te egketuman ku is menge saad ku kenikew.”

Genesis 30:30

Hein nekeuma a keyi pirapira zà is menge uyaǥen nu, piru ǥuntaan utew en mibmezakel, su midtuvazan ka te Nengazen pinaaǥi kedì. Umbe ǥuntaan kinahanglan he edsiguruwen ku is para te keugelingen ku he pemilya.”

Genesis 30:42

Emun memeluya haazà is menge uyaǥen he ebpepenpeniwelayà, ne kenè din ibpasek haazà is subpang. Umbe egketuusan is ki Laban su memeluya piru is ki Jacob ne memeupiya is menge lawa mulà.

Genesis 31:1

Nezineg ni Jacob is lalag te menge anak ni Laban, ke sikandan te, “Migkuwe en ni Jacob is hapit langun he menge azen te amey tew. Is langun he ketiǥeyunan din ne ebpuun te menge azen te amey tew.”

Genesis 31:42

Emun buwa wazà a tevangi te Megbevayà te amey ku he si Isaac, kes Megbevayà ni Abraham, kela ke midsegseg e en kenikew he wazà uwiten he minsan hengkey. Piru naahà te Megbevayà is kedhaǥù ku wey kedterebahu ku, umbe midawey ke zin geina he mezukilem.”

Genesis 32:10

Ne siak is suluǥuen nu, kenà a zait te zekelà he ǥaǥew nu kediey he kenà egkaamin. Dengan hein midrapas a kayi te wahig he Jordan su edhendiyà a te ki Laban ne iyan dà naazen ku zutun is tuked ku. Ne ǥuntaan utew mezakel is menge azen ku su egkehimu he ebehinen te zezuwa he vahin.

Genesis 32:14

200 he menge vehiyan he kambing wey 20 daan he menge meemahan he kambing, 200 he menge vehiyan he kerehidu wey 20 daan he menge meemahan he kerehidu,

Genesis 32:5

Ne keǥiyi niw sikandan he zuen ku en menge vaka, menge asnu, menge kerehidu, wey menge kambing, ne zuen ku zaan menge suluǥuen he vahi wey maama. Keǥiyi niw sikandin he midsuǥù ku sikiyu he edhangyù kandin he ikeǥaǥew e zin ded.”

Genesis 33:11

dewata nu en is ibeǥey ku kenikew su nehizuwan a te Megbevayà ne wazà a mekurangi te menge penginehenglanen ku.” Midteǥel ni Jacob si Esau taman te nezawat en nasì ni Esau haazà is igasa zin.

Genesis 36:7

Su kenà sikandan egkehimu he ebpeemurà diyà te sevaha zà he lugar su mahabet is menge azen dan; ne kenà ereg kandan haazà is lugar he mid-ubpaan dan tenged te kahabet te menge uyaǥen dan.

Megwewali 2:7

Nemasa a te menge uripen menge maama wey menge vahi, ne is duma ne ziyè en mengeetew te valey ku. Ne iyan a utew mahabet is menge uyaǥen te langun he nekeubpà diyà te Jerusalem.

Ezekiel 39:10

Kenè en kinahanglan he ebpengayu pa sikandan diyà te vevesukà wey ketelunan, su egkeǥamit dan en man he tavun is menge ǥumaan te kebpekidtebek. Umbe ed-eǥawan dan daan is menge nengaǥew kandan. Iyan a, is Nengazen he MEGBEVAYÀ, is migkaǥi kayi.