Genesis 30:20 - Manobo Western Bukidnon OT

²⁰ Migkaǥi si Lea te, “Utew mahal is imbeǥey kediey te Megbevayà. Edtehuzen ad human te esawa ku su neveǥayan ku en sikandin te heenem he anak he maama.” Umbe migngezanan din haazà is batà te Zebulun.

Genesis 30:20 교차 참조

Genesis 29:34

Ne mibmeǥingey en maan si Lea, ne mid-anak sikandin te sevaha pa maan he maama. Migkaǥi sikandin te, “Human ad buwa ebmahala te esawa ku su tetelu en is anak dey he maama.” Umbe migngezanan din haazà is batà ki Levi.

Genesis 30:15

Ne midtavak si Lea te, “Wazè nu pe bes ikesuat is ked-eǥawa nu te esawa ku? Egkuwaan nu pa zaan is mandragura te anak ku?” Migkaǥi si Raquel te, “Emun ebeǥayan a kenikew te mandragura ne ibpehulid ku si Jacob kenikew kengkuwan ke mezukilem.”

Genesis 30:19

Mibmeǥingey en maan si Lea ne mid-anak te maama he ikeenem te anak dan ki Jacob.

Genesis 30:21

Ne is huziyan he in-anak ni Lea vahi, ne migngezanan din ki Dina.

Genesis 34:12

Minsan pira is ibpesunggud niw kediey wey is minsan hengkey he ebuyuen he igasa ku kandin ne ibeǥey ku asal ipeesawa niw kediey si Dina.”

Genesis 35:23

Is menge anak din diyà te ki Lea ne iyan si Reuben, is kakey, ne sunud si Simeon, si Levi, si Juda, si Isacar, wey si Zebulun.

Genesis 46:14

Is menge anak he maama ni Zebulun ne iyan si Sered, si Elon, wey si Jaleel.

Genesis 49:13

“Sikew Zebulun, ed-ubpè ka ziyà te veyvey te zaǥat. Ne is kenikew he lugar ne egkehimu he zungguan te menge untuzà. Ne is kenikew he tanà ne taman diyà te Sidon.

Salmo 68:27

Edhuna is deisey he tribu ni Benjamin, ne iyan edtinundug is menge pengulu te Juda duma is menge grupu zan, ne edtinundug kandan is menge pengulu te Zebulun wey Naftali.

Exodus 22:17

Ne emun kenà ibpeesawa te amey zutun te vahi haazà is anak din kinahanglan gihapun he ibpevayad haazà is maama te sungguzanan he para te raǥa.

Deuteronomio 27:13

Ne iyan maan heini menge tribu he edhitindeg diyà te Buntud he Ebal te kedrawak te menge etew: is tribu ni Reuben, Gad, Asher, Zebulun, Dan, wey Naftali.

Zatù 4:10

Ne zutun impehendiyà ni Barak te Kedesh is menge tribu ni Naftali wey ni Zebulun, ne 10,000 kandan is miduma kandin. Elin daan miduma si Debora.

Zatù 5:14

Is duma kandan ebpuun diyà te Efraim he lugar he ǥaked dengan te menge Amalikanhen. Ne midtinundug kandan is tribu ni Benjamin. Midtupang is menge peremandar he ebpuun te pemilya ni Makir, wey is menge upisyal he ebpuun te tribu ni Zebulun.

1 Samuel 18:25

migkaǥi si Saul te, “Keǥiyi niw si David te iyan dà ebuyù en ku he sunggud te kebpengesawa zin te anak ku is menge lundis te purù te sudiyà te 100 he menge Filistihanen, he iyan kebpekevales ku kandan te menge kuntada ku.” Iyan haazà planu ni Saul para mepatey si David te menge Filistihanen.