Genesis 25:22 - Manobo Western Bukidnon OT

²² Egkeǥezam din is henduen be te ebpezumuǥà haazà is sereping he menge vatà diyà te ǥetek din. Migkaǥi si Rebeka te, “Emun iyan bes heini egkeulaula kandan te huziyan he timpu, deyzey nasì ke mebpatey ad.” Umbe mid-insà sikandin diyà te Nengazen mehitenged kayi. Migkaǥi is Nengazen diyà te kandin te,

Genesis 25:22 교차 참조

Ezekiel 20:31

Minsan ganì guntaan midremerikan niw en is keugelingen niw pinaaǥi te kebpemuhat diyà te zuma he menge ed-ezapen ragkes en is kebpemuhata niw te menge anak niw he maama pinaaǥi te kedtevuna niw zuen diyà te hapuy. Umbe pemineg kew is menge etew te Israel, siak, is Nengazen he MEGBEVAYÀ he uuyag, he kenà ebpenudtul te menge lalag diyan te keniyu minsan edhangyù kew pa.

Ezekiel 36:37

Mibpedayun megkaǥi is Nengazen he MEGBEVAYÀ te, “Ed-umanan ku ebpemineǥa is kebpehizuhizu te menge etew te Israel, ne iyan ebeelan ku ziyà te kandan is: Edhimuwen ku sikandan he iring kahabet te menge kerehidu he ibpemuhat diyà te Jerusalem emun timpu te pista. Umbe is nengevengkag he menge inged egkeuman egkepenù te mahabet he menge etew. Ne egketuenan dan he iyan a Nengazen.”

1 Samuel 10:22

Umbe, nenginginsà is menge etew ziyà te Nengazen te, “Kayi ve sikandin?” Midtavak is Nengazen, “Uya, kayi sikandin. Mid-eles dà sikandin kayi te menge uwiten.”

1 Samuel 22:15

Uya, mid-insaan ku is Megbevayà mehitenged kandin, kenà guntaan pa, kekenà, duen te nehuna pa. Piru edhangyù a kenikew he kenà a kenikew isumbung wey is tivuuk he pemilya ku, su wazè ku metueni heini he menge hitavù.”

1 Samuel 28:6

Ne zutun mid-insaan din is Nengazen, ne wazà sikandin tevaka te Nengazen minsan te teǥeinep dà, wey pinaaǥi te Urim wey te menge ebpeneuven.

1 Samuel 30:8

Ne mibpenginginsà si David te Nengazen te, “Egkehimu ve he edtelukunan dey is midsurung kenami? Egkezaag dey vuwa sikandan?” Midtavak is Nengazen te, “Uya, telukuni niw sikandan su egkezaag niw, ne egkelibri niw is menge vinihag.”

1 Samuel 9:9

Migkeǥiyan ni Saul sikandin te, “Meupiya utew! Kuwa ke en, edhendiyè ki te ebpeneuven.” (Te nehuna en he menge penahun te Israel, emun duen etew he egkesuat he ebpekezineg te lalag he ebpuun te Megbevayà, egkaǥi te, “Kuwa ke en, edhendiyè ki te menenagnà,” su is egngezanan guntaan te ebpeneuven ne iyan ngazan din dengan is menenagnà.) Midhendiyà si Saul wey kes suluǥuen te inged he zutun med-ubpà kes ebpeneuven te Megbevayà.