Genesis 24:15 - Manobo Western Bukidnon OT

¹⁵ Wazè pa zutun sikandin mekepasad he ed-ampù, ne nekeuma si Rebeka he edtiang te umuy. Anak si Rebeka ni Betuel, ne si Betuel anak ni Nahor wey ni Milca. Si Nahor suled ni Abraham.

Genesis 24:15 교차 참조

Genesis 11:27

Iyan heini guǥud mehitenged te pemilya ni Tera. Si Tera, iyan amey eni Abram, si Nahor, wey si Haran. Ne si Haran, ne nevuwad sikandin ki Lot.

Genesis 11:29

Ne mibpengesawa si Abram wey si Nahor. Iyan esawa ni Abram si Sarai, ne iyan esawa ni Nahor si Milca. Anak si Milca ni Haran te amey zaan ni Isca.

Genesis 21:14

Meselem pa utew zutun te sunud he andew, migkuwa si Abraham te egkeenen wey lundis he teleǥuey te wahig, ne imbeǥey zin ki Hagar. Ne impevava zin haazà ne impeǥenat din haazà is bahi wey is batà. Ne migenat en dutun si Hagar ne midriǥuriǥu ziyà te sibsivayan te Beersheba.

Genesis 24:14

Emun ebuyù a te wahig duen te umuy te raǥa, ne emun ebpemineg sikandin he ibpeinum a ragkes is menge kemilyu ku, berakat he iyan sikandin kes mibpilì nu he egkehimu he esawa te suluǥuen nu he si Isaac. Pinaaǥi kayi egketuenan ku he impeehè nu is gaǥew nu te egalen ku he si Abraham.”

Genesis 24:24

Midtavak si Rebeka te, “Iyan amey ku si Betuel he anak ni Milca wey ni Nahor.

Genesis 24:45

“Ne te wazè e pa mekeipus he ed-ampù, nekeuma si Rebeka he edtiang te idsekezu zin he umuy. Midtupang sikandin pehendiyà te kalut su edsekezu. Migkeǥiyan ku sikandin te, ‘Ipeinum e kun.’

Genesis 25:20

Menge 40 en is penuiǥen ni Isaac dutun te kebpekeesawa zin ki Rebeka he anak ni Betuel he Aramihanen he tig-Padan Aram. Etevey si Rebeka ni Laban he Aramihanen daan.

Genesis 29:5

Ne mid-insè en maan si Jacob te, “Egkekilala niw ve si Laban he apù ni Nahor?” Midtavak dan te, “Uya, egkekilala zey.”

Genesis 29:9

Kemulu pa ebpekibitiyara si Jacob kandan dutun kebpekeuma ni Raquel he edtundan te menge kerehidu te amey zin, su sikandin is ed-elima kayi.

Salmo 34:15

Ebentayan te Nengazen is menge metazeng, ne ebpemineǥen din is menge pengemuyù dan.

Salmo 65:2

Is langun he menge etew ed-uvey ziyà te kenikew su edtevaken nu is menge kebpengemuyù dan.

Exodus 2:16

Ne zutun, is pitu he anak he vahi te memumuhat diyà te Midian, midhendiyè dan te kalut su edsekezu te ibpeinum te menge uyaǥen te amey zan.

Erubasa 31:27

Meǥied sikandin, ne edsusiyen din ebpurungi is dutun te pemilya zin.

Isaias 58:9

Emun ed-umawen a keniyu su ebpetavang kew, edtevaken ku sikiyu. “Emun ed-engkezan niw is kebpendaagdaag, is kebpemesangil te binèbeelan dà, wey is kegkaǥi te mezaat,

Isaias 65:24

Dutun te kenè dan pa ebpekevuyù etawa zutun mismu te kebuyù dan, ne edtevaken ku en sikandan.

Ruth 2:17

Ne mibpenigudu en dutun si Ruth is ebpekirarew taman te mahapun en. Ne hein migunas din is nekuwa zin, ne menge keluwaan he kilu he parey is ginunas din.

Ruth 2:2

Duen timpu he migkaǥi si Ruth diyà te ki Naomi te, “Tuǥuti a kenikew he edhendiyà a te menge perayan su wey a mekepekirarew te barli. Kela ke zuen etew he idtuǥut din kediey is kebpekirarew ziyà te perayan din.” Ne midtavak si Naomi te, “Uya, bayi, hendiyè ka.”

1 Samuel 9:11

Ne hein ebpenekezeg dan en dutun te vuvungan pehendiyà te inged, duen dan nesinuǥung he menge raǥa he ebpuun dutun te inged is ebpemenekezu. Mid-insaan dan haazà is menge raǥa te, “Kayi ve kes menenagnà?”