Genesis 18:25 - Manobo Western Bukidnon OT

²⁵ Kenà haazà dait he edsilutan nu is menge metazeng duma te menge mekesesalà. Kenà egkehimu he id-iring nu is menge lalung kandan. Iyan ka ebayàbayà te tivuuk kelibutan, kenè be kinahanglan he ebeelan nu ke hengkey is hustu?”

Genesis 18:25 교차 참조

Genesis 18:24

Penenglitan ke zuen 50 he menge metazeng he etew ziyà te inged, tutuu ve he edlimasen nu? Ne kenè nu egkehizuwan haazà is menge meǥinged minsan pa te zuen 50 he menge metazeng dutun?

1 Cronica 16:33

Is menge kayu ziyà te ketelunan megkanta te kelipey ziyà te etuvangan te Nengazen. Su ebpekeuma sikandin is edhukum te menge etew kayi te kelibutan.

2 Cronica 19:7

Tehuza niw is Nengazen, ne hukum kew te hustu su kenà igkesuat te Nengazen he Megbevayè tew is kebpemintahà, wey kedhukum he zuen edepiǥan, wey iyan ibpevenar is ebpekeveǥey.”

Nehemias 9:33

Metazeng is mibeelan nu te kedsilut kenami. Metinumanen ka ziyà te kenami, piru menge mekesesalè key mulà.

Job 34:10

Umbe, pemineg kew kedì, sikiyu is egkaǥi he ebpekesavut kew. Kenà ebaal te mezaat is Mekeǥeǥehem he Megbevayà.

Job 34:12

Kenà egkehimu he ebaal te sayep is Mekeǥeǥehem he Megbevayà. Kenè din ebulegkuen is hustu he kukuman.

Job 8:20

“Benar iyan, he kenà ed-engkezan te Megbevayà is etew he wazà igkesawey te kebpengungubpaan din, ne kenè din edtevangan is lalung he etew.

Job 8:3

Kenà egkehimu he egurivizen te Mekeǥeǥehem he Megbevayà is kukuman etawa ebulegkuen din is hustu.

Salmo 50:6

Ebpahayag is langit he metazeng is Megbevayà, su iyan sikandin edhukum.

Salmo 58:11

Dutun ebpekekaǥi is menge etew te, “Tutuu iyan he zuen suhul te menge metazeng; ne zuen Megbevayà he edhukum te menge etew kayi te kelibutan.”

Salmo 7:12

Ne emun kenè dan ed-engkezan is menge mezaat he vaal zan, ne andam ka he edsilut kandan. Iring ka te sundaru he naandam en is idhimatey zin he menge gumaan. Migkemanga zin en is ispada zin wey zaan din en he edhingaten is panè din he ebelahan te egkeregreg he vesut.

Salmo 75:3

Emun egkehuyung is kelibutan ne ebpengerkeren te kegkahandek is menge meǥinged kayi, ne iyan a edlig-en te mibengunan kayi.

Salmo 94:2

Iyan ka edhukum te langun he menge etew; umbe, sigi en, belesi nu en is menge gelbuwen te zait he ibales kandan.

Salmo 98:9

Egkelipey zan diyà te etuvangan te Nengazen su edhendini sikandin te kedhukum te menge etew kayi te kelibutan. Metazeng is kedhukumi zin kandan wey wazà bintahà.

Megwewali 3:17

Ne nekekaǥi a ziyà te ǥehinawa ku te, “Edhukuman te Megbevayà is metazeng wey menge lalung he menge etew, su zuen intail zin he timpu te uman sevaha he vuluhaten.

Megwewali 7:15

Kayi te untung ku he wazè din pulus, neehè ku is langun: is menge metazeng ne nemematey zutun te metazeng he kebpengungubpaan wey is menge mezaat ne ebpengungubpaan te meluǥayad dutun te mezaat he kebpengungubpaan dan.

Jeremias 11:20

Piru mid-ampù a, ke siak te, “He Nengazen he Mekeǥeǥehem, metazeng is kedhukum nu wey nesayud ka te isip wey gehinawa te etew. Ipeehè nu kedì is kebelesi nu kandan, su insarig ku kenikew is kasu ku.”

Jeremias 12:1

He Nengazen, layun hustu is kukuman nu emun edriklamu a ziyà te kenikew. Ne ǥuntaan ed-insà a mehitenged te hustu he kukuman nu: Maan is ed-uswag is menge lalung? Maan is dezeyaan is ked-ubpà te menge etew he midluib kenikew?

Ezekiel 18:25

“Ne sikiyu mulà, iyan niw egkeǥiyen is, ‘Kenà metazeng is menge paaǥi te Nengazen.’ Pemineg kew is menge etew te Israel: Iyan be kenà metazeng is kediey he menge paaǥi etawa iyan is keniyu?

Malakias 3:18

Ne egkeuman niw en maan egkaahà is mibizahayan te metazeng wey lalung, is mibizahayan te ebpenilbi te Megbevayà wey kenà ebpenilbi kandin.”

Numero 16:22

Piru midluhud si Moises wey si Aaron he ke sikandan te, “He Megbevayà he ebpuunan te untung te langun he menge etew, edelehiǥen nu ve te pauk nu is langun he etew kayi te sevaha zè man is nekesalà?”

Deuteronomio 1:16

Dutun he timpu mibmenduan ku is menge zatù he husaya zan is rirù te menge etew, ne kinahanglan he ed-ikulen dan is hustu he kukuman dutun te kedhusey zan. Ne kenà iyan dan dà husaya is menge Israilihanen, kekenà, ragkes en is kenà menge Israilihanen he ed-ubpà duma keniyu.

Deuteronomio 1:17

Kinahanglan he wazè dan edepiǥan dutun te kedhusey zan; iped-iring dan is kebpemineǥa zan te menge pubri wey menge sepian. Ne kenè dan mahandek te minsan hentei su is kedhukum dan, keǥehem he imbeǥey kandan te Megbevayà. Ne emun mereǥen he edhusayen is rirù ne uwita zan kayi te kediey, ne iyan a edhusey zutun.

Deuteronomio 32:4

Iyan sikandin batu he endilungè ku; utew hustu is menge vaal zin, wey metazeng is langun he menge paaǥi zin. Metinumanen sikandin he Megbevayà ne kenà sikandin egkesayep; metazeng sikandin ne hustu is menge vaal zin.

Zatù 11:27

Wazà mezaat he mibeelan dey ziyà te keniyu, piru sikiyu mezaat is ed-ul-ulahan niw kenami su egkesuat kew he ebpekidtebek kenami. Iyan is Nengazen edhukum kenitew ke hentei is ebpekevenar kenitew.”