Ezra 7:16 - Manobo Western Bukidnon OT

¹⁶ Uwita nu zaan is langun he pelata wey vulawan he egkezawat nu puun te prubinsya he Babilonia, ragkes is ebpuun te keugelingen he suat he tavang te menge etew te Israel wey te menge memumuhat dan he para te valey te Megbevayè dan diyà te Jerusalem.

Ezra 7:16 교차 참조

1 Cronica 29:17

He Megbevayè ku, netuenan ku he iyan ka edsusi te menge ǥehinawa zey, ne igkelipey nu ke egkeehè nu he metazeng heini. Umbe tutuu wey ebpuun te keputian te atey is kebeǥaya ku kayi he menge vutang. Wey minsan is menge keet-etawan nu he kayi ǥuntaan ne neehè ku he mibeǥey zan daan te ebpuun te keputian te atey zan. Umbe utew a nelipey.

1 Cronica 29:6

Ne zutun, is menge pengulu te menge pemilya, is menge pengulu te menge tribu te Israel, is menge peremandar te linibu wey ginatus he menge sundaru, wey is menge upisyal he menge sineriǥan te azen te hadì, mibeǥey zan daan he ebpuun te keputian te atey zan.

1 Cronica 29:9

Utew nengelipey is menge etew su mibeǥey is menge pengulu zan he ebpuun te keputian te atey zan para te Nengazen. Utew zaan nelipey si Hadì David.

2 Cronica 31:14

Si Kore he anak ni Imnah he Levihanen he vantey ziyà te zapit te edsilaan he gemawan te valey te Nengazen, iyan midseriǥan te kedumala vahin te menge halad he keugelingen he suat is kebeǥaya zuen diyà te Megbevayà. Ketengdanan din is kebpemeǥey ziyà te menge memumuhat wey menge Levihanen te menge azen he impehinungud diyà te Nengazen wey segradu he menge halad.

2 Cronica 6:2

Ne ǥuntaan nekepevaal ad te utew mekempet he valey para kenikew, he egkeubpaan nu te wazà pidtemanan.”

2 Cronica 6:5

‘Puun dutun te kebpeǥewasa ku te menge etew ku he Israilihanen diyà te Ehipto, ne wazè ku pilia is inged te minsan hentei he tribu te Israel para edtukuzan te valey he para te kebeǥayi kedì te zengeg, wey wazà a mebpilì te hadì he edumala te menge etew ku he Israilihanen.

2 Cronica 6:6

Piru ǥuntaan, mibpilì ku is Jerusalem he zutun a ebeǥayi te zengeg, wey mibpilì ku si David he edumala te menge etew ku he Israilihanen.’

Ezra 1:4

Is menge etew ziyà te menge lugar he ed-ubpaan niw te nesamà he menge Israilihanen, ereg sikandan he edtavang keniyu zutun te kegenat niw. Mebeǥey sikandan keniyu te menge pelata wey vulawan, menge vutang he egkinehenglanen niw, menge uyaǥen, wey tavang he ebpuun te keugelingen he suat he para te valey te Megbevayà diyà te Jerusalem.”

Ezra 1:6

Is duma he menge etew midtavang kandan pinaaǥi te kebeǥey te pelata he menge gelemiten, menge vulawan, menge azen he kinahanglan dan, menge uyaǥen, duma pa he mahalen he menge azen, wey tavang he ebpuun te keugelingen he suat he para te valey te Nengazen.

Salmo 135:21

Deliǥa niw is Nengazen he ziyà te Zion. Diyà sikandin med-ubpà te inged he Jerusalem. Deliǥa is Nengazen!