Ezra 3:7 - Manobo Western Bukidnon OT

⁷ Mibeǥey is menge Israilihanen te selapì he ibayad te menge edsapsap te vatu wey te menge pandey. Mibeǥey zaan sikandan te menge keenen, menge inumen, wey lana he ibayad diyà te menge tig-Sidon wey te menge tig-Tyre para te menge kayu he sidru he ebpuun diyà te Lebanon. Heini he menge kayu, igkarga te varku ne ed-uwiten diyà te Jopa. Intuǥut heini ni Hadì Cyrus he hadì te Persia.

Ezra 3:7 교차 참조

2 Samuel 5:11

Dutun he timpu, midsuǥù si Hadì Hiram he hadì te Tyre te menge menunudtulà diyà te ki David duma is menge pandey, menge tigsimintu, wey mibpeuwit te menge kayu he sidru, su ebengunen dan is turuǥan ni David.

1 Hadì 5:6

“Umbe suǥù ka te menge etew nu te kebpemiley te menge kayu he sidru ziyan te Lebanon para kediey. Ibpeuǥup ku kandan is kedì he menge etew, ne edsuhulan ku is kenikew he menge etew sumalà te egkesuatan nu he kezekelà te suhul. Su netuenan nu man he wazà kayi te kenami metau he ebpemiley te kayu he iring te menge etew nu he tig-Sidon.”

2 Hadì 12:10

Ne emun dekelè en is selapì dutun te kahun, edhendutun is sikritaryu zuen te hadì wey is lavew he memumuhat ne ebilangen dan haazà ne emun egkepasad, id-ahuk dan diyà te menge bag.

2 Hadì 12:13

Is selapì he imbeǥey ziyà te valey te Nengazen, ne wazà gemita para te kebaal te pelata he menge inumà, menge penamped te pebilu te sulù, menge yehung, menge trumpita, etawa minsan hengkey he ǥelemiten he vulawan etawa pelata dutun te valey te Nengazen.

2 Cronica 34:10

Ne zutun, imbeǥey zan haazà is selapì diyà te menge etew he midseriǥan te kedumala te kebpurungi zuen te valey te Nengazen ne migamit dan haazà he suhul te menge terebahanti.

Ezra 3:6

Minsan wazè pa mepuuni is kebenguna ked-umana zuen te valey te Nengazen, mibpuun en is menge Israilihanen te kebpemuhat te menge pemuhat he edtutungen duen te nehuna he andew te ikepitu he vulan dutun he tuig.

Ezekiel 27:17

“ ‘Mibpetiǥayun daan diyà te kenikew is Juda wey Israel. Midliwaan dan is menge velegyè nu te trigu he ebpuun diyà te Minnit, higus, teneb, wey haplas.

Jonas 1:3

Piru wazà mebpezumazuma si Jonas su mibpeleǥuyan din is Nengazen pehendiyà te Tarshish. Midhendiyà sikandin te Jopa, ne zutun duen barku he edhendiyà te Tarshish. Mibayad sikandin te piliti, ne hein nekevayad en, mid-untud dutun te varku he ebpehendiyà te Tarshish su wey zin mepeleǥuyi is Nengazen.