Ezra 3:12 - Manobo Western Bukidnon OT

¹² Mahabet dutun is meǥurang en he menge memumuhat, menge Levihanen, wey menge pengulu te menge pemilya he nekeehè pa zuen te nehuna he valey te Nengazen. Ne utew sikandan nekesineǥew hein neehè dan is pundasyun te veǥu he valey te Nengazen. Piru mahabet he menge etew zutun is nemengulahì tenged te kegkelipey zan.

Ezra 3:12 교차 참조

Haggai 2:3

Ke sikandin te, “Hentei keniyu is nekaahà dengan te kekempet kayi te valey te Nengazen? Ne hengkey is ked-ehè niw kayi ǥuntaan emun idhindeg duen te nehuna? Siguradu he minus is ked-ehè niw kayi?

Zacarias 4:10

Duen menge etew he edsawey su ǥeina te zeisey pa is nehimu zuen te kebpehitindeǥa te valey te Nengazen. Piru edlipey zed sikandan emun egkeehè dan en he ibpelastar en ni Zerubabel zuen te valey te Nengazen is ketepusan he pinilì he vatu. Ne migkaǥi kayi te kedì sikan is belinsuǥuen te, “Iyan ibpesavut keniyan te pitu he sulù is menge mata te Nengazen he edtengteng diyà te tivuuk he kelibutan.”

Isaias 60:22

Deisey zà sikandan, piru ebmahabet sikandan. Menge egkaayuayu zan, piru egkehimu sikandan he gemhanan he nasyun. Iyan a, is Nengazen he segugunà ebaal kayi zutun te hustu he timpu.”

Isaias 41:14

Minsan deisey ka wey meluya, kenè ka mahandek su iyan a mismu edtavang kenikew. Iyan a, is Nengazen, is migkaǥi kayi. Iyan a menluluwas nu, is waǥas he Megbevayà te Israel.

Salmo 126:6

Is midhipanew he nekesineǥew, he ed-uwit te venì he id-ezek, mekeulì sikandin he egkelipey is ed-uwit te neraǥun din.

Job 8:7

Ne is ketiǥeyunan he egkehimu he kenikew te huziyan he timpu ne edhuna pa he utew zekelà duen te nehuna he ketiǥeyunan nu.

Ezra 3:13

Kenè te en egketuenan is kulahì te egkelipey wey is kulahì te edlelendag su utew en subra is keǥurub te menge etew, ne egkezineg heini ziyà te meziyù.

Jeremias 50:4

“Dutun he timpu is menge etew ziyà te Israel wey Juda edsineǥew is edangep kayi te kedì, te Nengazen he Megbevayè dan.

Salmo 147:1

Deliǥa is Nengazen! Utew meupiya is kegkanta te menge idalig te Megbevayè tew. Ne meupiya heini su zait man iyan sikandin he edeliǥen.