9 Ne egkehimu haazà he eliyavuk ne haazà ebpekeeneb te tivuuk he Ehipto, ne pinaaǥi zutun ebpenlevaǥan te menge levag he ednanà is menge etew wey menge ayam kayi he tanà.”
Umbe, migenat si Setanas puun diyà te etuvangan te Nengazen ne mibpesekitan din si Job pinaaǥi te menge levag he nenuvù puun diyà te igiek din taman te ulu zin.
Umbe, migkuwa sikandan te avu ziyà te repuǥà ne midhitindeg sikandan diyà te etuvangan te hadì. Insimburà haazà ni Moises diyà te hewhewanan, ne zutun mibpenlevaǥan te menge levag he ednanà is menge etew wey menge ayam.
Ne migkaǥi is Nengazen diyà te ki Moises wey ki Aaron te, “Kuwa kew te tigsengekemkem he avu ziyà te repuǥà ne haazà ibpesimburà ki Moises diyà te hewhewanan dutun te egkeventayan sikandin te hadì.
